domenica 31 marzo 2013

TORINO – NAPOLI (30/03/13) 3 A 5!‘A VEDETTE ACCUSSÍ

TORINO – NAPOLI (30/03/13) 3 A 5! ‘A VEDETTE ACCUSSÍ Alleluja, alleluja guagliú! E che fullé ‘ncredibbile ajeressera ô Cumunale ‘e Turino! Fenette ‘ngrolia sissignore, ma stettemo ‘mpreoccupazzione nsi’ a ll’urdemo e ce facettemo tutt’ ‘a Divina cummedia cu ll’inferno ‘e vederce superate ‘ncopp’ô tre a ddoje, ‘o purgatorio d’ ‘o pareggio cu ‘a terza rredda ‘e Dezmaili primma ‘e arrivà ô Paraviso d’ ‘e ddoje rredde finale ‘e Cavani ca ce facetteno tuccà ‘o Cielo cu ‘nu dito rijalannoce n’uovo ‘e Pasca cu ‘na surpresa pulitelica (preziosa) ‘e tre ppunte ‘mpurtante pe difennere ‘o siconno posto piazzannoce a 59 punte dduje ‘a cuollo ô Milàn(no), surpresa pulitelica ca nce cunzentette ‘e nun ce ‘ntussecà fellata, casatiello, tòrtano e crapetto. Ma ‘ntribbuna divano se sufferette e cquanto e cchiú d’uno dicette ca pe ‘nu fullé ‘e pallone uno nun se po’ arruvinà ‘e stefaniose (le coronarie) e e mmeglio ca a ggiugno De Chiacchiaroniis & socie ce fanno ‘nu scuatrone ca nun ce fa sufferí oppure fullé ‘e pallone nun ce ne vedimmo cchiú e turnammo a ffarce ‘o scupone scientifico futtennoce d’ ‘o Ciuccio e de tutte ‘e preoccupazzione ca nce dà! Passammo ê ppaggelle. ROSATI 5 Quanno ‘nu purtiere scenne ‘ncampo sempe preoccupato ca à dda dimustrà si e cquanto vale è cchiaro ca va ‘mpaura e ppo’ smarrunà o nun rennere pe cchello ca putesse. Cumminfatte ajere pure nun essenno chiammato a ffà cape d’angelo, nun dètte nisciuna sicurezza, dimustranno ‘e nun starce cu ‘a capa e de nun crederce manco isso ‘e valé quaccosa:’ncopp’â rredda ‘e Barreto, ca nun signava dâ lava d’ ‘o seje, se facette ‘nfilà comme a ‘na quaglia doppo d’essere stato a gguardà, senza fà niente, comme ‘e suoje se ‘ncasinavano senza riuscí amenà ‘ntribbuna ‘o pallone; ô finale ascette periculosamente dê pale senza nisciunu mutivo... Spisso po fuje assaje ‘mpriciso pure quanno êtt’ ‘a puggià ( rilanciare).Se vede ca s’allena cu De Sanctis e sse sape ca chi s’ ‘a fa cu ‘o zuoppo... ‘ncap’ ‘e ll’anno ceca e zoppeca! GAMBERINI 5,5 Nun facette gruosse sfregazze (sbavature), anze spisso risulvette situazzione bastantamente periculose. Partecipaje , però, ô festivàl(lo) d’ ‘e fessarie disastrose ‘ncopp’â primma rredda turinista. CANNAVARO 4 ‘O pallone nun è mestiere suĵo, soprattutto quanno penza ‘e fà ‘o Krol!‘O Napule sufferette assaje centralmente. Santana ô pprincipio d’ ‘o fullé poco mancaje ca nun lassasse ‘o signo;pure isso partecipaje [‘a prutacunista] ô festivàl(lo) d’ ‘e fessarie disastrose ‘ncopp’â primma rredda turinista, rummanenno nchiummato ‘nterra senza zumpà e facennose superà ‘e capa ‘a ‘nu si’ pochiello ca mo nun m’arricordo comme se chiammava. Jette a ddà ‘mpiccio annante e lle riuscette ‘e ‘ncarrà ‘na bella rovesciata, ma senza frutto cosa ca però nun avasta a salvarne ll’atalossa (prova).scadente. BRITOS 3,5 Serata no ‘e ll’ècchese bolognese. Overo ca rientraje ‘a n’ accidente (infortunio), ma chesto nun ‘o ggiustifica. Cumbinaje cchiú ‘e ‘nu pasticcio sia ‘ncopp’â primma rredda turinista ca cca e lla doppo e soprattutto s’addurmette cu ‘a zizza ‘mmocca ‘ncopp’a ll'inzerimento ‘e Meggiorini ca jette a vvedé ‘e che panne vestesse Rosati e ‘o truvaje annuro, signanno ‘na rredda ch’êsse pututo custarce caro. Faticaje a ttené ‘o passo ‘e Cerci ca spisso ‘o facette abballà ‘ncopp’ô tammurro e spisso se facette ncuccià fora pusizziona. (da ll’80° ARMERO 6,5 Chisto è ‘nu granne jucatore! Partette subbeto assaje forte sfunnanno quanno vulette ‘ncopp’â curzia ‘e mancina;reclamaje giustamente ‘nu ricore ca però ‘o zappatore Giannoccaro nun lle dètte. Cuntinuaje a ffà ‘a differenza nfi’ a ll’ajuda (all’assist) pennellata p’ ‘o 5-3 ‘e Cavani.) MAGGIO 6,5 Ajere turnaje a ffà ‘o treno e nno ‘o papunciello, dimustranno ca forze Mazzarri pe cchello ca rummane d’ ‘o campiunato po’ cuntà ‘ncopp’ a ‘stu jucatore turnato ê nivelle (livelli) ‘e ‘na vota appressuranno (spingendo) cu cuntinuità e assicuranno pure applicazzione difenziva. Ajere ‘e forza e de prepotenza se prucuraje pure ‘nu ricore ca êsse vuluto tirà Pandev(vo), ma ca Marekiaro pretennette ‘e tirà e pperò s’ ‘o facette parà. BEHRAMI 6,5 Solito luttatore tuosto e faticatore ‘mmiezo ô campo. Nun dètte rispiro ô centrocampo avverzario e ‘nzieme ô cunnazionale Dzemaili crinazzaje (ringhiò) diplastanno (raddoppiando) ‘ncopp’ê purtature ‘e palla turiniste. Peccato ca quacche vvota fuje troppo nervuso! HAMSIK 6,5 ‘Nu punto mancante pe bbia d’ ‘a puttanata fatta cu ‘o ricore ca nun vulette fà tirà a Pandev(vo),ma ca tiraje senza cegna (grinta) e ddicisione; rrobba ‘a pigliarlo a ppacchere, pecché ‘a fessaria fatta êsse pututo custarce cara…, ma p’ ‘o riesto ll’atalossa soja fuje assaje pusitiva p’ ‘o sviluppo d’ ‘a manovra e p’ ‘e ttante repartite (ripartenze) d’ ‘e cuane. Troppo bbella ll’ajuda cu ‘a coda ‘e ll’uocchio pe Dzemaili. DZEMAILI 9 ‘O prutacunista ca nun t’aspiette! Atalossa ‘ncredibbile d’ ‘o giuvinotto ècchese turinista; ‘nzieme a Bherami facette ‘o cane ‘e presa e se pigliaje tanti respunzabbilità ‘nfase ‘e reclaggia (impostazione) e ccomme si nun avastasse ce mettette ‘a jonta ‘e tre ttire ca fujeno tre rredde una meglio ‘e n’ata. Jucasse sempe accussí p’Inlèr(ro) fósse overamente tosta truvà posto ‘int’ô centrocampo ‘e Mazzarri. (da ll’86° ROLANDO sv) ZUNIGA 5,5 Nun riuscette a sfunnà maje ‘ncopp’â curzia mancina e s’êtte ‘a accuntentà d’accentrarse pe dialucà cu Insigne e Marekiaro. ‘A cosa cchiú bbella ll’ajuda a gghí arreto p’ ‘o 3 a 3 ‘e Dzemaili. PANDEV 7 Pronti via e se capette subbeto ca steva ‘nserata e soprattutto ‘o primmo aione, s’avasciaje a cullecà ‘e sezzione riuscenno a ghirsene ‘e capa dint’ô stritto,spiccecannose (districandosi) cu mestiere ‘nfra ll’ avverzarie. INSIGNE 5 Nun po’ fà ‘o centravanti! Facette sí tantu muvimento, ma nun riuscette maje a appiccià ‘na trezziola e spisso fuje custretto a accentrarse nun pruvanno maje a zzumpà ll’ommo e perdenno cchiú ‘e ‘nu pallone ‘ncopp’â trecquarte. (dô 65° CAVANI 8 Venette trattato malamente ‘a Giannoccaro ca nun se rennette cunto ca, pe comme jettono ‘e ccose, ‘o zencariello tuccaje ‘e vraccio ‘nvuluntariamente, ma – ‘a campione qual’è – purtaje pacienza e ‘nchiudette ‘o fullé e ‘a pratica turinista ripurtanno ‘e suoje annante cu ‘na cagliosa pricisa e putente‘ncopp’a ‘na punizzione e cu ‘na ‘ncurnata justo ô 90° doppo d’avé mannato ô manicomio ‘e difenzure cercanno ‘a pusizziona cu nfente e controfente.) MAZZARRI 6+ ‘O Napule jucaje ‘nu granne fullé e cu tutto ‘e pputtanate d’ ‘a difesa, ‘nu ricore a ffavore sballato, n’ato nun avuto e uno contro ca nun ce steva, riuscette ‘o stesso a ppurtà â casa tre ppunte d’oro. ‘Nduvinata ll’idea ‘e tenerse ‘nfrisco pe ll’arranqua a cCavani,p’ ‘o mumento culminante; sballata chella ‘e fà jucà a bBritòs(so) e nno a rRolando mancanno Campagnaro. Azzeccata assaje ll’idea ‘e cuncedere fianza (fiducia) a Dzemaili ca rispunnette cu n’atalossa eccezziunale. Sperammo ca p’ ‘a difesa contro ô gGenoa se ‘mmenta quaccosa ‘e meglio ‘e chello visto a tTurino! l’arbitro GIANNOCCARO 5 Nun è nu granché e nun ‘o levo stima: dinto a 10 anne nun è riuscito a ddeventà ‘nternazziunale;putite figurarve ch’arbitr’è! Zappatore dint’â vita e zzappatore ‘mmiez’ô campo vedette sempe a utile suĵo, ma cchiú spisso ‘mmece ‘e vedé cecaje comme a cquanno mnun se rennette cunto ca Cavani êva tuccato ‘e vraccio ‘nvuluntariamente e lle siscaje ‘o ricore contro, comme pure nun cecaje a vvedé ca Zuzú era stato arrunzato a uno dint’â camma ‘e ricore e facette signo ‘e cuntinuà! Pe nun ddicere d’ ‘o ricore sballato ‘a Marekiaro ca s’êss’ avuto ‘a ripetere pe bbia ca ‘o purtiere turinista s’era muoppeto ‘na mez’ora primma d’ ‘o tiro e dduje o tre turiniste èrano trasute dint’â camma ‘e ricore. Cunchiudenno che putimmo dicere? Putimmo dicere ca chillo d’ajere ô Comunale ‘e Turino, comme spettaculo, fuje veramente ‘nu bbellu spettaculo ‘a ricurdà cu rimonte, surpasse, controsurpasse, ‘nu fullé cuntinuamente emuzziunante nfi’ ô finale ‘e 3 a 5 firmato ‘a ‘nu Cavani ca pure riturnato ‘a ‘nu stancante viaggio ‘ntercuntinentale nun deludette ‘e tifuse dimustrannose ancòra e ssempe ‘nu cannibbale d’ ‘a camma ‘e ricore. E sperammo ca ‘o Cielo ce ‘o mantesse sempe accussí! E cu cchesto ve saluto. Ve faccio tanti avuguri e ‘na Pasca santa, ggiujosa, suddisfatta, cu ‘na bbona saluta e... ssapurita e ca ‘o Cielo ce perdunasse e benedicesse a ttutte quante! E mmo jammo a festeggià cu ‘na pastiera àuta morbida, zucosa e ca nun fósse scarza ‘e zuccaro! Staveti bbe’ e si dDi’ vo’ ce sentimmo ‘a vota ca vene doppo d’ ‘o fullé cu ‘o gGenoa! R.Bracale Brak

Nessun commento: