domenica 18 ottobre 2015

NAPOLI – FIORENTINA (18.10.15) 2 A 1 ‘A VEDETTE ACCUSSÍ

NAPOLI – FIORENTINA (18.10.15) 2 A 1 ‘A VEDETTE ACCUSSÍ Che suddisfazziona! Guagliú che granna suddisfazziona chella d’ajere quanno ‘mmerz’ê ttre dinto a ‘nu san Paolo, finalmente chino ‘e ggente, ‘o Napule vattette ‘a Fiorentina pure si sulamente pe ddoje a uno. Ma ‘a suddisfazzione fove granne pecché ‘a squatra cuana duranteô primmo ajone (primo tempo) sapette sufferí senza perdere ‘a faccia, dimustranno d’essere overo squatra matura e a ll’arrancua (ripresa) se dimustraje squatra zucarrona (cinica) capace ‘e casticà ll’avverzario â primma accasiona, accussí comme piace a Sarri.Pirciò mo nun stammo a ppelià e a ccercà lefreche: ‘a cosa ‘mpurtante fove ca s’avev’’a vencere e sse vincette cu ttutto ca ‘ntribbuna ce steva chillu cestariello ‘e giggino-uocchiestuorte e ‘mmiez’ô campo chella fetenzia cu ‘a nocca, ll’arbitro livurnese Banti, ca ce facette cchiú ‘e ‘na fetenzia. Ma ggiggino e bbanti s’êtten’ ‘a fà dint’ô prozo pecché doppo n’antraffa (partita) spettaculare,â scumpetura (fine) ‘e cuane triambusajeno (trionfarono) e cu Insigne e ‘o Pipita ce detteno ‘a suddisfazzione d’arrostere ‘ncopp’â furnacella ‘na fiorentina zucosa; e ppacienza, pacienza si ‘nfra ‘e duje stuche luvarde ( gol azzurri) nce fove ‘o mumentaneo pareggio ‘e Kaliniccio. Ripeto ca ‘a cosa ‘mpurtante fove ca s’avev’’a vencere e se vincette, comme tutte speravemo ca succedesse ‘nu poco pe sfatà ‘a facenna ca, doppo d’’e ssoste pe ll’antraffe (partite) d’’a nazziunala, ‘o Napule nun ne ‘ncarra maje una bbona..., e ‘nu poco pecché ce serveva ‘nu bbuonu efudío (viatico) pe ll’antraffa (partita) d’ E.L. ‘e ggioverí ca vene. E ppe ggrazzia d’’o Cielo avettemo ll’una e ll’ata. Passammo ê ppaggelle: REINA 7,5 Miezu zifo (voto) ‘e cchiú pe ttutta ll’ammuina ca facette comme a ‘nu capo-ultrà doppo ògne stuco luvardo (azzurro). Quanto a ll’atalossa (prestazione) ricordo ca fove antídruso (reattivo) durante ô primmo ajone (nel primo tempo) ‘ncopp’a Blaszcnunsaccioché[o commecacchiosechiamm’isso] e ddicisivo ascenno ncopp’a Kalinicccio a ll’arrancua (nella ripresa). HYSAJ 6.5 ‘Nu poco ‘ndifficultà durante ô primmo ajone (nel primo tempo) criscette a ll’arrancua (nella ripresa) accucchianno qualità e cquantità dint’ê ddoje epate (fasi). ALBIOL 6 Quase sempe priciso quanno ascette, ô pprincipio ‘e ll’arrancua ( ripresa). sfresaje ‘o stuco (sfiorò il gol) d’’o dubblato (del raddoppio). KOULIBALY 6.5 Miezu zifo (voto) mancante pecché si fove quase sempe puntuale dint’ê chiusure e ll’ancerche (anticipi) se perdette a Kalinicccio ‘nnaccasione d’’o stuco (gol) viola. GHOULAM 6– Poco prupusitivo,êsse pututo fà ‘e cchiú! ALLAN 7 – ‘O bbrasiliano sfuderaje ‘a solita atalossa (prestazione) ‘e corza e ccegna (grinta) senza farese ‘mpressiunà dâ trípela (palleggio) avverzaria; n’ato arbitro ll’êsse siscato pure ‘nu ricore a ffavore! JORGINHO 6 Quanno putette pruvaje a cumannà ‘e tiempe e se dette da fà pure a ll’epata(fase) passiva. HAMSIK 6,5 Jucaje cchiú lluntano dâ porta, risultanno ‘nu riggista agghiuntato e quacche vvote se facette vedé pure a difennere. CALLEJON 6– Pure si fove pulitelico (prezioso) tatticamente, ‘e cchiú nun le pozzo mettere pecché êsse pututo fà ‘e cchiú e sciupaje malamente ‘o doje a zzero cu ‘nu diacunale sballato. HIGUAIN 7,5 Ll’oro ‘e Napule spennette ‘o primmo ajone (primo tempo) a cuntrastarese cu ‘e tante difenzure viole e a gghiucà ‘e sponna p’’e cumpagne;a ll’arrancua ( ripresa) pe ffurtuna nosta, decidette ‘e vencere ll’antraffa (partita) e ‘o ffacette cu ll’azziona d’’o doje a uno! INSIGNE 7 Pe ttutto ‘o primmo ajone (primo tempo) fove poco cuncreto, soprattutto pecché ‘a tràsera viola nun le dètte’o spazzio nicessario pe ffà coccosa; ma ô pprincipio ‘e ll’arrancua ( ripresa) appena Tomoviccio le lassaje strata, n’apprufittaje mettenno ‘a palla addó vulette cu straurdinaria facilità.(dô 60° MERTENS 6 Sfurtunato! Doppo d’avé servuto ô Pipita ‘a scicca ajuda (delizioso assist) p’’o doje a uno,se nn’êtt’ ‘ascí doppo ‘nu scontro ‘e juoco; dô 78° EL KADDOURI sv). all. SARRI 6 Tutto summato ll’ atalossa (prestazione) d’ ‘a scuatra soja fove cunvincente, allimmeno pe ttutta ll’arrancua ( ripresa) doppo ‘nu primmo ajone (primo tempo) troppo esasperato tatticamente;’nu sfregazzo (sbavatura) sulo ca nun ce cunzettette ‘e tené ‘a porta acrata (inviolata); pacienza; se ne parla n’ata vota pecché doppo d’avé vinciuto contro a n’avverzario ncrifato, mo se po’ gguardà ô ffuturo cu cchiú cunfianza (fiducia). Allimmeno accussí sperammo. arbitro BANTI 3,5 Comme ve dicette nun parlo cchiú ‘e ll’arbitre; dico sulo ca fove ‘a solita vecchia mmunnezza cu ‘a nocca e si vulite sapé pecché spiate ô Pipita e a Allanno; i’ lle mecco sulo ‘o zifo (voto) e crediteme! E ccu cchesto ve saluto e ssi dDi’ vo’ ce sentimmo â prossima vota, ca si nun me sbaglio, êss’ ‘a essere viernarí ca vene doppo ll’antraffa (partita) d’ E.L. contro ô Midtjylland(o). Staveti bbe’! RaffaeleBracale Brak

Nessun commento: