domenica 30 settembre 2012

FRITTATA ‘E MACCARUNE SAFRUNATA

FRITTATA ‘E MACCARUNE SAFRUNATA Chello ca ce vo’ pe ddoje perzone 400 gramme ‘e vermecielle o ‘e bucatine arvate teniente teniente dinto a otto litre d’acqua salata vullente, sculate a mmestiere e passate pe mez’ora dint’â jacciaja, 4 ova, 2 cucuzzielle vierde napulitane, lavate, asciuttate, spuntate e ttagliate a rundelle doppie ½ cm., 4 gruosse sciure jalizze ‘e cucuzzielle, lavate, asciuttate, senza màstilo e ppestílo (gambo e pistillo) e murcellate a lla sanfason, 2 spicule d’aglio ammunnate e ntretate finu fino, ‘na farinula pe bbroro veggetale, 2 bustine ‘e safrone, 200 gramme ‘e provola affummecata tagliata a ffarinule ‘e ½ cm. ‘e ‘squina, ‘na presa ‘e sale duppio, sale fino e ppepe janco mmacenato a ffrisco q.c.n. v.. pecorino grattugiato due cucchiai ‘Nu bicchiere e miezo d’ uoglio ‘auliva dunciglio. Comme se fa Dinto a ‘na prupurziunata tiella ca nun azzecca ricà miezu bicchiere d’uoglio e a ffuoco allero fà piglià culore ‘o ttrigliato d’aglio; appena è ppronto agnadí ‘e cucuzzielle e ‘e piezze ‘e sciure ‘e cucuzzielle murcellate (spezzettati); ‘nfonnere cu meza ciotola d’acqua vullente addó è stato accumpliato ‘a farinula pe bbroro veggetale e ‘e ddoje bustine ‘e safrone e lassà cocere pe ddiece minute sempe a ffuoco allero. Fraditanto dinto a ‘na zupperella sbattere buono ll’ova cu ‘na presa ‘e sale fino ,ddoje prese ‘e pepe e ‘nu paro ‘e cucchiare ‘e caso pecurino. di pecorino.Arvere ‘a pasta tenente tenente dinto a otto litre d’acqua salata vullente, scularla a mmestiere, cunnirla cu miezu bicchiere d’uoglio e passarla pe mez’ora dint’â jacciaja; súbbeto doppo ammiscarla cu ll’ova sbattute e agnadirve ‘a trufa ‘e cucuzzielle e ‘e ffarinule ‘e provola;ammiscà, cummiglià e lassà ‘nzapurípe ‘nu quarto d’ora ammiscanno ògne ttanto; chistu fatto è sustanziale pe ‘na bbona riuscita d’ ‘o piatto.Ricà miezu bicchiere d’uoglio dinto a ‘na tiella ‘e fierro niro e a ffuoco sustenuto farlo callentà; appena è caudo, agnadirce ‘a pasta cunnita furmanno cu ‘a pressione ‘e ‘na furchetta ‘nu strato uniforme; fà suassà pe cquatto minute ‘nu lato e pe cquatto chill’atu lato; p’avutà ‘a frittata ajutarse cu ‘nu prupurziunato piatto o cupierchio. Serví a ffelle ‘sta frittata cauda o pure fredda. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! raffaele bracale

Nessun commento: