LAZIO -NAPOLI (03/02/16) 0 A 2

LAZIO -NAPOLI (03/02/16) 0 A 2

‘A VEDETTE ACCUSSÍ

 

Tengo ‘o core dint’ô zzuccaro guagliú; pure ajeressera a ll’Ulimpico ‘e Roma contr’â scuatra d’’o pappavallo ‘e Lotito, ‘o Napule se facette valé  cunquistanno ‘a settima nichemata (vttoria) ‘e fila  e cunfermannose, cu cinquantatré ppunte, ‘ncimma â crassifica mustanno ancòra ‘a targa â juve ca, pe pparta soja, apprufittanno ‘e ‘nu tuterma (autogol), riuscette a vvattere ‘o ggenoa. Pacienza; ‘o Napule tene ‘a forza i ‘o sciato ‘e fa ‘a lèpera e nnun lle fa paura ‘o mazzo scassato d’’a vecchia zoccola; anze i’ penzo ca ‘nfra ‘na dicina ‘e juorne – quanno ce attocca ‘e jí ô jummerdum stadium -  ‘o Napule lle va a ‘mparà ‘a crianza a ddomicilio. Accussí sperammo. Mo però turnammo a ajere e vvedimmo ‘e ppaggelle:

 REINA s.v., ma 6 ‘e cumpiacenza. S’êsse pututo purtà ‘a seggia sdrajo e ‘nu ggiurnale; nun êtte ‘a fa quase niente pe ttutt’’a mubbara (partita) e ll’unica  parata ‘a  facette  ‘ncopp’a  mMauricio, ma a gghiuoco fremmo.

 

 MAGGIO 5,5 Nun me piacette,Êsse avut’’a appressurà (spingere),visto ca avette spazzio p’’o ffà  ma nun ‘o ffacette. ‘Mpignato ‘int’ô finale ‘a Keità,spisso s’’o perdette.

 

 ALBIOL 6  Unu sfregazzo (sbavatura) ‘int’ a ttutta ‘a mubbara (partita), ma senza consequenzie. P’’o riesto facette valé tutt’’a sperienzia soja.  

 

 KOULIBALY 7 ‘O solito cummò cu ‘o specchio addó jetteno a sbattere tanti lazziale cadenno ‘nterra senza ca ‘o gialante(gigante) francese [ajeressera addirittura alicante] muvesse ‘nu muscolo.

 STRINIC 6,5   bBona atalossa (prestazione)d’’o biundino ca se ll’êtte ‘a vedé primma cu cCandreva ca quacche vvota ‘o superaje e ppo cu Andersonno ca sott’a isso facette palla corta.

 

 LOPEZ 6,5  Cratista (ottima) spalla ‘e Giorgigno. Defennette ‘e geometrie d’’o brasiliano mettennoce cegna (grinta) e irca (ritmo).

 

JORGINHO 7 - Solita riggia ‘nteliggente e urdinata. E cce mettette pure  ‘a justa cazzimma quanno, perdenno tiempo a arte,  se facette nutizzià (ammonire) da Irrati p’essere squalificato p’’a mubbara (partita) contro ô Carpi e pputé esserce prisente p’’a mamma ‘e tutte ‘e bbattaglie a tTurino contr’â vecchia zoccola janca e nnera.  

 HAMSIK 6,5  Ajere nun servette ‘e fà ‘o fenomeno o cose straurdinarie i ‘o capitano s’accuntentaje ‘e jucà priciso e ppulito senza esaggerà e nun sbagliaje niente. (da ll'89'  CHALOBAH s.v., ma 6 ‘e simpatia)

 

 CALLEJON 7,5  Pure ajere Peppe ‘a ‘nguenta, ‘o meglio d’’e suoje,  fove tutto n’atu jucatore a ppietto  ‘e chillo visto ô ggirone d’affarta (andata) cunfermannose jucatore ca nun se ne po’ ffà a mmeno soprattutto mo ca è tturnato pure a ssignà oltre a gguvernà ‘a fascia i a  ffà ‘o juoco ‘e cupertura dànno na mano â trasera (difesa).  

 HIGUAIN 7  Oramaje segna pure pe scagno: ‘e pietto, ‘e panza, ‘e scianco e ccu cchille d’ajere so’ vvintitrè stuche (gol) ‘int’a vvintitrè mubbare (partite), pe nun parlà d’’o sfizzio ca te dà vedenno comme ‘e trasere (difese) avverzarie s’’a fanno sotto sulo a vederlo accustarese ô lemmeto d’’a camma (area) ‘e ricore.(dô 71'  GABBIADINI 6 Trasette  quanno oramaje ‘o Napule  êva  diciso ‘e nun gghiucà cchiú e isso facette poco.)

 

 INSIGNE 6,5 Soprattutto pe cchillu lanzo p’’o stuco  (gol) ‘e Caglieconno, veramente digno ‘e ‘nu bbatallo (fuoriclasse). P’’o riesto, se facette sempe valé: campiunato ‘a capione cu ddiece stuche (gol) e ddiece ajuda (assist).  (dô 65'  MERTENS 6 - Vale ‘o stesso trascurzo ‘e Gabbiadini: quanno trasette,’o Napule êva tirato ‘e rimme dint’â varca e pur’ isso putette fà poco!)

 

 SARRI 7  Ancòra ‘na mubbara (partita) addȯ nun sbagliaje niente mettenno ‘nmostra ‘na scuatra acàbbata (perfetta)ca pe risolverle ‘a pratteca ll’abbastaje ‘o primmo ajone (tempo) e nnun’êtte ‘a fà ‘e straurdinarie.  

Arbitro IRRATI 7  Manch’isso sbagliaje niente, cumpreso ‘o fatto d’avé fermata ‘a mubbara (partita) ‘nrisposta ê buhhhhhhhh, buhhh  ca ‘e bemate (spalti) lazziale stéveno ‘nderizzanno a cKoulibalý.

 

E  ccu cchesto ve saluto guagliú, ddannoce appuntamento, si dDi’ vo’ a llunedí ca vene doppo d’’o scontro casalinco ‘e dummeneca  cu ‘o Carpi ca sperammo ‘e farne unu muorzo pe ppripararce spiritualmente â  mamma ‘e tutt’’e bbattaglie ‘nfra ‘na dicina ‘e juorne cu ‘a vecchia zoccola janca e nnera. Staveti bbe’!

 R.Bracale Brak