mercoledì 20 agosto 2014

NAPOLI –ATLETICO BILBAO prevío d’annata (19/8/14) 1 -1 - ‘A VEDETTE ACCUSSÍ

NAPOLI –ATLETICO BILBAO prevío d’annata (19/8/14) 1 -1 - ‘A VEDETTE ACCUSSÍ Finalmente ajeressera ce fovemo: s’accumminciaje a ffà seriamente cu ‘o fullé (match) d’annata ‘e prevío (preliminare) ‘e Ciampionsa e i’ me facette ‘a primma meza ‘ntussecata d’‘a tempurata (stagione) e ddico meza pecché fenette cu ‘nu pareggio e nno cu ‘na scunfitta ch’êsse pure pututo succedere visto ca ‘ntribbuna a ffianco ‘e DeLa nce steva chella faccia ‘e cestunia ‘e parrucchino-conte ca comme ‘o vedettemo ‘e cumparé, ‘ntribbuna divano ce sentettemo ‘o friddo ‘ncuollo penzanno a cche ggranne cestariello è ll’ècchese trainerro juventino, ca nun capettemo a cche ttitulo era venuto a felicitarce. Fenette cu ‘nu pareggio, [doppo ‘nu brutto primmo ajone e n’arrancua (ripresa) ‘nu poco meglio] addó, si Marekiaro, Insigne e Cagliecònno nun s’êsseno magnate cchiú ‘e ‘na rredda, ‘a tempurata (stagione) êsse pututo accummincià assaje meglio!Ma êsse pure pututo accumincià peggio si santu Pipita nun ce avesse miso ‘na pezza cu ‘na rredda capolavoro adderezzanno ‘o risultato ca s’era miso stuorto ô 42° cu ‘na rredda ‘e ll’ Atletico Bilbao. Pe ccuje a ‘stu punto è mmeglio guardà annanze speranno ca cu ’o fullé d’’o prevío ‘e ritorno ‘e miercurí vintisette, ‘o Napule se decide a ffà ‘o Napule ggià dô primmo ajone e nun aspetta ll’arrancua pe ffà capí ‘e che ppanne veste! Passammo ê ppaggelle: RAFAEL 6 ‘Ncopp’â rredda nun tenette sfarme (colpe), visto ca nun vedette ‘e partí ‘o tiro, cummigliato comme fove dê cumpagne e vvisto ca ‘o basco tiraje a bbotta sicura senza cuntrasto, libbero e ffranco.P’’o riesto cumplessivamente se facette valé pure si tenette ‘ncopp’â cuscienza ‘o peccato veniale ‘e n’asciuta azzardata. ‘Ncopp’a ‘stu guaglione però ce se po’ ccuntà comme dimostra pure ‘o fatto ca Dunga ll’à convocato a ddifennere ‘a porta d’’a nazziunala brasiliana. MAGGIO 5,5 Sufferette sempe quanno venette puntato ‘a Muniaín(no) e sSusaeta. Appressuraje (spinse) quacche vvota, ma dimustraje – purtroppo – ‘e nun tené cchiú ‘o passo d’’e tiempe bbelle; ll’età se fa sentí! ALBIOL 6- Jucaje cu ‘sperienzia e concedette poco a Aduríz(zo).Dètte ‘na bbona mana a cCulibbalí,ma êsse avuto nchiudere centramente ‘ncuollo ‘a Muniaín(no), e nun ‘o ffacette. KOULIBALY 6,5 Fisicamente ‘mpressiunante. Venette fora a ll’arrancua facennose vedé pure a ll’epata (in fase) ‘e platamiento (impostazione) pure si cu quacche liggiero sfregazzo (sbavatura); nun po’ ca migliurà. BRITOS 4,5 Fora ruolo, braduso (lento), ‘mpriciso e spisso cu ‘a capa dint’ê nnuvole.Tenette ‘ncopp’â cuscienza assieme a Insigne e ‘mparte cu Albiòl(lo) ‘a rredda d’’o Bilbao ‘nquanto ‘nnaccasione d’’a rredda spustannose verzo ll’esterno ‘mmece ‘e stregnere a ccentro pe cuprí, restaje a gguardà a dDe Màrcos(o) ca trasette e cruzzaje.Nun me spieco pecché don Rafele lle dà tantu spavo... JORGINHO 6 Media tra ‘o cinche d’’o primmo ajone e ‘o sette ‘e ll’arrancua quanno ‘o brasiliano se facette valé ‘e cchiú, pruvanno a urganizzà ‘o juoco; urtizzaje (verticalizzò) poco, ma quanno ‘o ffacette ce facette alliccà ‘o musso. ‘Ncumpenso ricuperaje tanti pallune. Sinamparco (comunque) po’ ffà ‘e cchiú pecché ‘e cqualità ‘e ttène! GARGANO 6,5 ‘A surpresa d’’a serata Se ‘mpignaje assaje nun tiranno maje ‘o pere arreto e ce mettette tantu muvimento..., ma p’’a qualità ll’âmm’’a lassà perdere: nun se ponno fà ‘e cutalette d’annecchia cu ‘a carne ‘e cavallo e sse vedette. CALLEJÓN 5 Me chiagne ‘o core, ma nun pozzo fà a mmeno; ajeressera nun fove isso: maje ‘nu fruvolo (guizzo), maje n’idea, pochi ‘nsertamiente (inserimenti),senza scurdarce ca sbagliaje quacche repartita (ripartenza) pe troppa presumenzia.Nun le perdunaje ca a ll’arrancua fallette n’accasiona retissanta (clamorosa)mannanno ‘o pallone fora doppo d’avé miso ‘nterra ‘o purtiere. Serata no! HAMŠÍK 5,5 Ô primmo ajone pe ddoje vote jette vicino a ssignà..., po calaje ‘e posa e sparette dô fullé (match); pure a ll’arrancua nun le riuscette ‘e piglià ‘a scuatra p’’a mana; comme si fósse appaurato ‘o vedette ca ggiraje a vvacante e nun cunchiudette niente! (Dô 77° MICHU 4,5 E ll’aggiu trattato! Tenette ‘ncopp’â cuscienza ‘nu prano (errore) sprupusitato:’ncopp’a ‘na palla a ddiece metre dâ linia ‘e porta a ccentro ‘e camma, sulo sulo libbero e ffranco, neh chillo ‘mmece ‘e tirà ‘mporta, lle mancaje ‘o curaggio e ‘a passaje ‘e lato sciupanno n’accasiona unica! Ma allora tu nun sî n’attaccante... tu sî ‘nu cacasotto!) INSIGNE 4 Era ‘a poco accumminciato ca Lorenzigno, lanzato centralmente a mmestiere ‘a Giorgigno, sciupaje ‘na granna accasione piscianno ‘o pallone a ccentro ‘e camma. Po, quacche vvota, pruvaje a ‘mmentà coccosa, ma se cunfermaje troppo liggiero,discuntinuo, senza saffeneja (lucidità) e poco dunato(incisivo).Nun parlammo ‘e ll’epata (fase) ‘e cupertura, quanno ‘a facette grossa: ‘nnaccasione d’’a rredda bbasca, parette ca vulesse mettere ‘o ssale ‘ncopp’â coda ‘e De Màrcos(o) currennolo appriesso pe tutta ‘a curzia, ma senza riuscirlo a ffermà. Nurmale ca ’o san Paolo quanno ascette ‘o subbissaje ‘e sische!. (Dô 60° MERTENS 7 Fósse trasuto primma! Cagnaje ‘a faccia d’’o Napule. Nun me dicite niente, ma pe mme ‘nu jucatore accussí nun po’ restà ‘mpanca: maje e ppe nisciunu mutivo! Spero ca ô ritorno scenne ‘ncampo ‘a titulare, comme se mmereta). HIGUAÍN 8 Luttaje comme a ‘nu lione; lassato sulo dê cumpagne ca nun ‘o cercajeno nè ll’assistetteno, s’allargaje, jenno a cercarse ‘e pallune; po, campione overo comm’è, ô 68° facette ‘na magaria (magía) ‘nventannose ‘nu capolavoro ca regalaje ‘o pareggio ô Napule e ‘a speranza p’’o ritorno. ‘Nu poco cchiú ttarde avette ‘accasione ‘e fà ‘a siconna rredda, ma ‘o purtiere basco – a mmazzo – riuscette a ffermà ‘o tiro. Che peccato! BENITEZ 5,5 Me dispiace proprio, ma ‘sta vota nun pozzo proprio metterle ‘o seje a don Rafele. Fove furtunato ca ‘o Pipita cu ‘na jucata ‘a campione lle levaje ‘e vverole (castagne) dô ffuoco, ma nun ‘a po’ ttirà troppo ‘a corda: Britòs(so) a mmancina dint’a ‘nu fullè comme a cchillo d’ajere, è ‘na jastemma e nun se po’ mettere ‘ncampo Insigne e nno a mMertens(o) nemmeno pe ffà ‘nu favore a DeLa... Ora mo don Rafele s’à dda scurcià m’e mmaneche pecché ô vintisette a Bbilbao serve ‘na ‘mpresa cauzante! E cu cchesto ve saluto e ve dongo appuntamento, si dDi’ vo’, â prossima vota ca, si aggiu fatto bbuono ‘e cunte, avesse ‘a essere ggioverí vintotto ! R.Bracale Brak

Nessun commento: