domenica 29 luglio 2012

COZZECHE E PPATANE Ô TIESTO

COZZECHE E PPATANE Ô TIESTO Chello ca ce vo’ pe sseje perzone 3 kilò ‘e cozzeche ‘e Taranto, 800 gramme ‘e patane vecchie, ‘Nu bicchiere e mmiezo d’uoglio ‘auliva dunciglio, ‘Nu bicchiere ‘e vino janco asciutto, 2 spicule d’aglio ammunnate e ntretate finu fino, ‘nu spiculo d’aglio ammunnato e swcamazzato ‘nu tuppeto ‘e vasenicola lavato, asciuttato e spezzettato a mmano(senza curtiello!), 500 gramme ‘e pummarole fresche lavate, scuttate, spellate e tagliate a ffarinule, 6 cucchiare ‘e pane rattato, ddoje prese ‘e sale duppio, sale fino e ppepe janco mmacenato a ffrisco q.c.n.v. Comme se fa Fà arapí ‘e frutte ‘e mare a ffuoco allero dinto a ‘na cazzarola larga pruvvista ‘e cupierchio cu miezu bicchiere d’uoglio,’nu spiculo d’aglio ammunnato e scamazzato e ‘nu bicchiere ‘e vino janco asciutto.Appena so’ aperte, ecussarle e metterle dinto a ‘na ciotola, tenenno ‘e parte ‘o zuco lloro passato a ‘nu culaturo a trama stretta. Arvere pe mez’ora ‘e ppatane dinto a parecchia acqua vullente salata(prese ‘e sale duppio). Scularle, spellarle ancòra caude e tagliarle a ffelle doppie miezu cm. Ógnere cu miezu bicchiere d’uoglio ‘na cummedità bbona p’ ‘o tiesto e sistimarve ‘nu cuscio ‘e felle ‘e patane; agnadirve ‘ncoppa ‘e cozzeche,derrammarve ‘o ttrigliato d’aglio e ‘a vasenicola spezzettata. Cummiglià cu ‘nu cuscio ‘e farinule ‘e pummarole, accuncià ‘e sale e ppepe e derrammarve ‘o ppane rattato, ‘o zuco d’ ‘e cozzeche tenuto ‘e parte e tutto ‘o riesto ‘e ll’uoglio. Mannà dint’ô tiesto ggià caudo a 180 ° e lassà cocere pe vvinte minute. Serví caudo ‘e tiesto chesti sfezziose cozzeche e ppatane ô tiesto. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! raffaele bracale .

Nessun commento: