venerdì 18 maggio 2012

MANFREDE PERCANTE CU ‘A ZAMPUGLIATA ROSSA

MANFREDE PERCANTE CU ‘A ZAMPUGLIATA ROSSA Chello ca serve pe sseje perzone 600 gramme ‘e manfrede, 300 gramme ‘e passata ‘e pummarole, 8 fascetielle ‘e rucola percante, 3 spicule d’aglio ammunnate e ntretate finu fino, dduje puparuncielle percante (piccanti)lavate, asciuttate e grabbate (incisi) p’ ‘o lluongo, ‘nu bicchiere e mmiezo d’uoglio ‘auliva dunciglio, 50 gramme ‘e pignuole arruscate ô tiesto, 150 gramme ‘e caso pecurino rattato finu fino, sale duppio ‘na vrancata, sale fino e ppepe janco mmacenato a ffrisco q.n.s. Comme se fa Mettere dint’ô mmiscaturo miezu bicchiere d’uoglio, ‘e fascetielle ‘e rucola lavata, asciuttata e spedazzata, ‘nu spiculo d’aglio ammunnato e ntretato finu fino, ‘nu cerasiello percante (piccanti)lavato, asciuttato e grabbato (incisi) p’ ‘o lluongo, dduje pizzeche ‘e sale fino, ‘nu cucchiaro ‘e caso pecurino rattato e siffulà a auta vitezza nfi’ a uttené ‘na sarzulella culante e tenerla ‘e parte; subbeto doppo ricà dinto a ‘na prupurziunata tiella ‘nu bicchiere d’uoglio, ‘nu spiculo d’aglio ammunnato e ntretato finu fino,‘nu cerasiello percante (piccanti)lavato, asciuttato e grabbato (incisi) p’ ‘o lluongo e tenerle a ffuoco allero nfi’ a cche ll’aglio piglia culore; a ‘stu punto ricà ‘a passata ‘e pummarola, accuncià ‘e sale e ppepe e fà cocere pe diece minute. Fraditanto arvere dinto a otto litre d’acqua vullente salata (vrancata ‘e sale duppio) ‘e manfrede; scularle teniente teniente e revacarle dint’â tiella cu ‘a sarza ‘e pummarole ammiscà e agnadí ‘a zampugliata ‘e rucola, ‘o ccaso pecurino e tuïglia pe cinche minute a ffuoco miccio ammiscanno dellicatamente. ‘Mpiattà e serví caude ‘e fuculare ‘sti percante manfrede cu ‘a zampugliata rossa. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale

Nessun commento: