venerdì 25 febbraio 2011

VILLAREAL – NAPOLI 24.02.11 (2 -1) LL’AGGIU VISTA ACCUSSÍ

VILLAREAL – NAPOLI 24.02.11 (2 -1)
LL’AGGIU VISTA ACCUSSÍ


Che delusione guagliú, tengo ‘o ttuosseco nfino a ‘mpont’ô musso. I’ ce credevo e nce rummanette overo malamente... Cu cchi me ll’aggio ‘a piglià? Cu tutte e cu nisciuno, ma certamente ‘nu poco cu Lavezzi (ca me facette magnà ‘o fecato e ca si ll’avesse avuto dint’ê mmane ll’avesse fatto vrognole vrognole), ‘nu poco cu Mmazzarri (ca pe mme ô pprincipio sbagliaje ‘a furmazziona tenennose ‘mpanca a Ccavani e Pazienza; certo Cavani steva stanco, ma allora lassalo â casa; si ‘mmece t’ ‘o puorte, falle fà ‘o primma quarta d’ora, risuolve definitivamente ‘a pratica e ppo ‘o faje arrepusà nfino a llunnerí!), ‘nu poco cu quacche ato jucatore (ca po ve dico) e paricchio cu ‘o mazzeniero ca se ‘nfessette a appruntà pe DeSanctis chella smaledetta divisa blu-savoia ca porta ‘na jella futtuta pure si ‘a tène ‘ncuollo uno sulo d’ ‘e nuoste... ‘Na cosa è ccerta po e cioè ca chist’anno ‘a tenta jalizza (il giallo) ce dice malamente: doppo d’ ‘o Chievo ‘o Villareàllo..., pacienza! P’ ‘o riesto però dico ca tutto summato ‘a partita d’ ajere ssera fuje pusitiva e ‘mpruspettiva, custruttiva. Si avesse tenuto ‘a cchiú piccerella titubbanza ‘ncopp’ â perzunalità d’ ‘a squatra(ma nun ‘a tenevo), ajere ssera m’ ‘a levaje . Tutti vedettero ‘a perzunalità, ‘a forza, ‘o core,’e chilli guagliune ca pe ‘na bbona mez’ora mettettero sotto ê spagnuole e ‘e stevano pe stennere si avessero tenuto ‘nu poco ‘e mazzo! E ‘mmece fujeno e fujemo jellate assaje: perdettemo pe n’ autogollo, pe quacche decisione ‘e ll’arbitro e pe poche arrori ca purtroppo ce stanno dinto a ‘na partita accussí curaggiosa.’A fora ‘e Lavezzi,(ca voglio murí quanno se ‘mpara a tirà ‘mporta) Gargano(ca si recupera ciento pallune ne perde ciento e uno), Zuniga (ca cchiú ca ‘nu jucatore ‘e pallone pare ‘nu gocoliere ‘e circo aquestre…) Yebda e Sosa( ca songo ‘e ‘na lentezza ‘e abbuttamiento (esasperante)), ‘a fora ‘e chiste nun me sento ‘e criticà a niscuno ato d’ ‘e nuoste:dèttero tutto chello ca tenevano e ‘a bbona sciorta nun ce vulette dà ‘na mana! Cunchiudenno primma ‘e passà ê ppaggelle, ca ‘sta vota so’ asciutte, asciutte putennose dà ‘o seje e mmiezo a ttutte quante ‘a fora ‘e Yebdà e Sosa (5) ( ca nun tenono ‘na funziona pricisa, sbagliano assaje e songo inutilmente falluse), ‘a fora ‘e Zuniga (5,5)(p’ ‘e rraggione ca aggiu ggià ditto, e soprattutto ‘a fora ‘e Lavezzi (4,5) croce e delizzia d’ ‘o Napule,( in effetti ‘a corza soja e ttutto ‘o muvimento ca fa servono ô juoco d'attacco e pure pe lanzà a Ccavani (7) ca mancanno ‘nu centrocampista cu ‘e piede bbuone e cu ‘a cerevella fina, nisciun’ato riesce a lanzà...., ma – santu dDio! – se ‘mparasse a ttirà ‘mporta, capesse addó s’à dda menà ‘o pallone pe ffà gollo!) Cunchiudenno dico ca (levata ‘a miezo l’Airopa Legua) pe cchello che resta faccio ll’augurio ê guagliune napulitane ‘e cogliere, corna facenno, ‘o meglio piazzamento pussibile, ossia ‘o primmo.
Ll’asciuta dâ coppa airopea è stata amara, ma âmmo visto a Ruizzo ( ca è bbuono e ‘nfuturo ce se po’ ccuntà) ‘a mo putimmo dedicà tutt’ ‘e fforze noste ô campiunato,penzanno ca resta ‘o fatto ca nfino a mmo ce simmo fatte sempe onore e, si ‘ncampiunato stammo addó stammo, nun è ‘nu caso, ma è ffrutto ‘e ‘na prugrammazzione che ce sta danno ‘a cosa cchiú ‘mpurtante:no risultate uccasiunale, ma stabbilità.E vve pare poco?
Quante songo chille ca a pprincipio ‘e campiunato avessero scummiso dduje evere ‘ncopp’ a ‘nu Napule a ttre ppunte dô Milanno capelista primma d’ ‘a sfida a ttu ppe ttu (scontro diretto)? Penzo proprio ca stammo a dèbbeto cu ‘a squatra e ll’ allenatore, ca ce stanno rialanno cummuzzione straurdinarie, superannose cuntinuamente, pecché, dicimmoncella tutta quanta, ‘stu Napule ‘ncopp’â carta nunn è assulutamente ‘a siconda squatra d’ ‘o campiunato; però â fine d’ ‘e cunte stammo lla e si chisti giocatori riesceno a rompere ll’ova ‘int ô panaro d’ ‘e squatrune milanise, d’ ‘a mariola piamuntese d’ ‘e sbruffune rumane è ssempe ‘na suddisfazzione majateca!
FORZA NAPOLI!! Ce sentimmo. Bbona salute e bbona fine ‘e semmana!
R.Bracale Brak

Nessun commento: