GENOA – NAPOLI (29/01/12) 3 A 2LL’AGGIU VISTA ACCUSSÍ

GENOA – NAPOLI (29/01/12) 3 A 2
LL’AGGIU VISTA ACCUSSÍ

Nun ce simmo, guagliù! Nun ce simmo e nun ce simmo! Che ghiurnata nera, guagliú chellad’ajere!Accumminciajemo proprio cu sette parme ‘e capiteme-a-mmé ‘stu ggirone ‘e ritorno..., accumminciajemo ciovè turnanno ‘a Marassi senza manco ‘nu punticiello. Ma i’ m’aspettavo, me ll’aspettavo e nn’avette ‘a cunferma quanno tiranno ‘e somme avette addizziunà ca ‘o Napule ‘ncopp’ a nuvantacinche minute nne jucaje sí e nno diece! Êsse jucato, nun dico assaje, ‘na mez’ora ‘nu punto â casa ce ‘o putevamo purtà! ‘Mmece capitaje ca pe uttantacinche minute ‘o Napule nun ghiucaje o ‘o ffacette senza ggenio e cu ‘e ccosce mosce... pe nun dicere po d’ ‘a jurnata no ‘e De Sanctis, d’ ‘o solito Cannavaro scadente(ca comme sta miso fisicamente assumiglia a Falstaff(o)) e de Marekiaro ca se jette annascunnenno pe tutt’ ‘a partita e cquanno (‘ncopp’ô doje a zzero p’ ‘o Ggenoa) lle capitaje ‘o pallone bbuono p’arapí n’ata vota ‘a rencontra se magnaje ‘a rredda, depositanno muollo muollo ‘o pallone ‘mmano a Ffrey. ‘Nzomma facenno ‘e cunte sott’ô lampione ajere perdettemo ati punte e cu ‘a scunfitta d’ajere oramaje se chiarette ca cu ‘a difesa ca tenimmo nun ghiammo a nnisciuna parte; rifrettimmo bbuono ca sulo ll’urdimi scuatre ô funno d’ ‘a classifica tenono ‘nu rennimiento pejo d’ ‘o nuosto! È inutile ripetere ca cu ‘na difesa accussí, ‘mperniata ‘ncopp’ô frato d’ ‘o guappo d’ ‘a Luggetta, ‘mperniata ‘ncopp’a uno ca marca sempe ê spalle ‘e pponte avverzarie, ca ‘e capa nun ne piglia maje una, ca sbaglia sistematicamente tutt’ ‘e ppúgge (tutti i rilanci), mettenno a disaggio sistematicamente ‘e cumpagne..., cu ‘na difesa accussí cuncertata nun se po’ cumpetere cu ‘e primme quatto d’ ‘o campiunato... anze i’ dico ca si se va avanti ‘e ‘sta manera,ancòra tre o quatto partite e ‘o Napule se trova a lluttà ‘nzona retrocessione! Rendimmoce cunto ca paricchi jucature mancano d’alliciento (di motivazione) e ‘o primmo ‘e tutte è proprio Marekiaro, ca oramaje cammina p’ ‘o campo, se va annasconnenno, aiza póvera e spisso sbaglia ll’uccasione prupizzie (e sperammo ca nun ‘o facesse a pposta!...); oramaje sulo DeLa nun à capito ancòra ca si ‘o guaglione se ne vuleva o se nne vo’ jí aveva e à dda essere libbero ‘e se nne jí,pecché tenerselo pe fforza nun giova a nnisciuno e sserve sulo a arruvinà tutt’ ‘a facenna e â fine chi nne pava ‘e cunzeguenzie è tutt’ ‘a scuatra e nuje aute tifuse!,P’ ‘o riesto po c'è assaje ‘a rivisiunà (da rivedere). Ancòra ‘na vota ‘o turnover(ro) se dimustraje ‘nu fallimento e cchesto nun assolve a Mazzarri, anze nn’aggrava ‘a pusizzione. È isso o no ca dicide ‘o mercato d’ ‘o Napule? Songo tre anne ca nun azzecca n’acquisto, ‘a fora ‘e Cavani; ‘a scuatra è cumposta, ancòra,p’otto unnicesime cu gghiucature ‘e ll’ebbreca ‘e Marino; d’ ‘e tre nuove sulo Cavani è risultato cratisto , Dossena è ‘nu fallimento tutale e fóss’ora ‘e ruttamarlo, e da Inler(ro),ca ajere nun ce stette, stammo ancòra aspettanno ca facesse vedé chi è, sempe ca Mazzarri riesce a lle dà ‘a pusizziona justa! E cchesto pe nun parlà d’ ati acquiste fallimentare, prontamente rijalate , o mannate eternamente a scarfà ‘a panca! ‘E nomme? E che v ‘e ddico a ffà! ‘E cunuscimmo tutte e è inutile ripeterle...; resta ‘o fatto ca p’ apararse ‘o prozo Mazzarri è custretto ad affidarsi ê ssolite ffacce ca ‘e rippe o ‘e rappe ll’assicurano ‘nu rennimento metriuso (mediocre) ma, allimmeno ce sparagnano chilli trabbusciamiente (quei tracolli) sufferute (subíti) cu Cchievo, Parma, Catania, Cesena, Bologna e ajere cu ‘o Genoa. Ripeto: è o nun è isso ‘o respunzabbile d’ ‘o mercato? À dimustrato assaje d’essere nigado (un incapace) e si nun vence ‘a Coppa Italia e nun supera ‘o turno ‘nCiampionsa, nn’ à dda essere cacciato a ccauce ‘nculo e ssi è pussibile à dda resarcí ‘a suggità pe tutt’ ‘e rammagge barate (danni economici) prucurate.Se facesse ‘a bbalicia e se nne jesse purtannose appriesso Cannavaro, Dossena e quaccun’ato Sperammo mo ca miercurí cu ‘o Cesena ‘ncasa riuscimmo a tturnà a vvencere cunvincentemente.Miercurí, cu Lavezzi squalificato e - pe furtuna! - cu ‘o capitano ‘nfurtunato, vedimmo si Mazzarri riesce a sistimà ‘a difesa a mmestiere facenno arrepusà a Campagnaro(mettenno a Fernandez(o)), spustanno Britos(so) a ccentro e chiammanno n’ata vota Aronica; e ppo vedimmo si tene ‘o cuorio ‘e levà a Marekiaro allinianno (schierando) Vargas, Cavani e Pandev dô primmo minuto! E passammo ê ppaggelle:
DE SANCTIS 5 Suffrette pecché ‘a difesa luvarda fuje overamente scuncertante (imbarazzante), ma isso ce mettette ‘o ssuĵo: ‘ncopp’â primma rredda se facette truvà (nun se sape ‘o pecché) ttre mmetre annante â linia ‘e porta e ncopp’â siconna rredda nun facette manco ‘a mossa ‘e ascí ‘ncopp’ a Ggilardino; sulo ncopp’â terza rredda forze nun tenette nisciuna respunzabbilità. Cumplessivamente ‘na jurnata no!

CAMPAGNARO 5 È ‘a tiempo ca ‘o toro argentino êsse ‘a risciatà ‘nu poco e ll’atalossa (prestazione) quase deludente d’ajere ne fuje ‘na cunferma.

CANNAVARO 3,5 Pesadiglio pauruso (incubo spaventoso) ‘a seirista (pessima) atalossa(prestazione) ‘e culo’echiummo ca, assaje ‘mpresuttuto, ncopp’â primma rredda cunzentette a nun me ricordo chi ‘e dà tranquillamente ‘e capa ‘a palla a Ppalacio ca futtette a De Santis (ca steva piglianno accunte tre metre fora d’ ‘a linia ‘e porta) e ncopp’â siconna rredda se perdette a Ggilardino secutannolo inutilmente (e Ggilardino ‘e chisti nun è nu fruvolo ‘e guerra (fulmine di guerra); a pparte po ca sbagliaje cchiú ‘e ‘nu ‘ntervento fino a cquanno stette ‘ncampo.
(Dô 45° MAGGIO 5,5 – Sufferette e cquanto ‘a sfita cu Sculli; ll’unica cosa bbona fuje ‘o cruzzo p’ ‘a rredda ‘e Cavani).

BRITOS 4,5 ‘Nu poco meglio quanno se difennette a cquatto, ma se vede ca nun sta ‘nfromma e cumminfatte arrancaje cchiú ‘e ‘na vota.
ZUNIGA 4, 5 Cercaje ‘e cumbinà coccosa ‘ncopp’â curzia, ma aizaje póvera e facette sulo fuosse ‘nterra, nun preoccupanno maje ll’avverzarie.
(Dô 57° CAVANI 6,5 Pure si trasette troppo tarde riuscette a ddà ‘na speranzella ê suoje, ma quanno ‘o tiempo nun abbastaje cchiú!)


DZEMAILI 6,5 Tutto summato l’atalossa d’ ‘o svizzero nun fuje deludente: currette e s’affannaje senza sparagnarse maje; sbagliaje sulo cocche vvota perdenno ‘o pallone, ma ce mettette sempe ‘na pezza cu ccuorio, cegna e ssanco friddo. Tiraje pericolosamente ‘nu paro ‘e vote e poco mancaje ca nun signasse ‘a rredda d’ ‘o pareggio.

GARGANO 6,5 Sbagliaje ‘nu paro ‘e passagge ‘mpurtante, ma p’ ‘o riesto currette e luttaje assaje; se ‘mmentaje ‘na granna faglia (un grande lancio) pe Lavezzi e ffuje ll'unico a cercà (pure si nun è ccosa soja) nu poco ‘e urganizzazzione ‘e juoco.

DOSSENA 5 Sempe cchiú ‘mpresuttuto, quase comm’ô capitano e ssempe cchiú braduso, nun ‘ncarraje ‘nu cruzzo decente rijalanno spisso ‘o pallone â difesa d’ ‘e crifune.Me sto’ chiagnenno a Vvitale rijalato ô Bbologna!

HAMSIK 4 Svagato e ppoco prisente pe tutt’ ‘a partita, quanno ll’arrivaje ‘o pallone bbuono ch’êsse pututo riaprí ‘a rencontra (partita),neh isso che te fa? Ll’appujaje doce doce ‘mbraccia a Ffrey... E dicimmo ca nun ‘o facette a pposta, ma i’ tenco ‘nu bruttu suspetto! P’ ‘o riesto niente ‘a arricurdà.Aggio ‘a ‘mpressione ca chisto sta facenno ‘o scemo pe se nne jí! Pe mme è mmeglio ca miercurí Mazzarri nun ‘o convoca!
LAVEZZI 5,5 Cercaje ‘e sfruttà ‘a velocità soja, ma ajere ‘e difenzure d’ ‘e crifune fujeno cane ‘e presa e riuscettero a cuntenerlo pe bbona parta d’ ‘a rencontra (partita). Muntaje ‘ncattedra sulo ô finale signanno ‘na rredda overo bbella.
PANDEV 5,5 – Lle venette servuto ‘na sola palla pulita e isso ‘a stette pe mettere dinto ê primme minute ‘e juoco; p’ ‘o riesto d’ ‘a rencontra s’appannaje e ‘e cumpagne nun lle dettero ‘na mana atatta (adeguata).
(Dô 73° VARGAS 5,5 Tuccaje pochi pallune e se dimustraje d’essere ancòra troppo tenneriello p’ ‘o campiunato ttaliano; ma ‘o vulesse vedé ‘ncampo dô primmo minuto!)
MAZZARRI 4 Certo, è commoto criticà quanno ‘o fatto è scuro, ma purtroppo, ‘ncampiunato ‘o Napule joca malamente ‘a ‘nu poco ‘e tiempo: è previsibbile, poco flessibbile, rijala spisso ‘nu tiempo a ll’avverzarie e se lassà dà ‘ncuollo senza reaggí sott’ô colpo. ‘O motulo nun è ssempe adatto, specie ‘ndifesa, pe ll’uommene a disposizzione, pe nun dicere ‘e chi è stracquo (Campagnaro), fora posizione (Inler(ro), senza ggenio (Marekiaro) e ‘mprusuttute (Cannavaro e Dossena) ‘E ddoje rredde signate nun servono a mettere ‘na fronna ‘e fica ‘ncopp’a ll’atalossa seirista d’ ‘a scuatra ca à dda essere assolutamente mudificata miercurí ca vène.
l’arbitro ROCCHI 4‘Sta meza cazetta, cummerciante (ma nun se sape ‘e che...) fiurentino ca ati vvote (me ricordo ‘e ‘nu san Zziro, cu ‘o Milan(no))aveva ggià spezzato ‘e passe napulitane, ajere aumentaje ‘a ddosa d’ ‘o ‘o debbeto ca tene cu nnuje: ’a terza rredda d’ ‘o Ggenoa fuje abbimmata (viziata) da ‘na falta ‘ncuollo a Mmaggio, ca aveva ‘nticipato chillo d’ ‘o Genoa ca ‘o stennette. Ademasso po (Inoltre) Jankovic s’êva jttà fora pecché, doppo ll'ammunizzione ca s’abbuscaje pe ffalta ‘ncuollo a Ccampagnaro nce steva ‘nu siconno cartellino jalizzo pecché retissantemente trattenette a Dossena.
Rocchi ‘nzomma ajere facette paricchi fullune sempe ‘ndanno d’ ‘e napulitane dimustrannose arbitro senza attenzione.
E fermammoce cca. Si ‘o Signore ce ‘o fa vedé ce sentimmo ggiovedí ca vène, speranno ca miercurí ssera ‘o Napule torna a vvencere!
Bbona salute!
R.Bracale Brak