venerdì 21 marzo 2014

NAPOLI- PORTO (20.03.14E.L.) 2 A 2 ‘A VEDETTE ACCUSSÍ

NAPOLI- PORTO (20.03.14E.L.) 2 A 2 ‘A VEDETTE ACCUSSÍ Niente ‘a fà, gugliú! Ajeressera ô san Paolo, ‘nnante a cinquantacinchemila tifuse, ‘o Napule nun riuscette a vvattere pe ddoje a zzero ‘o Porto e fenette cu ‘nu scunzulato pareggio pe ddoje a ddoje ca ce cacciaje fora da ll’E.L. facennoce mancà ‘o primmo tracuardo ‘e ‘sta tempurata (stagione) e llassannoce cu ‘o ttuosseco ‘mmocca soprattutto pecché ajeressera ‘o fullé (partita) ‘o jettajemo nuje e ‘o Porto nun s’arrubbaje niente facenno chello ch’êv’’a fà e sfruttanno a mmestiere dduje sfregazze (sbavature) d’’a mediana cuana e castigannoce visto ca, passate ‘nvantaggio cu ‘na bbella rredda ‘e Pandèvvo ggià ô primmo ajone, nun cumpletajemo ll’opera e nun fovemo crestiane ‘e sfruttà ddoje o tre granni accasione avute pe mmettere dinto ‘o pallone d’’o doje a zzero.E fove naturale ca avenno sprecato troppo, fossemo casticate dô Porto. Don Rafele, a bbocce fremme dicette: "Il calcio è così, perciò piace alla gente: una squadra che fa tutto quello che deve fare può uscire dalla competizione. Ma ripeto, dobbiamo essere soddisfatti. " Eh ‘o saciccio! I’ nun songo suddisfatto pe nniente, don Rafè! Pe mme ‘a scuatra nun facette tutto chello ch’êv’ ‘a fà..., pecché ‘a rredda d’’o doje a zzero ll’êsse pututa fà e ll’êv’’a fà.... Ma forze era scritto ca êv’’a passà ‘o Porto... Forze era destino e contr’ô destino ce se spezzano sempe ‘e ccorne! Passammo ê ppaggelle: REINA 6 Pe sittanta minute se guardaje ‘o fullé senz’essere maje chiammato ‘ncausa e nun tenette nisciuna sfarma (colpa) ‘ncopp’ê cunchiusioni ‘e Ghilàsso e Quaresma, ca tirajeno ‘mporta bbuono e llibbere e ffranche. HENRIQUE 6,5 Sciso ‘ncampo comme terzino, ‘o brasiliano rispunnette cu ‘na bbona atalossa (prestazione)Dê pparte soje nun se passaje; ‘nfase prupusitiva cercaje pure ‘a porta, ma sfurtunatamente nun ‘a truvaje. FERNANDEZ 6,5 Nun tenette nisciuna sfarma (colpa) ‘ncopp’a ttutt’’e ddoje ‘e rredde purtuchese e p’’o riesto nchiudette sempe a mmestiere, mettenno ‘a musarola a mMartinèzzo e dimustranno d’essere assaje crisciuto dê tiempe ‘e Mazzarri! ALBIOL 5,5 Miezu punto mancante p’esserse fatto truvà fora pusizziona ‘nnaccasione d’’a primma rredda purtuchese quanno Ghilàsso fove libbero ‘e avé ‘a palla e mmetterla dinto. GHOULAM 5,5 Pure a isso miezu punto mancante p’avé cuncesso troppo ‘ncopp’â curzia soja e pe nun avé strignuto centralmente ‘nnaccasione d’’a siconna rredda purtuchesa;p’’o riesto però quanno appressuraje (spinse) criaje sempe coccosa ‘e ‘mpurtante. INLER 6 Miezu punto ‘e cchiú pecché pe sittanta minute facette ‘na bbona atalossa vincenno cchiú ‘e ‘na sfita e smistanno pallune tassuse (veloci). Peccato ca doppo d’’a primma rredda purtuchesa jette ‘mmalincunia nsi’ a ffà ‘a bbella statuetta ‘nnaccasione d’’a siconna rredda purtuchesa ca ‘mparte tenette ‘ncopp’â cuscienzia. BEHRAMI 5 Scarzulillo anzicché no. Pe n’ora tenette bbotta, ma po sbracaje perdenno, soprattutto cu Martinèzzo, tante briche (duelli) e restaje pur’ isso a guardà comme Quaresma signaje. MERTENS 6 Accumminciaje bbuono jucanno ‘ntassezza (in velocità), ma calaje ô finale ‘e fullé e nun le riuscette ‘e farese apprezzà. Êsse pututo mettere ‘a firma sott’ô doje a zzero ô prazzo (alla fine) d’’o primmo ajone doppo n’ajuda (assist) d’’o Pipita, ma sbagliaje! Peccato! (da ll’ 83° CALLEJON 6 Sujo ll'ajuda (assist) p’’a rredda ‘e Zapata) PANDEV 6,5 Cu ttutto ca facette quacche pprano (errore), quanno se ‘mpussessaje d’’o pallone dètte sempe ‘a ‘mpressione ‘e puté fà nascere coccosa... Doppo d’avé ‘mmitato ô Pipita a ffarlo ll’ajuda jette a cunchiudere sbluccanno ‘o fullé. (dô 69° HAMSIK 5 Nun dètte ‘nu bbuonu cuntribbuto ô fullé trasenno proprio quanno ‘o Napule parette vicino ô doje a zzero accuntentannose ‘e stazziunà luntano dâ porta, aizanno inutile porvera.) INSIGNE 5,5 Pure essenno sempe prupusitivo ‘ncopp’â curzia ‘e mancina o dritta quanno s’’a scagnaje cu Mertènso, partecipaje pur’isso ô festivàllo d’’e prane (errori) cuane sotto porta. A ll’arrancua avette ‘na palla d’oro p’arrivà ô doje a zzero, ma s’’a facette fremmà cu ‘e piere ‘a Fabbiano. HIGUAIN 6,5 ‘A campione ll’ajuda ca mannaje ‘mporta a pPandèvvo; jucaje comme a ssempe p’’a scuatra avasciannose spisso pe llanzà ll’esterne. Straurdinario ‘o lanzo ca mettette a mMertens ‘nnant’â porta quanno ‘o bbelga se magnaje ‘o doje a zzero ô prazzo (alla fine) d’’o primmo ajone; pe pparta soja pur’ isso, ‘o Pipita, a ll’arrancua se magnaje ‘o doje a zzero, nun riuscenno a angulà ‘o tiro.(dô 78° ZAPATA 6 ‘Nu punto ‘e cchiú p’’a vé signato ‘a rredda d’’o pareggio e averce sparagnato ‘a scunfitta casalinca; p’’o riesto però fove ‘o solito matarazzo cu ‘e gghiorde!) BENITEZ 5,5 Me dispiace ma è accussí; ‘o Napule fallette ‘o primmo traguardo d’’a tempurata(stagione), senza ca don Rafele facesse coccosa p’adderezzà ‘a varca cammino facenno visto ca nun steva avastanno ca Pandèvvo se muvesse bbuono ‘nfra ‘e centrale purtuchese e vvisto ca, ‘mmece, fosseno troppe ‘e prane (errori) ‘nfase ‘e finalizzazzione.Difficile però dicere ch’êsse avut’’a fà don Rafele; forze avesse avuto fà jucà dô primmo minuto a cCagliècònno e tené ‘mpanca a Insigne.Ma oramaje è ffritto ‘o ffecato; è inutile chiagnerse ‘ncuollo i è mmeglio guardà annanze; tenimmo n’ati dduje tracuarde: ‘o siconno posto e ‘a coppa itaglia. I’ dico ca ce avessem’’a credere! Arbitro: ATKINSON (‘ngrese) 5 Comme acqua ‘e colonia, sapunette e deodorante niente ‘a dicere, ma comm’arbitro fove tutto scemo, caputianno ‘e falte (falli) e sparagnanno ê purtuchese cchiú ‘e ‘nu cartellino jalizzo (giallo). E cu cchesto ve saluto e si dDi’ vo’ ce sentimmo llunnerí doppo d’’o fullé cu ‘a Fiorentina ô san Paolo speranno ‘e puterve raccuntà bbelli ccose. Staveti bene! R.Bracale Brak

Nessun commento: