venerdì 27 gennaio 2012

RICCE ‘E FURETANE CU FRIJARIELLE E RICOTTA

RICCE ‘E FURETANE CU FRIJARIELLE E RICOTTA

chello ca ce vo’ pe sseje perzone
600 gramme ‘e ricce ‘e furetane
700 gramme(piso lisso =peso netto) ‘e frijarielle ammunnate e lavate,
300 gramme ‘e ricotta ‘e pecura,
‘nu bicchiere d’uoglio ‘auliva dunciglio,
‘na cepolla ndurata ‘e Muntoro ammunnata e ntretata fina fina,
sale duppio ‘na vrancata,
pepe janco mmacenato a ffrisco q.n.s..

comme se fa

Ammunnà e llavà ‘e frijarielle e metterle a arvere dinto a ‘na caurara cu otto litre d’acqua salata (vrancata ‘e sale duppio).Scularle ‘nu poco teniente e mantenerle ‘ncaudo. Dint’â stessa acqua arvere teniente teniente ‘e ricce ‘e furetane. Fraditanto ricà dinto a ‘na prupurziunata tiella ll’uoglio e a ffuoco miccio fà piglià culore â cepolla ntretata, nfunnennola cu ‘nu poco d’acqua ‘e cuttura d’ ‘a pasta. Doppo ‘na dicina ‘e minute ‘e cuttura, agnadí ‘a ricottaaggiungete la ricotta e farla accumplià tuïglianno dellicatamente.Regulà ‘e sale fino. A chistu punto sculà ‘a pasta e revacarla dint’â tiella ‘nzieme ê frijarielle tenute
‘ncaudo; tuïglià ancòra pe tre minute a fuoco miccio; ‘mpiattà e derrammà ‘e purzione cu abbunnante pepe janco mmacenato a ffrisco e serví caude ‘e fuculare chesta pasta sabrosa!
Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute! Scialàteve e cunzulàteve ‘o vernecale!!
Raffaele Bracale

Nessun commento: