lunedì 16 dicembre 2013

NAPOLI – INTER (15.12.13) 4 A 2 ‘A VEDETTE ACCUSSÍ.

NAPOLI – INTER (15.12.13) 4 A 2 ‘A VEDETTE ACCUSSÍ. Suddisfatto ‘e chello ca succedette ô san Paolo ajeressera , guagliú? Sí e nno!Sí pecché se vincette e nno pecché ‘e cuane cunsentetteno â scuatra ‘e Mazzarri ‘e signarce ddoje rredde... E che saciccio! A ll’ora d’’e ppastarelle ‘a juventussa êva chiammato vattenno ‘o Sassuolo pe cquatto a zzero e ajeressera ‘o Napule rispunnette asfardanno ‘a scuatra d’’o chiagnazzaro e lle cunzignaje, pur’essa, quatto bbabbà, ma se ne pigliaje dduje ‘e riesto e cchesto nun me piacette! ‘Nzomma fove amaro ‘o ritorno ‘e Mazzarri ô san Paolo:ô prazzo ‘e ‘nu fullé spetillante (alla fine di un macht spumeggiante ) ‘o Napule rinfurzaje ‘o il terzo posto, vincenno pe cquatto a ddoje; peccato pe cchilli jerre difenzive, soprattutto ‘e Maggio (e ppo ve dico...), pecché p’’o riesto ‘e cuane tenetteno sempe sotto cuntrollo ‘o juoco pure si ll’Interre sapette tené vivo ‘o fullé allimmeno nfi’ a ll’esazzione (all'espulsione) d’Alvarèzzo ô 26° ‘e ll’arrancua (della ripresa) e nfi’ ô difinitivo quatrisso (poker) schijato ‘nterra ‘a Cagliecònno 10 minute doppo. Higuaínno, Mertenso e Dzemailí signajeno ll’ati rredde d’’e patdrune ‘e case, ca – pe gghionta ‘e ruotolo – durante ll’ anattisa (recupero) se magnajeno, cu Pandèvvo, ‘nu ricore sacrusanto; Cambiasso e Nagatomo signajeno pe ll’interiste. ‘e fatte jetteno accussí: partette meglio ll'Intèrra ma fove ‘o Napule a purtarse ‘nvantaggio â primma accasiona, doppo nove minute : Nagatomo facette ‘nu repuzamiento curto (una respinta corta) ‘e capa e ‘o Pipita senza penzarce ‘a coppa ammullaje ‘na cagliosa cu ‘o pere ‘e mancina e ‘o fravecaje dint’â porta Handanoviccio ca a stiento vedette ‘e passà ‘o pallone! Da chillu mumento ll’Interra tentaje quaccosa cu Palacio e ccu Guarínno, ma nn ne ricavaje niente pecché ‘o Napule ‘ncontropiede fove assaje periculuso cuglienno ‘nu palo cu ‘nu granne tiro d’Insigne servuto da Higuaínno.Ma steva scritto ca ll’Interra pariggiasse e succedette ô 35° quanno Alvarèzzo mmitaje a ccarne e maccarune a Cambiasso ca lassato sulo ‘a Maggio a ccentro ‘e camma nun sbagliaje e facette uno a uno. Manco ‘o tiempo d’abbrazzarse ll’uno cu ll’ato ca ‘o Napule se purtaje n’ata vota ‘nvantaggio: Higuaínno lanzaje centralmente a dDzemailí ca dètte a Mertenso e cchisto ‘e primma ‘ntenziona ca dô lemmeto casticaje n’ata vota a Handanoviccio. ‘Ncapo ‘e pochi minute auto contropiede firmato ‘a Dzemailí ca mettette ‘mporta ‘o pallone repuzato (respinto) curto ‘a Handanoviccio doppo’na bbotta ‘e dritta ‘e Mertens. Ma ll'Interra nun mullaje e primma ca fernesse ‘o primmo ajone riuscette a arapí n’ata vota ‘o fullé: tiro-cruzzo ‘e Guarínno, Rafaèllo, povuru guglione,nun facette tutto chello ch’êsse avuto ‘a fà,Maggio s’addurmette n’ata vota cu ‘a zizza ‘mmocca e nNagatomo mettette ‘a firma soja sotto ‘o tre a ddoje.A ll’arrancua Higuaínno jette vicino a calà ‘o quatrisso (poker), ma Rolando ‘ncanna ‘ncanna ‘o stuppaje;Cagliecònno sfresaje (sfiorò) ‘a rredda ô 14°, pe ppoco po Guarínno nun apprufittaje ‘e ll’ennesima puttanata ‘e Maggio,e ppe furtuna subbeto doppo Rafaello fove dicisivo anticipanno a pPalacio (ajuda ‘e Nagatomo) ma soprattutto fermanno ‘a botta sicura ‘e Guarínno servuto ‘a Palacio.’O fullé cagnaje ô 71°: ll'Intèrra rummanette ‘ndiece quanno Alvarèzzo ne fove cacciato pe ddoppia ammunizziona;arrivate a ll’81° se nchiudette ‘a prattica quanno Insigne servette a Cagliecònno ca nun putette sbaglià cu ‘a parta spalancata annante e ffove ‘o quatto a ddoje ch’êsse pututo addeventà cinche a ddoje si ô 92° Handanoviccio nun avesse parato ‘nu ricore cuncesso giustamente ‘a Tagliavento pe ‘nu sgammetto ‘e Ranocchia a pPandevvo appena trasuto, ca vulette a fforza tirà isso ‘o ricore addó ca don Rafele êva ditto a mMaggio, capitano ca ll’êsse avuto ‘a tirà Insigne. Passammo ê ppaggelle: RAFAEL 5,5 Miezu punto mancante pecché êsse avut’ ‘a fà quaccosa ‘e cchiú ‘ncopp’â siconna rredda ‘e ll’Interra quanno ascette lassanno spalancata ‘a porta. Ma fove dicisivo anticipanno a pPalacio (ajuda ‘e Nagatomo) e soprattutto fermanno ‘a botta sicura ‘e Guarínno servuto ‘a Palacio. MAGGIO 5- Serata no d’’o capitano ca pure cumbattenno faticaje a ‘nterpretà ‘a parte d’’o difenzore: ‘ncopp’â primma rredda lassaje a cCambiasso libbero e ffranco a ccentro ‘e camma.Piezzo e ppejo ‘ncopp’â siconna rredda quanno s’addurmette cu ‘a zizza mmocca e se scurdaje cumpletamente ‘e Negatomo. ‘A pigliarlo a ppacchere pe ll’àmartema (erroraccio) fatta quanno lanzaje a gGuarínno ca pe furtuna nun n’apprufittaje FERNANDEZ 5,5 Miezu punto mancante pecché êsse avut’ ‘a accorgere ca Maggio nun steva ‘nserata ‘e ‘ncopp’â siconna rredda ‘e ll’Interra êsseavuto ‘a darle ‘na mana. P’’o riesto s’’a sbrugliaje a dduvere. ALBIOL 6 Facette sí quacche jerro (errore) ‘nchiusura, ma nun tenette respunzabbilità ‘ncopp’â ddoje rredde ‘e ll’Interra; ‘e cumpagne esterne ‘e reparto ‘o mettetteno ‘ndifficoltà cu ppallune cumpricate, ma isso truvaje sempe ‘a suluzziona adatta. REVEILLERE 5,5 Ll’aniello debbole d’’a catena ‘e mancina; dê pparte soje ll’interiste sfunnajeno sistematicamente pure pecché Insigne ll’ajutaje poco. (dô 91° PANDEV 5 Justo ‘o tiempo ‘e trasí, prucurarse ‘nu ricore, vulerlo tirà a fforza isso e sbagliarlo facennoselo parà e lassanno nguttuso a Lorenzigno ca ll’êsse vuluto tirà isso, comme aveva ditto don Rafele... ma ‘o macetone sbattette ‘e piede ‘nterra e facette pejo d’’e ccriature ‘e ‘na vota: “O ’o tir’io o me piglio ‘o pallone e mme ne vaco!” Me dispiace, ma à sbagliato assaje! Cheste so’ ccose ca nun se fanno!S’aspettasse ca don Rafele ‘o tira ‘e rrecchie) INLER 5 Tanta garbusezza (generosità)senza tirarse maje arreto, ma sbagliaje tanti, troppe bbassurere (suggerimenti), permettenno quacche repartita (ripartenza) ‘nterista. DZEMAILI 6,5 Bella atalossa (prestazione) d’’o giuvinotto cunnita dô tacco ca favurette ‘o doje a uno ‘e Mertens.Sempe pronto a raccurdà mediana e attaccante, fove presente addó servette e ttruvaje ‘o tre a uno sfruttanno ‘na respinta corta d’’ purtiere. INSIGNE 6,5 Quacche bbona jucata dâ mità ccampo a gghí annante; cugliette pure ‘nu palo ca sta ancòra tremmanno..., ma sufferette troppo ‘nfase difenziva. Nun riuscette a ddà ‘na mano a rReveié e don Rafele pe ffà trancare fove custretto a spustà a mMertenso ‘a chella parte a mmità d’’o primmo ajone. Avesse vuluto tirà isso ‘o ricore, ma Pandèvvo facette ‘o preputente e nun lle dette ‘o pallone! CALLEJÓN 7 M’aspettavo ‘e cchiú ma ‘o sette se ll’ammmeretaje; sbagliaje troppi bbassurere durante ô primmo ajone, ma se repigliaje a ll’arrancua quanno risultaje pulitelico (prezioso) pe ll’equilibbrio d’’a scuatra; asciuto Higuaínno nsi’ ô prazzo facette isso ll’artigliero (prima punta) e signaje ‘a rredda ca nchiudette ‘o fullé! MERTENS 7,5 ‘O meglio ‘ncampo!’Na perna ‘a rredda ca purtaje ‘o Napule ‘ncopp’ô doje a uno.ô ccuntrario d’Insigne, riuscette a mmettere cegna ‘mpressiona (nel pressing) e a ffà scattà ‘o contropiede. Suĵo ‘o tiro ca favurette ‘a rredda ‘e Dzemaili e addirittura sfresaje (sfiorò) ‘o cinche a ddoje.Ascette chiammannose ll’applavuso d’’o statio. (da ll’84° ARMERO sv) HIGUAIN 7 Da granne artigliero signaje ‘a rredda ca sbluccaje ‘o fullé e gghiucaje sempe p’’e cumpagne; poche attaccante teneno ‘a qualità ssoja dint’ê pasiglie (passaggi) e cchi nun me crede se jesse a gguardà n’ata vota comme fove e de chi fove ‘o lanzo pe Dzemaili ‘ncopp’â rredda ‘e Mertenso. Currette esaggeratamente pe ffà scattà ‘a pressiona (pressing) e ppe cuprí tutt’’o fronte uffenzivo e ascette stracquato. (dô 77° BEHRAMI 6 Trasette súbbeto ‘nfullé aizanno ‘a pressiona (pressing) e rallentanno ll'azziona ‘nterista.) BENITEZ 7 Solitu scenario ‘e ll’ urdimi fullé cu ‘a scuatra ca nun sbagliaje anfocua (approccio),jucanno a mmestiere e dànno ‘a ‘mpressione ‘e puté signà a qualunque mumento;purtroppo ddoje fessarie ‘e Maggio arresecajeno ‘e arruvinà ‘a serata ô san Paolo. Si me pozzo permettere ‘nu cunziglio: ‘on Rafele êsse ‘a piglià p’’e rrecchie a pPandevvo e ll’êsse ‘a mettere arreto â lavagna cu ‘o granone sott’ê ddenocchie: nun s’à dda permettere ‘e fà ‘o capuzziello cu Insigne e à dda stà a ssentere chello ca cumanna ‘o trainerro! l'arbitro TAGLIAVENTO 6 ‘O sapevo p’arbitro scadente e scamuso e m’aspettavo ‘e pejo, ma ajere guvernaje a dduvere ‘o fullé e nun mettette, nè llevaje! E fermammoce cca; ringrazzianno ‘o Cielo pe ccomme è gghiuta ce simmo priparato bbuono ‘o vernecale (stomaco) pe vermicielle a vvongole, mussillo ‘e bbaccalà , capitone,vruoccole bbarese, ‘nzalata ‘e rinforzo, roccocò, mustacciuole, cassatine, struffole ‘e scioccele sapurite.Ve faccio tanti avucurie p’’e ffeste ca stanno pe vvení e, si dDi’ ‘o vvo’ ce sentimmo â prossima vota! Staveti be’! R. Bracale Brak

Nessun commento: