venerdì 23 gennaio 2015

NAPOLI – UDINESE (C.I. 22.01.1) 7 A 6 d.’e r. ‘A VEDETTE ACCUSSÍ

NAPOLI – UDINESE (C.I. 22.01.1) 7 A 6 d.’e r. ‘A VEDETTE ACCUSSÍ Cosa da nun credere, guagliú... eppure è accussí: è ‘na jastemma menata ca quanno vedimmo ‘na maglia janca e nnera âmm’ ‘a suffrí. E cchesto capitaje pure ajere a nnotte quanno ô san Palo, a sfidarce p’’a cunquista d’’o quarto ‘e finale ‘e Coppa Itaglia, sott’ ô patapato ‘e ll’acqua fove ‘e scena ll’Udinese ‘e Ramaccioni ca s’arrennette sulamente doppo d’ ‘e tire ‘a ll’unnece metre visto ca nun erano avastate cientovinte minute ‘e juoco tirato e affannuso nchiuso ‘ncopp’ô doje a ddoje. E ce jette ‘e lusso pecché doppo ‘nu bbuono primmo ajone, a ll’arrancua (ripresa) quanno ‘e cuane (azzurri) se scupretteno cercanno ‘o vantaggio, pigliajeno ‘nu stuco (gol) ‘ncopp’a ‘na repartita (ripartenza) ‘mpruvvisa e ttassosa (veloce) ‘e Teró.Da chillu mumento accuminciaje ‘a vera sufferenzia cu ll'Udinese capace ‘e nchiudere tutte ‘e spazzie; e accussí nce vuletteno ‘e tire ‘e ricore finale visto ca ‘o vantaggio cunquistato ‘a Marekiaro ô 99° fove apparato ô 114° ‘a Koné (ca evidentemente ce ll’ave cu ‘o Napule). Furtuna ca Andujarro (comme êva fatto Rafiluccio a Dohà contr’â juve) fermaje cu ‘a mana d’alisiento (richiamo) ‘o ricore d’Allanno e súbbeto doppo ‘o Pipita menaje dinto ‘o suojo cunzignannoce ‘o passaggio ê quarte! Menu male! Passammo ê ppaggelle: ANDUJAR 7: Quacche bbona asciuta e ssicuro ‘nfra ê pale Sulo ‘na ‘ndicisione (incertezza) ô primmo ajone; nun ce putette fà niente ‘ncopp’ê duje stuche (gol) d’’e janche e nnire; però po fermaje Aguirre ascenno ‘e corza fora camma e soprattutto paraje ‘o ricore finale d’Allanno . MESTO6,5: Miezu punto ‘e cchiú p’avé levato dâ porta nosta ‘na palla velenosa carambulata lla doppo ‘na meza fessaria ‘e Britòsso; p’’o riesto mantenette bbuono ‘a pusizziona ‘ncopp’â curzia ‘e dritta difennenno e quacche vvota attaccanno. HENRIQUE 5,5 :Facette ‘o ssuojo pure si mancaje ‘e velocità scennennose chianu chiano ‘e pressione; ‘a grossa sfarma (colpa) soja fove chella ‘e nun nchiudere ‘ncuollo a cKoné lassannolo libbero ‘e tirà. BRITOS 5,5: Ddoje fessarie grosse: una ‘ncuollo a Jaadí durante ô primmo ajone, e n’ata (ca c’êsse pututo custà caro) ô pprincipio d’’o primmo ajone ampliativo (supplementare) ncuollo a Aguirre. STRINIC 6: Priciso e puntuale ‘ncopp’â curzia ‘e mancina. GARGANO 6,5: Sempe agnanino (generoso) currette pe dduje cu ‘o curtiello ‘mmiez’ê diente; cercaje pure ‘a porta cu ‘nu tiro surprennente ca però sfurtunatamente centraje ‘o palo. ( dô 71°DE GUZMAN 6: Se dette da fá.) JORGINHO 6,5: Chiammato ddoje vote ‘ncopp’ô dischetto dimustraje freddezza e ppricisione; p’’o riesto ricamaje a ppuntaggiorno a ccentro campo. GABBIADINI 5,5: Quacche cusarella, ma s’à dda aspettà ca trase ‘ncunfianza (confidenza) cu ‘e cumpagne ‘e sezziona (reparto). ( da ll’ 83°CALLEJON 6: Pruvaje a ccunní ‘a manovra ‘e sale e ppepe ) HAMSIK 6- Croce e delizzia! Quanno proprio poco mancaje ca nun lle chiammasse ‘e muorte pe ccomme nun steva jucanno, Marekiaro cacciaje fora ‘nu stuco (gol) ‘a sciantiglione (fuoriclasse). Bbuono pure ‘o tiro ‘e ricore. MERTENS 4: Aizaje porvera pe tutt’ ‘o fullè (match), senza maje dá sustanza a cchello ca faceva; accumminciaje malamente sbaglianno ‘nu ricore ô 4° minuto e fenette peggio ô 120° sciupanno ‘a palla d’’a pussibbile nichessa (vittoria). DUVAN 6: Se dette da fá, prucurannose dduje ricure e lluttanno a spurtellate cu ‘a difesa. (HIGUAIN 7,5, dal 5° s.t.s.: In campo nel finale, decisivo il suo rigore. 7.5) ALL. BENITEZ 6: Tutto summato, avette chello sperava d’avé, ma ‘a scuatra êsse avuto fá coccosa e cchiú e doppo d’ ‘o fullè(match), don Rafele nun ce ‘o mmannaje dicenno. E facette bbuono! arbitro: ORSATO 5,5 Finalmente ‘sta meza cazetta, ca p’’o ppassato teneva cchiú ‘e ‘nu debbeto cu ‘o Napule, ajeressera nun aumentaje ‘a ddosa! A ‘stu punto p’’e quarte ‘e finale a ffebbrajo avimmo uspità a ll’Interre ‘e Mancini e penzo ca putimmo turnà a vvencere. Allimmeno, accussí sperammo. E mettimmo punto cca. Mo torna ‘o campiunato e ssi dDi’ vo’ ce sentimmo marterí ca vène doppo d’ ‘o fullè(match) cu ‘o gGenoa. Staveti bbe’! R. Bracale Brak NAPOLI – UDINESE (C.I. 22.01.1) 7 A 6 d.’e r. ‘A VEDETTE ACCUSSÍ

Nessun commento: