martedì 22 novembre 2011

FUNGE Â SICILIANA

FUNGE Â SICILIANA



Chisti funge â siciliana so’ overamente ‘na cratista trasetura cauda ‘a serví ‘nzieme a ffellate miste ‘e latticine frische (provola, fiorelatte e muzzarella) o staggiunate (pruvulone piccante).
chello ca serve pe seje perzone
‘nu kilò ‘e funge purcine,
dduje bicchiere ‘e passata ‘e pummarola,
‘na cepolla ndurata ‘e Muntoro ammunnata e ntretata,
‘nu spiculo d’aglio ammunnato e ntretato,
miezu bicchiere d’uoglio ‘auliva dunciglio,
‘nu tuppeto ‘e prutusino lavato, asciuttato e ntretato finu fino,
sale fino e ppepe janco macenato a ffrisco q.n.s.
comme se fa

Pulezzà ‘e funge cu ‘na mappina ummeta e cu ‘nu curtelluccio affilato e ntretarle a ppezzulle nun troppo piccerille; ammunnà cepolla e aglio e ntretarle finu fino;farle suassà a ffuoco miccio cu ll’uoglio dinto a ‘na cazzarola pruvvista ‘e cupierchio; quanno ànnu pigliato culore agnadí ‘e duje bicchiere ‘e passata ‘e pummarola e lassà cocere cu ‘a cummedità ‘ncupirchiata pe ddiece minute; a chistu punto agnadí ‘e funge, accuncià e sale e ppepe e cuntinuà a ccocere pe n’atu quarto d’ora. A ffuoco stutato agnadí ‘o tuppeto ‘e prutusino lavato, asciuttato e ntretato finu fino, ammiscà e serví caude ‘e furnello chisti sabruse funge â siciliana.
Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà.
Mangia Napoli, bbona salute! Scialàteve e aggarbbatéve ‘o vernecale!
Raffaele Bracale

Nessun commento: