sabato 12 novembre 2011

TRASETURA D’ACCIO

TRASETURA D’ACCIO

Chello ca ce vo’ pe 4 perzone:
Dduje mastille (gambi) d’accio pulezzate ‘e fronne e filamiente;
2 cucchiare ‘e pecurino corachiatta rattato;
Miezu bicchiere ‘e latte retunno levato ‘e friddo;
2 cucchiare ‘e cugnacca;
200 gramme ‘e casocavallo doce rattato fino fino;
Sale fino e ppepe janco macenato a ffrisco, q.n. s.
Comme se fa :

Sciacquà e pulezzà dê ffronne e dê filamiente ‘e mastille d’accio tagliannole a piezze ‘e scarze seje centimetre; metterle ‘ncopp’ a ‘na guantiera. A chistu punto dinto a ‘na ciotola ‘mpastà cu miezu bicchiere ‘e latte retunno levato ‘e friddo ‘o ccasocavallo e ‘o ppecurino; allungà ‘a crema cu dduje cucchiare ‘e cugnacca e accuncià ‘e sale fino e ppepe janco macenato a ffrisco. Mettere chesta crema dinto a ‘nu cuoppo ‘e pasticciere e passarlo pe n’ora dint’ â jacciaja; súbbeto doppo regnere ‘e piezze d’accio cu ‘sta crema e serví.
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja.
Magna Napule, bbona salute! Scialàteve e aggarbbatéve ‘o vernecale!!
Raffaele Bracale

Nessun commento: