venerdì 23 novembre 2012

A I K - NAPOLI (22/11/12) 1 A 2‘A VEDETTE ACCUSSÍ

A I K - NAPOLI (22/11/12) 1 A 2 ‘A VEDETTE ACCUSSÍ È ffatta guagliú, è ffatta! ‘Ncanna, ‘ncanna ma è fatta! Ajeressera s’ aveva ‘a vencere e se vincette. Cu tutto ca Mazzarri sbagliaje a schierà ‘a difesa mettenno centrale a Aronica, quanno êsse pututo metterce Britosso o Gamberini e soprattutto cu tutto, ca mettette a ffà ‘a parte ‘e Inlerro a ‘na mmummia alisandrina comme è Dondello e ppo ll’êtte ‘a levà... cu tutto chesto ajeressera ‘o Napule risulvette pusitivamente ‘a pratica svedesa stutanno ‘e speranzelle ‘e chilli puverielle d’ ‘e micciarielle svedese! È ffatta guagliú, è ffatta! ’O Napule s’assicuraje ‘o siconno posto dint’ô ggirone e mmo putimmo penzà cchiú tranquille ô campiunato. Ajeressera però se dimustraje ancòra ‘na vota ca ‘o Napule dipenne ‘a Cavani e nun po’ ffà a mmeno ‘e jucature comme Inler(ro) e Marekiaro! Passammo ê ppaggelle: ROSATI 5,5 Nun tenette particulari sfarme (colpe) ‘ncopp’â rredda d’ ‘e svedese, ma manco ‘a facette ‘na mossa, ‘nu tentativo ‘e fà quaccosa! E che saciccio! Fremmo comme a ‘na statua ‘e sale?! GAMBERINI 6 Jucaje ô ssolito assaje vigurusamente ( con aggressività) e puntualmente ll’arbitro lle siscaje contro, pure quanno nun era ‘o caso;p’ ‘o riesto pruvaje a mettere ‘na pezza a ll’amàrteme (erroracci) ‘e Aronica. ARONICA 3,5 Atalossa ‘a scurdà! Miso a ffà ‘o centrale se ‘ncannavarette sbaglianno tutto chello ca se puteva sbaglià! Pisciaje ‘o pallone e permettette a Bangura ‘e puntà ‘a porta ‘e Rosati, tiranno però, pe furtuna nosta, fora. Ô mumento d’ ‘o mumentaneo pareggio guardaje sulo ‘o cruzzo senza ‘e accorgerse ca Danielsson(no) se s’mpezzava. Troppi falte (falli) inutile ‘ncuollo a avverzarie girate e ‘mpusizzione ‘e campo appartata (defilata). ‘O cartellino russo ca se mmeretaje e s’abbuscaje cumpletaje ‘o cuadro niro d’ ‘a serata soja ca arresecaje d’affunnà ‘e cuane! BRITOS 6 Tutto summato ‘o meglio d’ ‘a difesa; nun me dispiacette pure si fuje ‘nu poco braduso ‘nfase ‘e ‘mpustazzione e quacche vvota se facette rimuntà a ll’avverzario. MESTO 5 Ancòra ‘nu passo arreto a ppietto ‘e ll’urdemi vvote.Nun arrivaje quase maje ‘ncopp’â linia ‘e funno e quanno lle capitaje mettette ‘mmiezo pallune ca nun servettono ê cumpagne suoje e nun preoccupajeno ô purtiere avversario. (dô 64° ZUNIGA 5 Piezzo e ppejo: ‘nu fullé adèspoto (un match anonimo) cu surtanto unu pallone miso ‘mmiezo e ppo ‘e solite garabbate (ghirigori) inutile e nniente ato!) BEHRAMI 5,5 Sbagliaje forze sulo quanno dinto a ll’ uccasione d’ ‘a rredda svedesa nun ghiette appriesso a Danielsson(no),e se penzaje ca Aronica êsse fatto quaccosa... Ricuperaje tanti palloni, ma sparette ‘nfase ‘e ‘mpustazione doppo ‘nu primmo aione quanno fuje custretto a correre pure pe cchella mmummia ‘e Donadel(lo). DONADEL 4,5 Giraje a vvacante cuoncio cuoncio ‘mmiez’ô campo; nun facette jerre o amàrteme pecché nun ghiucaje mantenennose fora dô juoco senza cuntrastà ll’avverzarie o farese sentere ‘mpressione (in pressing). (dô 62° INLER 6 Nun facette cape d’angelo, ma currette diannemanno (smistando) pallune pure senza pigliarse particulari respunzabbilità;avastaje però ‘a presenza soja pe fà cagnà faccia ô Napule) DZEMAILI 6,5 Assaje agruppino (vivace) ‘nfra ê llinie, signaje ‘a rredda d’ ‘o vantaggio cuano cu ‘na bbella ggirata mettenno a ffrutto ‘na bbella jucata perzunale ‘e Cavani. ‘Mpusizzione ‘e trequartista riuscette meglio a accumpagnà ll’azziona ma sbagliaje quacche bassurero (suggerimento). (dô 75° HAMSIK sv Nun riuscette a ffà luce ‘nfase ‘e repartita e s’afflusciaje cu tutt’ ‘a scuatra). Dossena 5 ‘O vedette ripigliato allimmeno fisicamente, ma oramaje è n’ècchese jucatore e se vedette quanno ‘ndifesa facette cchiú ‘e’nu svarione e cquanno nun riuscette a mettere ‘mmiezo ‘nu pallone decente! VARGAS 6 ‘Nu passetiello annante a ppietto ‘e ll’urdemi vvote allimmeno pe quanto ricuardaje ‘o ggenio: se facette sèntere ‘mpressione (in pressing), fuje cchiú priciso ‘nfase ‘e bassurero (suggerimento) e capoteco quanno êtt’ ‘a ricunquistà ‘o pallone;Turina cu ‘nu miraculo lle levaje ‘a joja d’ ‘a rredda ‘ncopp’ a ‘na girata ‘a duje passe. CAVANI 7 Nun se ne po’ ffà a mmeno: da ‘na bbella jucata perzunale soja ‘ncopp’â mancina arrivaje ‘a rredda ‘e Dzemaili. Ce credette nfi’ â fine dànno ‘o cuntribbuto sujo a ttutto campo e risulvette ‘a pratica all’urdemo, all’urdemo quanno se jette a prucurà ‘nu sacrosanto ricore e ppo cu freddezza ‘o trasfurmaje mannanno ‘o pallone ‘a cca e ‘o purtiere ‘a lla. ‘A qualificazione d’ ‘o Napule è tutta soja. MAZZARRI 6 Pecché chi vence ave raggione e isso ajeressera vincette, pure sbaglianno a pusizziunà quacche ghiucatore... ‘A scuatra se mantenette a ggalla senza affunnà comm’era succieso cu ll’ulandese o cu ‘e russe â casa lloro. Fuje custretto a ll’arranqua a ffà trasí tre titulare, ma ‘o Napule arresecaje ‘e affunnà pe ll’ennesima atalossa negativa ‘e Aronica ca cunfermaje ‘e nun puté stà a ll’aldezza ‘e cierti cumpetizzioni. fine fuje Cavani a levarle ‘e castagne dô ffuoco e a risolverle ‘o prubblema.Cu tutto ‘a panca corta e scarza ch’isso vulette, ‘o Napule arrivaje â qualificazzione primma ‘e ll'urdemu fullé cu ‘o Psv quanno ‘o livurnese tenesse ll'uccasione ‘e dà spazzio a quacche guaglione comme Novotny,Uvini e peffino l’uggetto misteriuso El Kaddouri ca nfi’ a mmo nun ànnu truvato spazio, tanto po’ pure chiovere gnostia,cchiú nnera d’ ‘a mezanotte nun po’ vení! ‘A qualificazzione è ggià arrivata! Arbitro: Hategan 6 Troppo guaglione e troppo ‘ntrasiggente, ma – tutto summato – justo, assignaje ‘o ricore a ll’urdema azzione,(e nun saccio quant’ate ll’êsseno fatto...) e ghittaje fora a Aronica ca s’ ‘o mmeretaje mentre p’ ‘e cartelline jalizze nun purtaje bbuono ‘o cunto... E cu chesto ve saluto. Staveti bbe’ e si dDi’ vo’ ce sentimmo marterí ca vene, speranno ca ‘a Cagliari ‘e cuane ce purtasseno bboni nutizzie ! R.Bracale Brak

Nessun commento: