lunedì 1 settembre 2014

GENOA – NAPOLI (31/8/14) 1 A 2!!! ‘A VEDETTE ACCUSSÍ

GENOA – NAPOLI (31/8/14) 1 A 2!!! ‘A VEDETTE ACCUSSÍ A ll’urdemo, ‘ncanna ‘ncanna guagliú..., ma ce riuscettemo!Ajere ‘o Napule riuscette a avé raggiona d’’o gGenoa pure si succedette sulo ô 95°.Ma siccomme ‘e cunte se fanno sott’ô lampione ‘e fullé (partite) se ponno vencere pure a ll’urdemu siconno, ‘o ‘mpurtante è vvencere. E se vincette purtannose â casa ‘e tre ppunte guagliú e accummincianno accussí cu ‘o pere justo ‘o campiunato. E cu ssuddisfazzione! Pecché, ‘o Napule êv’’a dà ‘na risposta â juve, â roma e ô milanno. E ce ‘a dètte! E mmenu male! Ca ddoppo d’’a scunzulata mazziata pigliata a bBilbao cu ‘o primmo fallimento d’’a tempurata (stagione) currente, tutte stévemo aspettanno quala reazziona êsseno avuto ‘e guagliune ‘e don Rafele. E fove bbona e ce lassaje ‘a vocca bbona a nnuje e ppure ê crifune visto ca ‘a premiata pasticciaria Benitèzzo, pe mmano d’’e dulciere cuane lle ‘ncartaje ddoje sfugliatelle [una riccia (doppo tre minute) e n’ata frolla ô 95°...]pe farle fà ‘na bbona dummeneca. Ll’unico ca nun lle piacetteno ‘e sfugliatelle e ca nun se divertette rummanenno a gguardà cu ‘na faccia ‘e cestunia vecchia ca s’aveva agliuttuta ‘na lacerta viva e s’‘a senteva ‘e fucechià dint’ô stommaco, fove Gasperini ca ‘nsi’ ô 95° se penzava ‘e avé fatto tridece fermanno ‘o Napule ‘ncopp’a ll’uno a uno. Ma s’era dato ‘nu bbruttu punio ‘mpietto e cquanno se n’accurgette fove tarde e nun se divertette;nuje ‘mmece ce divertettemo e ancòra ce âmm’’a divertí... Stammo sulo ô pprincipio! Passammo ê ppaggelle: RAFAEL 6,5 - Sarracinesca cchiú ‘e ‘na vota, nun ce putette fà niente ‘ncopp’â cabbesera (colpo di testa)’e Piniglia ca dètte ‘o pareggio ô gGenoa. P’’o riesto se facette sempe valé e ffove priciso pure quanno ascette. MAGGIO 5,5 Quacche cusarella ‘a facette vedé quanno accustaje (strinse) pe ddà ‘na mana ê centrale, ma dê pparte soje Marchese facette chello ca vuleva mettenno ‘mmiezo tanti pallune.Oramaje è ‘nu jucatore cuotto e appressuraje (spinse) poco e nniente e cquanno ‘o ffacette nun cacciaje zuco. ALBIOL 6 - Tutto summato atalossa (prestazione) pusitiva pure si nun mancaje quacche sfregazzo (sbavatura) comme quanno nun ghiette a ddà ‘na mana a Koulibalí pe mmarcà a pPiniglia; ‘o fatt’è ca ‘o gGenoa attaccaje cu ttroppi uommene e ‘o centrocampo cuano nun dètte ‘na mana. KOULIBALY 5,5 – Ma sulo pecché, ‘ncopp’â rredda ‘e Piniglia se facette piglià ‘a n’attacco ‘e cannavarite acuta e nun riuscette a aizarse ‘a terra p’anticipà ‘o cileno. P’’o riesto però ‘o guaglione se facette valé soprattutto a ll’arrancua quanno spezzaje tanti repartite (ripartenze) d’’e crifune rossoblù. Ô finale cu ll'avverzario ‘ncuollo ce mettette ‘o fisico e riuscette a llanzà a mMertenso ‘ncuntrattacco (in contropiede). ZUNIGA 5 - Fove chiaro ca nun è ancòra a ll’arribba (al top), ma difennette cu ccegna (grinta) pure si cu quacche sfregazzo (sbavatura); ‘ncumpenso appressuraje (spinse) bastantamente. Lanzato a mmestiere ‘a gGiorgigno se facette stuppà dô purtiere; ô 95° però mettette ‘mmiezo ‘o lanzo ca cunzentette a dDe Guzmànno ‘e mettere dinto ‘o pallone cchiú ‘mpurtante: chillo d’’a nichessa (vittoria). INLER 5,5 – Tentaje spisso ‘o lanzo, ma facette troppi prane (errori) ‘e plantamiento (impostazione) ca facetteno ‘ncazzà ô Pipita. S’êsse avut’’a piglià quacche respunzabbilità ca nun se pigliaje e avesse avuto dà ‘na mana â trasera (difesa) soprattutto quanno Giorgigno nun ce ‘a facette cchiú. JORGINHO 5,5 - Bello assaje ‘o lanzo ca mettette ‘mporta a zZuniga ca però se facette stuppà ‘a Perínno.Faticaje bastantamente pe tutto ‘o primmo ajone pruvanno a appiccià ‘a luce; sufferette ô mumento ‘e patenza (in fase passiva), ma cuntinuaje a gghiucà ‘nsi’ a cche a ll’arrancua (ripresa)nun ce ‘a facette cchiú e abbiaje a ccammenà e nun me spiecaje pecché don Rafele nun ‘o sostituette. INSIGNE 5 Atalossa(prestazione) cchiú o meno pusitiva, soprattutto p’’o contribbuto all’ epata (fase) difenziva dànno ‘na mana a zZuniga pe ffrunteggià a Edenilsònno. Pesano però comm’ô cchiummo ‘e ddoje accasione sciupate annant’ô purtiere Perínno. Po dice ca uno ‘o piglia a ssische! (da ll’ 87° MICHU sv) HAMSIK 5 Nun ce simmo! Nun è isso, nun me piacette pe nniente; pe ttutt’’o fullè (match) cercaje ‘na pusizziona ca nun truvaje. Jucaje tanti pallune, ma senza zuco e ssenza ccunnimma. Ll’âmm’ ‘aspettà! (dô 74°DE GUZMAN 7 – Beneditto, beneditto! Quacche pallone diretto ‘ncopp’a ll’esterno e ppoco ato, ma ‘o capolavoro suĵo fove chillo ‘e truvà ‘a ‘nnserziòna (l'inserimento) a mmestiere ca valette ‘a nichessa (vittoria) cuana assaje ‘mpurtante e ppesante.) CALLEJON 6,5 - Ma sulo pe cchella rredda capolavoro ca ce dette ‘o vantaggio doppo tre minute; p’’o riesto però ‘o guaglione sta troppo ‘nterra fisicamente e cumm’infatte spisso lassaje sulo a mMaggio dint’a ll’uno contr’a uno. Pe gghionta ‘e ruotolo dê pparte soje partetteno troppi cruzze (cross) a ccentro. (dô 65° MERTENS 7 Ô ssolito, trasenno dâ panca, ll’arillo belga furnette ‘na granna atalossa (prestazione) facennòse valé ‘ncopp’ê curzie, sfresanno (sfiorando) ‘a rredda ddoje vote e mmannanno ô manicomio ‘a tràsera ‘e Gasperini.) HIGUAIN 6,5 – Eparco (leader) ‘ncuntrastato e gghiucatore overo, â primma accasiona pennellaje n’ajuda (assist) pe Cagliecònno ca ‘ncapo ‘e tre minute dètte ‘o vantaggio ê cuane; sfresaje ‘o dubblato (raddoppio) a ll’arrancua e gghiucaje sempe cu ccegna(grinta) e bbulèima (determinazione) mullanno sulo a ccose fatte! BENITEZ 6 - De Guzmànno lle levaje ‘e vverole dô ffuoco salvanno tutto cosa; ‘o Napule partette assaje bbuono, ma ll’avesse avut’ ‘a chiudere assaje primma senza subbí ‘o ritorno d’ ‘o gGenoa; ‘a scuatra dimustraje assaje carattere dinto a ll’urdemu quarto d’oro decisa comm’era a vvencere, ma don Rafele à dda ancòra faticà pe ppurtà ‘ncundizziona a mMarekiaro, a cCagliecònno e a cquacche ato ‘e centrocampo e soprattutto pe risolvere ‘o prubblema d’’a tràsera (difesa) ‘ncopp’ê tire ‘e squina (d’angolo) e cchille ‘e ll’esterne ‘e tràsera (difesa) ch’ànn’ ‘a chiudere e accumpagnà senza farese piglià ‘mmiezo, comme purtroppo ‘mmece ajere capitaje quacche vvota. ll’arbitro BANTI 3 ‘e stima. Vecchia cunuscenza, ajere ‘mmece ‘e levarese quacche ddebbeto cu ‘o Napule, ne aumentaje ‘a ddosa. E cu cchesto ve saluto e si ‘o Signore ‘o vvo’ ce sentimmo â prossima vota, ca mo nun saccio ‘e priciso quann’è. Sinamparco (comunque) certamente doppo d’’a parentesi d’’a nazziunala tagliana ca nun ce ne fotte niente! Staveti bbe’! R.Bracale Brak

Nessun commento: