domenica 27 maggio 2012

MULIGNANE ‘MBUTTUNATE

MULIGNANE ‘MBUTTUNATE Chello ca ce vo’ pe sseje perzone ‘nu kilò ‘e mulignane viulette napulitane fatte a ffelle, doppie miezu centimetro, p’ ‘o lluongo, 100 gramme ‘e caso pecurino rattato finu fino, 100 gramme ‘e pane rattato, 3 spicule d’aglio ammunnate e ntretate fine fine, ‘nu tuppeto ‘e vasenicola lavato, asciuttato e ntretato finu fino, sale duppio tre cucchiare chine, sale fino e ppepe janco mmacenato a ffrisco q.c.n.v., ‘nu bicchiere d’uoglio dunciglio, abbunnante uoglio pe ffrijere. quacche steccadente. Comme se fa Lavà e asciuttà ‘e mulignane levanno ‘e streppune e ‘e ddoje ponte; tagliarle p’ ‘o lluongo a felle doppie miezu centimetro e sestimarle a ccuscie (derrammate ognuno ‘e sale duppio) dinto a ‘nu scolapasta pe ‘na mez’ora. Scularle, sciacquarle sotto a ‘nu strèpeto d’acqua fredda, e spremmerle. Fraditanto ammiscà dinto a ‘nu piatto ‘o caso pecurino cu ‘o ppane rattato ll’aglio e ‘a vasenicola ntretate sale fino e pepe janco mmacenato a ffrisco; mettere dint’ a ‘nu piatto ll’uoglio dunciglio ‘nfonnerve ògne fella ‘e mulignana e subbeto doppo ‘mbruscenarle dint’ô piatto cu ‘o ccaso,‘o ppane rattato ll’aglio e ‘a vasenicola ntretate sale fino e pepe; appujà ‘ncopp’ a ogne ffella n’ata fella accussí cuncertata e fermarle cu ‘nu steccadente. Fraditanto fà callentà abbunnante uoglio pe frittura e ffrijerve jonne jonne ‘sti chiètte ‘e mulignane, scularle cu ‘na spumadera, sfilà ‘o steccadente e servirle caude caude. Bbona salute! Brak . .

Nessun commento: