lunedì 9 febbraio 2015

NAPOLI – UDINESE (08/02/15) 3 A 1 ‘A VEDETTE ACCUSSÍ

NAPOLI – UDINESE (08/02/15) 3 A 1 ‘A VEDETTE ACCUSSÍ Tutto a pposto, guagliú! Tutto a pposto. Ajere ô san Paolo a ll’ora d’ ‘o diggestivo nce attuccaje ‘e vedercela cu ll’Udinese ‘e Stramaccioni scesa a nNappule quasse pe ppigliarese ‘a rivincita d’ ‘a scunfitta ‘e gennajo passato quanno p’averne raggiona ‘e cuane êtteno aspettà ‘a lutteria d’’e tire ‘e ricore fenuta po sette a sseje pe nnuje. Ajere ‘mmece avastajeno ddoje brasciole ‘mbuttunate[una a ffirma Mertenso, ll’ata firmata Gabbiadini] e ‘nu sicchietiello ‘e sanguinaccio [utubbutto (autogol) ‘e Teró] pe ffà carnevale e nchiudere ‘a prattica mmettenno ô ssicuro tre ppunte. Cu cchesto però nun voglio dicere ca tutto filaje liscio comm’â seta. Addó?! Se sape: nuje simmo capace ‘e cumpricarce ll’esistenza a ppe nnuje. Cumminfatte chesto succedette pure ajere quanno, doppo d’essere passate ‘nvantaggio ‘e duje stuche, ce cumpricajemo ‘a vita cu ‘na fessaria targata Britòsso [capace ‘e farese trattené pe ‘na spalla e superà ‘ncorza ‘a Teró] e soprattutto marcata Rafiluccio ‘o prevetariello ca ascette a scàmpule ‘e mele cotte facennose ‘nfilà dô francese ca rimettette ‘ncorza ‘a scuatra ‘e Stramaccioni. Pe ffurtuna però all’arrancua (ripresa) fove ‘o stesso Teró a ddevià dint’â porta soja ‘na timmurría (punizione) ‘e Mertenso rimettenno ‘e ccose a pposto e nchiudenno ‘a prattica ‘ncopp’ô tre a uno. Peccato ca pe pparta lloro juve e rroma vincetteno pure lloro lassanno ‘ncrassifica ‘e ccose comme steveno primma ‘e jucà. Passammo ê ppaggelle: RAFAEL 5,5: Miezu voto ‘e cchiú pecché si nun lle pozzo perdunà chell’asciuta a bbienetenne ca favurette ‘o stuco (gol) ‘e Teró, nun me scordo ca poco primma êva deviato ‘ncopp’ô travesagno (traversa) ‘nu tiro d’Allànno e ca a ll’arrancua(ripresa) paraje ‘na cunchiusione difficile ‘e n’ato ca mo nun me ricordo ‘o nomme! MAGGIO 6: Meglio a ll’epata(fase) difenziva ca a cchella uffenziva, ma, tutto summato, meglio d’ati vvote! ALBIOL 6,5:Atalossa (prestazione) senza sfregazze (sbavature) o fessarie periculose,mantenenno auta ‘a linia difenziva e permettenno poco o niente ê jucature ‘e Stramaccioni e dànno ‘na mana a cchi n’avette nicessità. BRITOS 5,5: Miezu voto mancante pecché nun lle pozzo perdunà d’esserse fatto spustà e superà ‘a Teró ‘nnaccasione d’ ‘o stuco d’’o francese; p’’o riesto fove sempe attiento ‘ncopp’ê ppalle aute ca chiuvetteno dint’â camma (area) cuana. GHOULAM 6: Prubbabbilmente pecché era turnato ‘a poco dâ Guinea Equatoriale se dimustraje meno tellecariello (frizzante) d’’o ssolito ‘ncopp’â curzia ‘e mancina; sinamparco (comunque) cu quacche bbona cchiusura levaje ‘e vverole dô ffuoco â tràsera (alla difesa). GARGANO 6,5: Ancòra ‘na vota facette tutto chello ch’êv’ ‘a fà luttanno a ccentro campo contro a ttutta ‘a mediana cu ccegna (grinta) e ccuraggio ssenza maje fà ‘nu passo arreto. (Da ll’82°JORGINHO sv) INLER 5: Turnaje titulare doppo tanta panca,pe bbia ca Lopezzo steva ‘nfruenzato, ma sbagliaje ‘na cifra ‘e pallune pure facile. MERTENS 7,5: Bbella ll’epata (fase) uffenziva soja, assaje meno chella difenziva quanno êsse avuto dà ‘na mana a gGhoulàmmo e nun ‘o ffacette. Bello pure ‘o stuco (gol) ‘e ll’uno a zzero miso dinto ‘e mancina cu ‘a pricisione ‘e ‘nu cirujano (chirurgo);dê piere suoje partette pure ll’azziona d’’o dubblato (raddoppio) e ffove ‘a soja pure ‘a timmuría (punizione) ca mannaje dint’ê chiavette a tTeró favurennone ll’utubbutto (autogol) (dô 67° DE GUZMAN 6: Miezu voto mancante pecché si fove overo ca cu isso ‘ncampo ‘o Napule fove cchiú urdinato, è overo pure ca ll’ulandese, ancòra ‘na vota, sbagliaje ‘na cunchiusiona ‘a luntano sparacchianno fora.) Fósse ora ca se facesse riggistrà ‘a cunvergenza d’’e piere! HAMSIK 6,5: Geniale ll’urtizzo (verticalizzazione) pe gGabbiadini ca signaje ‘o doje a zzero.Po decidette ‘e jucà cchiú arretrato dànno ‘na mano lla mmiezo. GABBIADINI 7: Spisso s’adattaje a ffà pure ll’epata difenziva comme ‘nu terzino agghiuntato; signaje ‘nu bbellu stuco (gol), chillo d’’o doje a zzero [‘o siconno dinto a dduje fullé (gare) ‘a titulare]. (dô 55° CALLEJON 6: Dette ‘na mana ‘mpurtante annante e se sacrificaje pure a ll’epata difenziva.) Scennette ‘ncampo cu ‘o scarpino russo i ‘e ccazette velate; lle mancaje ‘na poscetta ‘e lamé pe gghí ‘ncopp’â Doganella o â Domizziana. HIGUAIN 6: Pure nun avenno fatto ‘na granna atalossa (prestazione) ‘o Pipita sulo cu ‘a presenza soja mettette ‘mpreoccupazziona ‘a tràsera (difesa) ‘e ll’Udinese; trasette però dint’ a ll’azziona ca sbluccaje ‘o fullè (match). ALL. BENITEZ 6,5: Prupunette ‘nu Napule d’attacco, ca me piacette; però doppo d’essere passato ddoje vote ‘nvantaggio, pe vvinte minute ‘o Napule sbandaje; pacienza! Contro a ‘na scuatra urganizzata comme ll’Udinese ce po’ stà. Chello ca cuntava era ‘e vencere e sse vincette pure cu ttutto ‘o rutizzio (turn-over) vuluto ‘a don Rafele ca nun facette piglià collera a nnisciuno.. arbitro DI BELLO 5 Quacche fessaria, ma nisciuna grossa fetenzia ‘a fora ‘e chella ‘e nun avé visto a tTeró ca, ‘nnaccasione d’’o stuco ‘e ll’Udinese, aveva strattunato e spustato a bBritòsso facènnose ‘o spazzio pe ssignà apprufittanno ‘e ll’asciuta sballata d’’o prevetariello nuosto. E cu cchesto ve saluto dànnove appuntamento,si dDi’ vo’, a dummeneca ca vene doppo d’’a trasferta ‘e sàpato a pPalermo addó nun se va a ffà ‘na passiata, visto ca ‘e ttruvammo ‘ncazzate p’’e papagne pigliate cu ll’Interre. Speriamo bbene. R.Bracale Brak

Nessun commento: