venerdì 12 ottobre 2012

PIRCIATIELLE CU TTUNNO, CHIAPPARE E ALICESALATE

PIRCIATIELLE CU TTUNNO, CHIAPPARE E ALICESALATE chello ca serve pe sseje perzone 600 gramme ‘e pirciatielle, 400 gramme ‘e passata ‘e pummarole, 400 gramme ‘e tunno sott’uoglio, ‘nu bicchiere d’uoglio ‘auliva dunciglio, dduje spicule d’aglio ammunnate e ntretate, 100 gramme d’aulive nere desciussate e ntretate, 100 gramme ‘e chiapparielle sotto sale sciacquate e asciuttate, 100 gramme ‘e sulumiglie d’alice salate sott’uoglio, ‘nu cerasiello percante (piccante)lavato, asciuttato e grabbato (inciso) p’ ‘o lluongo, ‘nu tuppeto ‘e prutusino lavato asciuttato e ntretato finu fino, sale duppio ‘na vrancata, sale fino e ppepe janco macenato a ffrisco q.n.s., Comme se fa Dinto a ‘na prupurziunata tiella a sponna auta ricà ll’uoglio, agnadirve ‘edduje spicule d’aglio ammunnate e ntretate, ‘nu puparunciello percante (piccante)lavato, asciuttato e grabbato (inciso) p’ ‘o lluongo, ‘o ttunno sculato e smullecato, ‘e sulumiglie d’alice salate sott’uoglio e lassà suassà tutto cosa a ffuoco allero; appena ‘o ttrigliato d’aglio à pigliato culore agnadí ‘a passata ‘e pummarola,ll’aulive desciussate e ntretate, ‘e chiapparielle e lassà cocere sempe a ffuoco allero pe quinnece minute accuncianno, a ffine cuttura ‘e sale fino e ppepe macenato a ffrisco. Mettere a ffuoco auto ‘na caurara cu otto litre d’acqua salata (vrancata ‘e sale duppio) e appena ll’acqua jesce a vollere, àrvere pronte pronte ‘e pirciatielle; scularle e revacarle dint’â tiella cu ‘o zuco e tuïglià pe tre minute a ffuoco miccio;fora d’ ‘o ffuoco derramma cu ‘o tuppeto ‘e prutusino lavato asciuttato e ntretato finu fino, ammiscà e ‘mpiattà servenno ancòra caude ‘e fuculare chisti ricatune sabruse! Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! Raffaele Bracale

Nessun commento: