domenica 23 dicembre 2012

SIENA – NAPOLI 22.12.12 0 A 2!!‘A VEDETTE ACCUSSÍ

SIENA – NAPOLI 22.12.12 0 A 2!! ‘A VEDETTE ACCUSSÍ I’ ancòra nun ce pozzo credere guagliú... Ca ajere se jette a vvencere a sSiena, nun me pare ancòra overo. Ma pe furtuna ‘o pallone nun è ‘na scienzia esatta, è ttunno e po’ succedere comme succedette ajere ca ‘o Napule se purtaje tre ppunte â casa vincenno a ll’urdimi ddiece minute doppo ca pe tutt’ ‘o fullé nun êva fatto quase niente e doppo ‘nu primmo aione senza zuco e senza sale ca facette scennere ‘o llatte ê denocchie a tutta ll’affullata tribuna divano e me facette mannà tante ‘e chelli ghiastemme a Wallerettino Mazzarri e a tutte ‘e priparature atletiche d’ ‘e cuane vedenno ‘a scuatra luvarda senza idee, ‘ndebbuluta, moscia ‘int’ê ccosse, senza forza, senza ggenio e senza cegna..., guagliune ch’êsseno avuto correre e ca ‘mmece cammenavano a ccurto ‘e sciato e de forze... tanto ca i’ penzaje: Vuo’ vedé ca chiste, pure pe chesta jettatoria divisa bblu ca s’ànnu miso ‘ncuollo, oje me ‘ntossecano ‘e vermicielle a vvongole, ‘o mmussillo ‘e baccalà fritto, ‘o capitone cu llimone, aglio e llauro, ‘a spicula a ll’acqua pazza, ‘e vruoccole barise,e ‘nzalata ‘e rinforzo d’ ‘a viggilia? Pe furtuna ca me sbagliaje pure pecché, si ‘o Napule affannava e nun era crestiano ‘e vencere..., ‘o Siena pe parta soja scennette ‘ncampo jenne p’ ‘o quarto ‘e bullito e cu ‘a speranza ‘e purtarse ‘mpuorto ‘o zzero a zzero; e quanno ô prazzo (alla fine) ‘o Napule vincette fuje chiaro ca nun s’era arrubbato niente. Vincettemo e va bbuono accussí e si nun c’ êsseno levato ‘e duje punte famuse êssemo nchiuso ll’anno bisesto ô siconno posto ‘nchietta cu ‘a Lazzio a trentaseje punte... Vincettemo e va bbuono accussí, ma ‘a rencontra nun me piacette proprio. Ma ce âmm’ ‘a rassignà; mo comme a mmo cchiú ‘e chello ca sta dànno ‘o Napule nun ce po’ dà. Accuntentammoce ‘e fà ‘nu bbuonu Natale e ‘nu divertente urdemo ‘e ll’anno scialannoce cu pizza ‘e scarole, vermicielle a vvongole,mussillo ‘e baccalà fritto, capitone, spicula, vruoccole, ‘nzalata ‘e rinforzo, scioccele assurtite, struffole, stringhette, roccocò,lettere, sapienze, susamielle, mustacciuole e ppasta riale, tutto arracquato cu Fiano, Falanghina, Greco ‘e Tufo, Asprinio d’Averza e Code ‘e Volpe Lacrima Christi e aspettanno chello ca ce porta ‘a Bbefana/De Chiacchiaroniis, sempe ca se passa ‘na mana p’ ‘a cuscienza! Passammo ê ppaggelle e giacché stammo a nNatale voglio essere ‘nu poco cchiú bbuono e de maneca larga : DE SANCTIS s.v. S’êsse pututo pure stà â casa pe cchello ch’êtt’ ‘a fà e nun capette che cacchio tenette ‘a prutestà cu ‘e tifuse quanno jette sott’â curva a dicercene quatto... CAMPAGNARO 6 Fullé d’ urdinaria amministrazzione, poco ‘a fà e senza prubbleme. GAMBERINI 6 ‘O Siena se facette vedé dê pparte soje raramente e ll’ècchese viola passaje ‘na jurnata quase ésussa (tranquilla). Pe mme se facette n’affare a ppigliarlo pecché ‘o ggiuvinotto nun sulo è allicchetto, ma nun se fa ‘nu prubblema ‘e jucà a ddritta o a mmancina o ‘mmiezo accussí comme serve a mMazzarri. (Dô 67° PANDEV 7 ‘Assa fà â Maronna! Finalmente vedette n’ata vota ‘o jucatore ca me piace a mme; comme trasette ‘ncampo ‘a rencontra se scetaje, détte allerezza â manovra, comme sul’isso, quanno sta ‘nfromma, sape fà e nun ce scurdammo ll'aziona ‘e sfunnamento dint’â camma quanno se jette a prucurà ‘o ricore (sacrusanto!) d’ ‘a tranquillità.) BRITOS 6 Comme ê cumpagne ‘e reparto,jurnata ésussa. MAGGIO 6 Pe premiarlo d’essere truvato a ll’appuntamento cu ‘o pallone d’ ‘a primma rredda cuana, pecché p’ ‘o riesto ‘o guaglione è ancòra troppo ll’ombra d’ ‘o jucatore ‘e tantu tiempo fa e ddicere ca va a ttre è farle ‘nu cumplimento! BEHRAMI 6 Ô ssolito ce mettette cegna e sustanza. DONADEL 5 E nun ‘o pozzo trattà meglio; nun me piacette nè comme trancara (diga) nè quanno êsse avuto diriggere ‘o traffico, ca po êsse ‘a essere ‘o mestiere suĵo.Nun è mmanco ‘a caricatura ‘e Inlèr(ro) e se vedette. ZUNIGA 5 E manco a cchisto pozzo trattà meglio. Durante ô primmo aione aizaje porvera comme e cchiú ‘e ll’ate; a ll’arranqua sparette proprio nfi’ a cquanno Mazzarri nun decidette ‘e levarlo doppo d’averlo visto sparà ‘nu pallone ‘mmiezo â chiazza fora d’ ‘o campo. (Da ll’80° MESTO sv) Hamsik 5,5 E, p’ ‘a nervatura ca me facette piglià..., ll’aggiu trattato pure bbuono. Assente ‘ngiustificato pe tutto ‘o primmo aione,cumplessivamente jucaje forze ‘o peggio fullé d’ ‘a tempurata senza maje pruponerse o ‘nventà quaccosa e senza sfruttà ll’accasione ca lle capitaje quanno a ttu ppe ttu cu ‘o purtiere lle sparaje ‘a palla ‘ncuollo. Po,però doppo ‘nu tiro ‘e squina, s’arricurdaje d’essere ‘nu campione e decidette ‘e fà vedé ca ce steva pure isso jenno a recogliere ‘na palla praticamente perduta e mettennola ‘mmiezo addó Maggio se facette truvà pronto. Marekiaro purtroppo chist’è e téne chistu brutto vizzio ‘e jucà pochi minute pure si te po’ fà vencere ‘na rencontra jucanno trenta siconne. INSIGNE 6 Troppo ‘mpriciso, ògne tanto facette vedé ca tène ‘e cqualità cu quacche prucressione cunchiusa c u ‘mbomme ca mancajene sempe ‘o berzaglio. Âmm’ ‘a aspettà ca acconcia ‘a mira! Cumunque fuje ‘nfra chille cchiú periculuse; o allimmeno cercaje d’esserlo.Ascette stracquato (Da ll’ 85° EL KADDOURI sv) CAVANI 6 Ma sulo p’ ‘a freddezza e ‘a pricisione quanno tiraje ‘o ricore ca nchiudette ‘a rencontra, pecché – p’ ‘o riesto – ll’unica azziona cu ‘a firma soja fuje ‘na capuzzata dô lemmeto d’ ‘a camma, ca facette ‘a varva ô travesagno. Troppo poco p’uno comm’isso! Se facette nutà ancòra quanno (penzanno ca ‘o pallone fósse asciuto fora, ma nun era overo) ‘o pigliaje cu ‘e mmane; pe furtuna De Marco ‘o ccapette e nun ll’ammunette! All. Mazzarri 5 Ll’êsse miso cchiú ppoco..., ma stammo a nNatale. Certo si è ca chella vista ajere nun fuje, p’ ‘o Napule, ‘na bbella rencontra pure si fuje assaje lucrativa (redditizia) e ‘o livurnese se purtaje â casa ‘a vittoria ca ce vuleva pe nchiudere n’anno ca doppo quatto paccheriate ‘e fila steva addivintanno ‘nu pisadiglio (incubo). Arbitro De Marco 6 – Pecché stammo a nNatale, pe nun avé ammunito a cCavani e p’avé visto bbuono e ‘na vota assignato ô Napule ‘nu tiro ‘e squina ca fruttaje po ‘a primma rredda e n’ata vota siscato ‘o ricore pe falta ‘ncuollo a Pandev(vo) cauciato dint’â camma. E fermammoce cca. Ce sentimmo ‘a prossima vota , si Ddi’ vo’. Staveti bbe’! R.Bracale Brak

Nessun commento: