JUVENTUS – NAPOLI (13.O2.16) 1 A 0

JUVENTUS – NAPOLI (13.O2.16) 1 A 0

‘A VEDETTE ACCUSSÍ

 

Tengo ‘o bbeleno fino a ‘mpont’ô musso  guagliù e ‘naq collera ‘ncuorpo ca mo chi sa’ quanno me passa e ssi me passa!Peché ‘a veco difficile ca me po’ passà visto ca  ajeressera a ll’ora  d’’o diggestivo [mentre conti carlo i ‘o riesto d’’a chenca soja ‘a facevano a pplissé a mmeliune ‘e spettature cu ‘a serata finala d’’o festiguallera ‘e sanremo]nujeaute ‘ntribbuna divano affullata ce ‘ntessecajemo vedenno  ‘o Napule scennere ‘ncampo ô jummerdummo stadium ‘e Turino  no pe ffà ‘o Napule e vvencere ‘a partita, ma   cu unu penziero ‘ncapo: chillo ‘e purtarese â casa ‘nu pareggio pe zzero a zzero ca ll’avesse cunzentito ‘e rrummané‘ncimma â crassifica tenenno  a dduje punte luntano ‘a vecchia zoccola,addó me  fósse piaciuto, comme pure fósse   stato pussibbile, ca ‘o Napule avesse jucato pe vvencere e  p’allungà  ‘o passo p’arrassarla cchiú assaje.Nun ghiette accussí purtroppo   e pp’o  dispiacere nuosto i ‘o piacere ‘e tanti cestarielle tirapiere ca ‘nternejano ‘a scuatra cuana (azzurra) ‘e nuoste riuscetteno a ffà chello ca Sarri ‘e vulette fà fa nsi’ a ll’88’ quanno chill’avanzo ‘e galera ‘e Zaza, trasuto ‘a poco ô posto ‘e Morata, lassato libbero ‘a Koulibalý, ca facette ll’unicu prano (errore) d’’a serata, riuscette a ffottere a rReina  cu ‘nu tiro dô lemmeto d’’a camma (area) pe gghionta ‘e rotolo spurcato da Albiollo! Cunchiusione? Nun ce fove cchiú ttiempo p’ adderezzà ‘a varca, succedette ‘o llutto e sse perdette malamente ‘a mamma ‘e tutte ‘e mméreche (battaglie). E mmo mo chi sa’ quanno me passa e ssi me passa ‘a collera ca tengo ‘ncuorpo pecché mo nun saccio si nce avastano ll’urdemi tridece mubbare (partite) ca mancano pe recuperà ‘o punto ca mo ce sparte dâ vecchia zoccola ca vincenno ce superaje   ‘ncimma â crassifica. Ė overo ca po’ succedere e accussí sperammo, ma penzo ch’era meglio fà ‘a parte d’’a lèpera e ffarese correre appriesso e nno ‘a parte d’’o cane e essere custrette a secutà ‘a vecchia zoccola. Passammo ê ppaggelle:

REINA 5,5  Miezu zifo (voto) mancante pecché si  fove subbeto pronto  ‘ncopp’a ‘nu tiro ‘e Cuadrado doppo dieci minute e ffove  presente pure ‘ncopp’ a ‘nu  tiro ‘e Marchisio e  ffove futtuto sulo   ‘a ‘na deviazziona d’ Albiollo, ma êsse  pututo fà meglio ‘ncopp’ô tiro ‘e Zaza, restanno fremmo a ccentro ‘e porta aspettanno ‘o pallone ca lle fósse arrivato ‘mbraccio, ‘mmece ‘e cercà ‘a parata a vvuolo d’angelo, cosa ca nun lle riuscette .

 

HYSAJ 6,5 - Affruntaje súbbeto  a pPogbà nun lassanolo passà, po facette  ‘nu nafaco  (tunnel) a Evrà ( ripetennose  cu pPogbà), e ‘nu sombrero a Morata; facette ‘nu  granne cruzzo (cross) p’’o Pipita, ma   Bonucci ll’intercettaje. Partette bbuono, a ll’arrancua  (nella ripresa) sballaje quacche cruzzo  (cross), ma dimustraje perzunalità.

 

KOULIBALY 5,5   Miezu zifo (voto) mancante pecché si  se facette apprezzà  pe ‘na scavallata  sciania (mostruosa) doppo cinchee minute, po fove custretto a  stennere a  mMorata che ll’ aggiraje facilmente;  chiammato cchiú ‘e ‘na vota â cupertura ‘ncopp’ a  Cuadrado,fove alicante e ssicuro a anticipà, ma sbagliaje proprio quanno nun êsse maje avut’’a sbaglià ciové a ll’88’  , quanno Zaza lle ggiraje attuorno tiranno e ssignanno.

 

ALBIOL 5,5 - Miezu zifo (voto) mancante pecché fove jellato cu cchell’inutile e smaledetta deviazziona ca futtette a rReina, pecché p’’o riesto s’’a vedette ‘e bbella cu mMorata o cu dDybala e  ffovessempe  pronto â chiusura quanno fove chiammato ‘ncausa. Pe nnun dicere d’’o tiro ca  bBuffonno salvaje  ‘ncopp’â  linia,quanno Orsato êva ggià siscato pe ‘na catà  (fallo) d’’o spagnuolo.

 

GHOULAM 5,5 Chiammato a vvedersela cu ‘nu bbrutt’accunto: Cuadrado, quacche vvote ‘o sufferette, ma ati vvote ‘o stuppaje. Uffenzivamente però nun se vedette quase  maje.

 

ALLAN 6,5 ‘A tarra  (sfida) cu pPogbà fove assaje jasada  (fisica),s’abbuscaje  quacche catà (fallo) quanno ‘o francese pruvaje  a anticiparelo e sse facette sèntere a ll’epata ‘e trancatura  (in fase di interdizione) e ddê piere suoje  nascette ll'azziona ca purtaje Hysaj ô cruzzo (cross) p’’o   Pipita; a ll’arrancua (nella ripresa) ascette mannucco (sfinito). (Dô 90' GABBIADINI sv)

 

JORGINHO 6  Turnaje ‘ncampo dô primmo minuto e ssúbbeto pigliaje ‘mmano ‘e rétene d’’o centrocampo cuano (azzurro),futtennose d’’a pressiona   (pressing) ‘e Dybala e dde Morata. ‘Nteliggente quanno nchiudette  ‘ncuollo ô spagnuolo juventino, tentaje ‘e farese ‘nu poco cchiú annante   perdennose però ll'argentino cu ‘a maglia a strisce ô lemmeto  d'’a camma (area);  fove però uno d’’e pochi  prane(errori), senza consequenzie  ‘e ‘na mubbara  (partita) aunesta perduta no ppe sfarma (colpa) soja!

 

HAMSIK 5 – Mabbalio (abulico) comme pochi ati vvote; ajeressera pe bbona parta d’’o fullè (match) quase sparette; certo pecché, guardanno ‘e ccifre, ‘e pasiglie (passaggi) ne sbagliaje cchiú dd’uno e annante se vedette poco o niente nsi’ a cquanno nun sparaje n’ inutile missile terra-aria ca ce facette ridere ‘ntribbuna divano!  

 

INSIGNE 5 – Partette cu  ‘na bbona  serpentina ‘e 50 metri ma ‘a palla p’’o Pipita fove  fora  cuntrollo. Po se stutaje e pp’ ‘o riesto pozzo reggistrà sulo quacche bbuonu rientro e ppoch’ ato ô pprincipio d’ arrancua (ripresa)pecché po sprecaje quacche fursa  (chance). [Dô 77' MERTENS sv - Quinnece minute ‘e  niente].

 

HIGUAIN 5 – Serata no d’’o Pipita presentateso cu ‘o biglietto ‘e visita ‘e vintiquatto stuche (gol)’int’a vintiquatte mubbare (partite) ‘e campiunato; ajeressera però[pure pecché avette poca assistenza dê cumpagne]  Bonucci e bBarzagli lle mettetono ‘a museruola; durante ô primma ajone (tempo)  nun tuccaje ‘nu pallone   ‘int’â camma (nell'area)janca e nnera e a ll’arrancua  (nella ripresa) ‘a situazziona nun migliuraje. ‘Na bbona accasione nce ‘a furnette  cu‘nu  granne cruzzo (cross) Hysaj, ma Bonucci ce ‘a luvaje cu ‘a ponta d’’o pere.

 

CALLEJON 5,5  Sacrificato assaje [pecché accussí vulette Sarri] a ll’epata difenziva  (in fase difensiva),lassaje sulo ‘o Pipita e ddint’â trecquarte

SARRI 5  Quanno se perde, ‘o primmo a pperdere e âvé tuorto è ‘o trainerro e ajeressera tuccaje a sSarri ca sbagliaje a lleggere ‘a mubbara (partita) esseno venuto ô jummerdummo stadiummo pe ppurtarese â casa ‘o zzero a zzero addó ca ‘o Napule êsse avuto fa ‘o Napule cercanno ‘e vencere e no accuntentannose d’’o quarto ‘e bullito ca, pe gghionta ‘e ruotolo, sparette a ll’urdemi dduje minute pe ‘na sciaurata deviazziona! E ttutto chesto ce custaje ‘o primmo posto ‘ncrassifica e a mme n’attacco ‘e fecato!

 Arbitro ORSATO 5  Nun me piacette; grossi fetenzie nun ne ce ne facette; ma durante ô primmo ajone, pe ppartito pigliato siscaje sempe a ffavore d’’a vecchia zoccola!

E  ccu cchesto ve saluto guagliú, ddannoce appuntamento, si dDi’ vo’,  a llunedí ca vene quanno [si ‘o Napule torna a ffà ‘o Napule] spero ‘e cuntareve cose bbone doppo d’’ a mubbara (partita) casalinca contr’ ô Milanno d’’o zingaro  Staveti bbe’!

 R.Bracale Brak