mercoledì 21 settembre 2011

PATANE CRUJENTE

PATANE CRUJENTE
(patate croccanti)
Chesta vota ve prupongo ‘na ricetta sapurite a bbase ‘e patane crujente(patate croccanti)
,’na ricetta pe ‘nu guappo cuntorno ‘e piatte ‘e carne, ma che po’ addeventà pure ‘nu ricco siconno piatto si cumpletato cu ‘nu paro o cchiú d’ova sbattute e cancariate (strapazzate).
Venimmo a nnuje.
Chello ca serve pe cquatte perzone:
‘Nu chilo e mmiezo ‘e patane vecchie a ppasta jalizza,
‘nu cucchiaro e mmiezo ‘e spiciaríe secche p’ arrusto (tipo ariosto)
250 gr ‘e ‘nzogna,
sale fino quanto ne serve,
pepe niro mmacenato a ffrisco quanto ne piace.
prucedimento
Ammunnà ‘e patane, sciacquarle e tagliarle a ffarinule ‘e ‘nu centimetro e mmiezo ‘e spiculo; sciacquarle; piglià
‘na prupurziunata tiella cu ‘o bbordo aveto, mettere 100 gr ‘e ‘nzogna dint’â tiella ‘nzieme ê ppatane, accuncià ‘e sale e fà cocere a ffuoco sustenuto avutanno ògne ttanto cu ‘na cucchiarella. ‘E ppatane s’ànn’ ‘a ‘ndurà a dduvere e ànn’ ‘a accummincià a ffà ‘nu poco ‘e crosta. Quanno ‘a ‘nzogna s’è ttutta assurbita mettere ‘o riesto d’ ‘a ‘nzogna e auní‘’o cucchiaro e mmiezo ‘e spiciaríe secche cchiú paricchiu ppepe niro mmacenato a ffrisco. Cuntinuà a fà cocere ‘e patane, pe farle crujente, allimmeno ati 40 minuti,nfino a cche addeventano bbelle crujente sempe cuntinuanno a girarle ògne ttanto pe farle cocere ‘a tutti ‘e late e farle ‘nzapurí a dduvere. Servirle cavere cavere ‘e furnello.
Si uno ‘e vo’ fà cu ll’ova cancariate (strapazzate), appena so’ bbelle crujente, sbattere quatt’ova, accunciarle ‘e sale e verzarle ‘ncopp’ê ppatane e ggirà cu ‘na cucchiarella nfino a cche ll’ova nun se songo asciuttate e ccotte. ‘Mpiattà, e servirle cavere cavere ‘e furnello.
Vini: Curpuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza ‘a magnà.
Mangia Napoli, bbona salute! Scialàteve e aggarbbatéve ‘a vocca e ‘o vernecale!
Raffaele Bracale

Nessun commento: