NAPOLI - JUVENTUS (11/01/15) 1 A 3 ‘A VEDETTE ACCUSSÍ

NAPOLI - JUVENTUS (11/01/15) 1 A 3 ‘A VEDETTE ACCUSSÍ Che disgrazzia, che sbentura! Chello ca nn’êva maje succedere, purtroppo succedette! Mannaggia a cchello ca nun se po’ ddicere, guagliú! Ajeressera ‘o Napule e cchillu tagliaperucchie ‘e Tagliavento (e ppo ve dico) foveno cacchie ‘e me ‘ntussecà ‘a serata e de nun fareme piglià suonno. Però me ll’aspettavo e mm’ ‘o ssentevo ‘e scennere pe ddereto ê rine ca fósse succieso e ca, perduta ‘a Supercoppa a Ddohà, ‘a zoccola janca e nnera fósse scesa a nNapule cu ‘o sanco a ll’uocchie e se fósse venuta a ppiglià ‘a rivincita cu ‘o ‘nteresse... E p’essere sicura ‘e ce riuscí se facette dá ‘na bbona mana ‘a chillu tagliaperucchie ‘e Tagliavento! E accussí ffove, mannaggia a cchello ca nun se po’ ddicere e fenette ca doppo quattordice anne Allegri e ‘a bbanda soja ‘e mariuole turnajeno a vvencere ô san Paolo purtate p’’a mano ‘a Tagliavento e ggiustamente De Chiacchiaroniis sbuttaje dicenno: "Ci siamo stancati! La Juve è una squadra forte, se è anche aiutata dagli arbitri diventa imbattibile. E' inammissibile che con 6 arbitri non si vedano 2 giocatori in fuorigioco. O è malafede o è incompetenza. " I’ dico ca è cchiú ll’una ca ll’ata! Passammo ê ppaggelle: RAFAEL 6 – Ce mettette ‘na pezza ‘ncopp’a cCacerèsso ô primmo ajone (nel primo tempo) ma nun putette fà niente ‘ncopp’ê ttre stuche (gol) juventine.Nun avette pussibbilità ‘e farese valé. MAGGIO 4,5 – Atalossa loscia(prestazione opaca) a ddritta. Êsse avuto ‘a pussibbilità d’ appressurà (spingere),ma nun ‘o ffacette né accumpagnaje a dduvere a cCagliecònno.Tenette ‘ncopp’â cuscienza ll’avé lassato libbero e ffranco a pPogbà quanno ‘o francese signaje. ALBIOL 6 – Facette a spurtellate con Llorente e spisso vincette isso. Kalidou KOULIBALY 6 – Tutto summato fove ‘o meglio lla ddereto cuncedenno poco o niente a cchi capitaje dint’â camma (zona) soja. BRITOS 6,5 – Ll’urdema mez’ora lle fa abbuscà miezu punto ‘e cchiú, nun sultato p’’o stuco (gol) d’’o mumentaneo pareggio ma pe ttutte ll’ epicalusse (sovrapposizioni) tentate ‘ncopp’â fascia. P’’o riesto spisso facette cchiú ‘o centrale ca ‘o terzino. co GARGANO 5,5: Currette assaje pure si disurdinatamente, cauciannose cu ‘e centrocampiste juventine senza maje sparagnarese. ( da ll’ 83° ZAPATA 5: ‘Stu matarazzo ‘e sbreglie, sulo annante a bBuffonno, sbagliaje n’accasione dignificata (maestosa)lassannose cadé ‘nterra senza ca nisciuno ‘o tuccasse.E cche saciccio!) LOPEZ 6 – Bbona atalossa (prestazione) a centrocampo addó dètte sustanza, fisico e ‘o ppoco ‘e riggia pe ‘nu Napule assaje meno urdinato d’’o ssolito. CALLEJON 5,5 – Partette bbunariello facennose valé cu repartite (ripartenze) e ppressione (pressing). Però, doppo ‘nu bbellu diacunale salvato ‘a Chiellini ô pprincipio d’arrancua (ripresa), svapuraje e nun se vedette cchiú. (dô 73° GABBIADINI 5,5 – Se facette nutà sulo pe cchella faccella affilata ‘e muorto ‘e famma e ttutto summato ‘a primma asciuta soja nun fove pusitiva pure pecché giucaje tutto spustato a ddritta e ffove sempe custretto a rientrà ‘ncopp’ô pere mancino cu ‘o risultato ca Evra ‘o bbluccaje sempe.) HAMSIK 5,5: Una d’’e delusione d’’a serata: m’êsse aspettato assaje ‘e cchiú, mmece Marekiaro pruvaje a ggalliggià ‘nfra ê linie e ssulo quacche vvota riuscette a ttruvà ‘o spazzio pe ccivà (imbeccare) ‘e cumpagne. Peccato ca nun nascette niente ‘e ‘nteressante ‘a fora ‘e chillu bbassurero (suggerimento) pe De Guzmànno ca però ‘o sciupaje malamente. (dô 60° MERTENS 6,5: Trasette e ssúbbeto parette ca ‘o Naspule se scetasse e ccumminfatte ‘ncopp’ô primmo ‘nu tiro ‘e squina (corner) suojo arrivaje ‘o mumentaneo pareggio. Penzo ca ‘o belga se fósse mmeretato quacche mminuto ‘e cchiú ggià d’’o pprincipio! ). DE GUZMAN 5 – N’ ata delusione d’’a serata: partette a mmancina e sse magnaje ‘nu stuco ch’êsse pututo fà cagnà faccia a ttutt’’o fullè(match);don Rafele ‘o spustaje ‘ncopp’â trecquarte e cunchiudette poco e nniente. Fenette ‘mmediana e ffacette ancòra ‘e meno!Pecché tenerlo ‘ncampo? Misteri misteriuse! Gonzalo HIGUAIN 5 ‘A terza delusione d’’a serata i ‘a cchiú cucente!Luntano parente d’’o lione visto a Ddohà: luttaje poco e soprattutto nun se facette maje vedé ô mumento adatto; ll’unicu stico (spunto) arrivaje troppo tarde ô nuvantunesimo, ma Chiellini riuscette a mmetterce ‘na pezza devianno ‘o tiro. Troppo, troppo poco! All.: Rafa BENITEZ 6- Scunfitta adicósa (immeritata) pe ‘nu Napule ca forze nun fove lucente (brillante),ma ca nun perdette maje ‘a capa doppo d’’e vantagge juventine e ca tenette assaje ‘a lamentarese ‘e ll’arbitraggio a ssenso unico d’’o tagliaperucchie ‘e Terni.Forze don Rafele avesse avuto ‘a ggestiunà (gestire) meglio ‘a trecquarte e mme dètte ‘a ‘mpressione d’avé rialata pe n’ora ‘a curzia ‘e mancina â zoccola janca e nnera! Peccato! arbitro TAGLIAVENTO 2 Ne facette cchiú ‘e mazzoleni a pPichino e accumpagnaje p’’a mana ‘a zoccola janca e nnera ‘nsi’ a cche nun vincette! Sentiteme: ‘stu tagliaperucchie se facette mannà a ffà ‘nculo ‘a tre juventini cuntempuraneamente senza ammunirle e caccarne fora ‘nu paro ‘e lloro ggià ammunite; permettette ca chiellini sciaccato stesso ‘a ‘nu cumpagno suojo fósse mmerecato ‘ncampo senza farlo ascí dô terreno ‘e juoco e ttutto chesto mentre ‘o Napule attaccava;nun siscaje ‘na punizziona contr’â juve pe ‘na palla pigliata cu ‘e mmane ‘a bbuffonno ‘ncopp’a ‘nu retropassaggio vuluntario ‘e père; nun vulette vedé dduje o tre juventini (‘nfra cuje Cacerèsso) ‘nnúrzo‘ecóse (in fuori gioco) ‘ncopp’ô siconno stuco (gol) d’’a juve urigginato ‘a ‘na punizziona ca nun ce steva pe bbia ca Britòsso êva tuccato ‘a palla cu ‘nu vraccio sí, ma sciulianno e cadenno e nno vuluntariamente! ‘O mmassimo però ‘o ffacette quanno annullaje ‘o stuco d’’o pareggio cuano quanno fove bbuffònno a mmenarese ‘ncuollo a Koulibalý perdenno ‘a palla dê mmane e nno ô ccuntrario! E ttutto chesto pe nun ddicere ‘e tutte ll’ammunizzione sparagnate ê delinquente cu ‘a maglia janca e nnera, cosa ca però oramaje fanno tutte ll’arbitre tagliane! Naturalmente però s’addunaje ca Zapata s’era lassato cadé ‘nterra senza ca nisciuno ‘o tuccasse. ‘Nzomma comme jette e ccomme venette â fine d’’a jostra ‘o Napule sciuliaje ô quarto posto ‘ncrassifica superata dâ scuatra d’’o pappavallo ‘e lotito ca mo ce aspetta a rRoma, dummeneca ca trase, all’ora ‘e ll’apritivo e sperammo ‘e nun sunnarce ‘nu bbruttu suonno.Accussí sperammo. E ccu cchesto ve saluto e ve dongo appuntamento, si dDi’ vo’ a llunnerí ca vene. Staveti bbe’! R.Bracale Brak