venerdì 20 febbraio 2015

TRABZONSPOR – NAPOLI [E.L.] (19/02/15) 0 A 4 ‘A VEDETTE ACCUSSÍ

TRABZONSPOR – NAPOLI [E.L.] (19/02/15) 0 A 4 ‘A VEDETTE ACCUSSÍ Ajeressera a Trebbisonda appuntamento p’ ‘o Napule cu’e sidiceseme d’ E.L.; e ‘a scuatra cuana scennette ‘ncampo contr’ê turche ‘ntenziunata a ddà cuntinuazziona â nichessa (vittoria) purtata ‘mpuorto contr’ô Swansea e ppe fà scurdà ‘a paccheriata pigliata a pPalermo ‘ncampiunato. E cchello ca s’êv’ ‘a fà, cchello se facette guagliú! S’êv’ ‘a vencere e sse vincette !E sse vincette largo, addirittura sbrasanno pe quatto a zzero! Eppure ‘o risultato fove busciardo pecché, a ccunte fatte sott’ô lampione, ‘o Napule êsse avut’ ‘a vencere pe ccinche o seje a zzero si sulo ‘o Pipita fósse stato cchiú ffurtunato i êsse mannato ‘mporta e nno ‘nfacci’ô travesagno (traversa) ‘na granna cunchiusione e ssi Mertenso nun êsse sprecato ‘nu ricore ca isso stesso s’era prucurato e ppo nun êsse sbagliato n’ata cunchiusione a ggiro. ‘Nzomma â viggilia, da cierti pennarule, ‘a scuatra d’ ‘o Tricchebballacchesporro o comme cacchio se chiamm’essa era stata presentata tipo ‘nu spavuracchio periculoso specie dint’ô campo suojo..., ma a mme – v’aggi’’a dicere ‘a verità – nun me parette proprio (forze pecché ‘o Napule specie ô primmo ajone jucaje troppo bbello) i ‘e cuane (azzurri) mme dètteno ‘a ‘mpressione ‘e fà ‘e vallo ‘ncopp’â mmunnezza. Meglio accussí! Passammo ê ppaggelle: ANDUJAR 6,5 – Acàbato (perfetto) quanno êtt’ ‘a ascí; pe tutto ‘o primmo ajone nun facette quase niente sfucannose cu quacche ghiastemma e a ccazzià ‘e cumpagne ‘e sezziona (reparto), ma fove bbravo ô pprincipio ‘e ll’ arrancua (ripresa) quanno riuscette a nchiudere diciso ‘ncopp’a ‘nu tiro ‘eZengìn(no), unica vera accasione criata dâ Tricchebballacchesporro o comme cacchio se chiamm’essa. HENRIQUE 6,5 – Nun surtanto ‘o stuco (gol) ca sbluccaje ‘o fullè (gara), ma pure tanta attenziona difenziva. ALBIOL 6,5 Serata tranquilla e guvernata a mmestiere mettenno ‘a musarola a cCardozo e diriggenno acàbatamente (perfettamente) ‘a trasera (difesa) e pigliannose ‘o lusso ‘e ll’ ajuda (assist) pennellato pe gGabbiadini! KOULIBALY 6 – Sbagliaje sulo sotto porta, ma isso è ddifenzore, no attaccante e sse po’ perdunà; sinamparco (comunque) ‘a chella situazziona sbagliata ascette ‘o stuco(gol) d’ Henrique. P’’o riesto tutto a pposto! GHOULAM 7 ‘O ggiuvinotto dimustraje ‘e stà ‘nforna passanno ‘na serata tranquilla all’epata difenziva (in fase difensiva); ‘ncumpenso appressuraje (spinse) custantamente a mmancina, ‘ntennennesela a mmestiere cu Mertenso. INLER 6- Cu ‘a fascia ‘e capitano ‘ncopp’ô vraccio furnette n’atalossa (prestazione) pusitiva e ssenza fà cape d’angelo o ricame a ppuntaggiorno smistaje ‘o pallone addó vulette.’O meno ce ll’aggiu miso pecché se facette ammuní trasenno da capraro inutilmente a mmità campo. GARGANO 6,5 N’ ajone sulo, ma jucato cu ccegna (grinta) e ggranna entàsa (intensità); ‘na vera trancara (diga) lla ‘mmiezo. Ascette pe ppiglià sciato.(Dô 46° D. LOPEZ 6 – 45 minuti senza strafà. Se mettette ‘mmiezo e facette ggirà ‘a palla cu ssemplicità. Chello ch’êv’ ‘a fà!) GABBIADINI 8,5 Suntriptico(Strepitoso)!Jucatore cumpleto, maturo, trasuto súbbeto dint’ê scheme ‘e don Rafele. Ajere facette arrecrià ‘e suoje nun sulo pe ccomme se sacrificaje difennenno, ma pe cchill’ajuda (assist) ô centimetro fatto ô Pipita, e ssoprattutto p’’o stuco (gol) fatto aggancianno ‘a palla a vvolo e cunchiudenno cu fforza e ppricisione. Quatto fullé (partite), quatto stuche (gol) Applavuso! DE GUZMAN 6 Facette ‘o ssuojo senza nisciuno acuto, ma pure senza fà fessarie o prane (errori) sotto porta pure pecché isso se mantenette ‘mpusizziona centrale i ‘o Napule sfruttaje ‘e ccurzie laterale. (Dô 69° CALLEJON 6 Trasette e cce pruvaje ddoje vote: ‘nu bbuonu fullè d’allenamento; da ‘nu tiro suojo nascette ‘o quatto a zzero ‘e Zapata. ) MERTENS 5,5 Atalossa (prestazione) quase pusitiva, ma ll’attocca miezu punto mancante pecché pure si se mustraje vivo, tellecariello (pimpante) e ppericuloso,comme v’aggiu ditto, sprecaje ‘nu ricore ca isso stesso s’era prucurato e ppo sbagliaje n’ata cunchiusione a ggiro. HIGUAIN 8 Quanno ave ll’uosemo d’ ‘o fullè (gara) ‘mpurtante , ‘o Pipita nun sbaglia maje e ajere ‘ncarraje quase tutto; certo ‘o stuco (gol) fatto recuglienno ‘o bbassurero (suggerimento) ‘e Gabbiadini fove semplice semplice, ma po ll’argentino mettette ‘mmostra tutto ‘o repertorio ‘e jucatore ‘e classe fatto ‘e sombrere, pallegge e ccorza mannanno ô manicomio ll’avverzarie soprattutto quanno se scartaje meza tràsera (difesa) e cunchiudette centranno ‘o travesagno (traversa).P’’o riesto fove sempe presente dinto a ttutte ‘e mmanovre ‘e chispanno (attacco) cuano.(Dô 79° ZAPATA 6,5 Trasette e ccunfermaje ‘e vedé ‘a porta comme a ppoche: unnice minute e ‘nu stuco (gol) ‘e lesteia [rapina]). ALL. Rafa BENITEZ 7,5 ‘Nu quatto a zzero tutto mmeretato;don Rafele azzeccaje tutto cosa festiggianno accussí ‘a cinquantesima nichessa (vittoria) cu ‘o Napule ca po’ gguardà luntano cu ll’E.L. arbitro BEZBORODOV 5,5 Miezu punto mancante pecché durante ô primmo ajone pe ‘na trasuta assassina ‘e Zengìnno ‘ncuollo a Henrique, nun caccaje manco ‘o cartellino jalizzo (giallo) addó ce fósse vuluto addirittura chillu lla russo diretto! E bbasta accussí. Cu cchesto ve saluto e ssi ‘o Signore ‘o vvo’ ce sentimmo â prossima vota, ca êsse ‘a essere doppo d’’o fullè casalinco ‘e llunnerí ca vene contr’ô Sassuolo. Staveti bbe’! R.Bracale Brak

Nessun commento: