mercoledì 15 febbraio 2012

LINGUINE PERCANTE

LINGUINE PERCANTE

chello ca serve pe sseje perzone
600 gramme ‘e linguine,
‘nu bicchiere d’uoglio ‘auliva dunciglio,
5 fascette ‘e rucola percante ammunnata, lavata e asciuttata,
dduje spicule d’aglio ammunnate e ntretate,
‘nu cucchiaro ‘e pignuole,
‘nu cucchiaro d’uva passa ammullata,
‘nu puparunciello percante (piccante)lavato e asciuttato,
sale duppio ‘na vrancata,
sale fino e ppepe janco macenato a ffrisco q.n.s.,
100 gramme ‘e pecurino rattato finu fino.

comme se fa
Mettere dinto a ‘nu mmiscaturo ll’uoglio, ‘e fascette ‘e rucola percante ammunnata, lavata e asciuttata,
dduje spicule d’aglio ammunnate e ntretate,‘nu cucchiaro ‘e pignuole,‘nu cucchiaro d’uva passa ammullata,
‘nu puparunciello percante (piccante)lavato e asciuttato,e sifflà nfi’ a uttené ‘na crema críceta e mmalacosa (soffice e spumosa). àrvere dinto a ‘na caurara cu otto litre d’acqua vullente salata(vrancata ‘e sale duppio) ‘e llinguine; scularle, revacarle dinto a ‘na ‘nzalatera cauda e cumnnirle cu ‘a crema ‘e rucola percante; agnadí ‘o ppecurino rattato finu fino, tuiglià e ‘mpiattà.
Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria e servute a ttiempo (temperatura) ‘e stanza pe magnà.
Mangia Napoli, bbona salute! Scialàteve e cunzulàteve ‘o vernecale!
Raffaele Bracale

Nessun commento: