venerdì 17 aprile 2015

WOLFSBURG – NAPOLI [E.L.] (16/04/15) 1 A 4 ‘A VEDETTE ACCUSSÍ

WOLFSBURG – NAPOLI [E.L.] (16/04/15) 1 A 4 ‘A VEDETTE ACCUSSÍ Che sbrasata ajeressera dint’â tana d’’e lupacchiotte terische, che sbrasata, guagliú! Nientemeno ca fenette quatto a uno p’ ‘e cuane! E i’ mo allora êsse’a essere stracuntento..., ‘mmece ancòra mo tengo ‘mmiez’ê diente ll’urdemu piezzo ‘e rezza d’’o core ca me sto’ rrusecanno d’ ajeressera mentre ‘na dimanna me martella: ma comme è stato pussibbile ca, ‘ncampiunato, ‘o Napule s’è ffatto surpassà nun sulo ‘a chella vecchia zoccola janca e nnera, ma pure dê profuche rumanise e llazziale? E ‘a risposta nun po’ essere ca una, chella ca ggià me dètte tiempo fa quanno screvette - si v’arricurdate – ca ‘e cuane (azzurri) ‘ncopp’ô campiunato e ‘ncopp’â copp’itaglia nce avevano miso ‘nu crucione e ppenzavano sulo a ll’E.L. Ma ‘sta cosa nun me piace, anze mo me sta venenno ‘nu suspetto cchiú bbrutto e cciovè ca quacche antraffa (partita) ‘e campiunato e cchella ‘e ricresso (ritorno) cu ‘a lazzio ‘ncopp’itaglia s’’e ssongo vennute... e cchesto me piace ancòra ‘e meno, ma ll’aggi’’a penzà pe fforza vedenno ‘o Napule d’ajere tassuso (veloce), compattato, micidiale ‘ncuntropiede,tuosto e ‘nsaluta luntano parente ‘e chillo mullacchione e guallaruso visto cierti vvote ‘ncampiunato... giacché ‘nun crero ca è avastato tenerle ‘ncastico ‘na semmana a ccarcioffele e ffelle ‘e carne pe farle cagnà e mmetterle ‘ncudizziona ‘e asfaltà ‘e terische dint’â tana lloro. Nunn’è ppussibbile; i’ jesse a ddà n’uocchie dint’ê cunte currente ‘e ognuno ‘e lloro... Ma nun ce facimmo ‘o sanco amaro, tanto (chi à avuto, à avuto e cchi à dato, à dato...) è inutile chiagnere ‘ncopp’ô llatte sbrummato (traboccato). Nun ce penzammo cchiú! Passammo ê ppaggelle: ANDUJAR 7 - Nun êtt’ ‘a fà troppi pparate, ma ddoje foveno ‘mpurtante: una durante ô primmo ajone ‘ncopp’a ‘nu tiro ‘e Schürrle,e a ll’arrancua (ripresa) n’ ata ‘ncopp’a ‘nu tiro ‘e Guilavogui. MAGGIO 7 - Ô pprincipio tartagliaje ‘nu poco, ma po se repigliaje e sse mettette a ccorrere comme ê tiempe bbelle; accumminciaje ll’azziona d’’o doje a zzero e ffove sempe prisente a ll’epata difenziva (in fase difensiva). ALBIOL 7,5 – Atalossa (prestazione) quase pantèlesa (impeccabile),tutta cegna (grinta) e ttecnica; sotto a isso a dDosto lle mancaje pure ll'aria pe rrisciatà. BRITOS 7 – Fove isso ca tenette allerta ‘a tràsera (difesa)cuana cu cchiusure puntuale ‘e pere o ‘e capa, quanno ‘o Wolfsburg s’affaccia dê pparte d’’a camma (area) nosta; ‘nu sfregazzo (sbavatura) sulo [ca però lle costa miezu punto] quanno lassaje sulo a Bendtnerro ‘nnaccasione d’’o stuco d’’a bbannera terisco. GHOULAM 6,5 - Comme a ttutta ‘a scuatra nun avette troppi prubbleme, difennette a mmestiere e se permettette pure quacche surtita uffenziva. David LOPEZ 6,5 Pruvaje a ppartecipà pur’isso ô festivàllo d’’o stuco, ma senza furtuna; p’’o riesto sulo ‘nu paro ‘e sfregazze (sbavature) senza cunsequenzie durante ô primmo ajone (nel primo tempo), po migliuraje passanno ‘e minute. Gokhan INLER 7,5 Eparco (leader) d’’o centrocampo cuano distribbuette a mmestiere ‘o juoco cu ttassezza (velocità) e ppricisione sbaglianno quase niente! CALLEJON 7,5 – Atalossa puliera (prestazione brillante),soprattutto ‘ncontropiede, ma pure sacrificannose a tturnà arreto.Cu ‘nu granne scatto rijalaje a mMarekiaro ‘a palla d’’o tre a zzero. HAMSIK 9 Finalmente isso! Cu ddoje perne e ‘n’ajuda fove isso ‘o prutacunista ‘e ‘na granna serata; ‘o trainerro d’’e lupe terische s’’o guardava e sse magnava ‘e pponte d’’e dete nun sapenno comme cacchio fermarlo; ll’arbardiglia (cresta) cuana nun sbagliaje ‘na mossa,prupunennose sempe comme punto ‘e bezzuco (riferimento) p’’e cumpagne ‘mpussesso ‘e palla (dô 75° GABBIADINI 7,5 Avette a ddisposizziona sulo ‘nu quarto d’ora, ma ll’avastaje pe ssignà ‘nu stuco ‘e capa e ppe ccogliere ‘nu travesagno (traversa) cu ‘nu tiro d’’e suoje, ‘a fremmo.) MERTENS 6,5 ‘Nu poco ciapúcero (arruffone) e quacche vvota se facette desiderà a ll’epata difenziva (in fase difensiva),ma fove isso ca cu ‘nu lanzo acàbato (perfetto) dètte ô Pipita ‘o pallone ‘e ll’uno a zzero! (dô 60° INSIGNE 7 Trasette súbbeto e bbuono cu ttanti ghiucate e ccu cchella pennellata ca Gabbiadini mettette dinto. ‘Nzomma Lorenzigno se facette apprezzà.) HIGUAIN 8,5 Miezu punto mancante sulo pecché se facette parà ‘na palla ‘a mettere dinto, ma p’’o riesto dimustraje overamente d’essere ‘e n’atu pianeta a ppietto ‘e tutte: cumpagne e avverzarie: signaje sbluccanno ll’antraffa (partita), facette signà e ffacette cacà sotto â tràsera ‘e casa semplicemente nturnianno p’’o campo. (da ll'86° HENRIQUE s.v.) All. BENITEZ 8 Fistiggiaje comme meglio nun puteva ‘o cumplianno suojo:doppo tanti ppulemiche ‘ncopp’ô futuro ca ll’aspetta,finalmente ‘na serata ‘a mettere ‘ncurnice: scigliette ‘e mettere a mMarekiaro e avette raggione, ma pure ‘o riesto d’’a scuatra se facette apprezzà. arbitro LAHOZ (Spa) 6 Niente ‘a dicere! E nchiudimmola cca. Ve saluto e si dDi’ vo’ ce sentimmo lunnerí ca vène speranno ca dummeneca jenno a cCagliari ‘o Napule ce facesse stà cuiete! Staveti bbe’. R.Bracale Brak

Nessun commento: