PATANE ‘NCAZZATE

PATANE ‘NCAZZATE
Chello ca ce vo’ pe sseje persone
‘nu kilò e mmiezo ‘e patane vecchie a ppasta jalizza (gialla),
‘na vrancata ‘e sale duppio,
‘nu bicchiere d’uoglio ‘auliva dunciglio,
2 spicule d’aglio ammunnate e ntretate finu fino,
dduje cerasielle percante (piccanti)lavate, asciuttate e ntretate,
‘nu tuppeto ‘e prutusino lavato, asciuttato e ntretato finu fino,
sale fino q.n.s.

Comme se fa


Lavà ‘e patane e àrverle pe mez’ora cu tutt’ ‘a cascàra (buccia) dinto a abbunnante acqua salata (vrancata ‘e sale duppio); Scularle, ammunnarle d’ ‘a cascàra e tagliarle a rundelle ‘e miezu centimetro e sistimarle dinto a ‘na sperlunga cauda. Fraditanto dinto a ‘na tielloccia a ffuoco allero suassà pe cquacche mminuto cu uoglio ‘auliva dunciglio vullente ‘e spicule d’aglio ammunnate e ntretate finu fino e ‘e dduje puparuncielle percante ntretate;accuncià ‘e sale e ricà a ffilo chest’uoglio ‘ncopp’ê ppatane; derramarve pure‘o tuppeto ‘e prutusino lavato, asciuttato e ntretato finu fino; tuiglià a mmestiere e serví comme cuntorno ‘e carne, ‘e caso oppure ‘e pesce chesti ppatane ‘ncazzate ca se sposano bbuono sia cu ‘o vino russo sia cu cchellu janco a ssiconna ca accumpagnano carne,caso o pesce. Mangia Napoli, bbona salute! Scialàteve e cunzulàteve ‘o vernecale!
Raffaele Bracale


.