NAPOLI - CARPI (07/02/16) 1A 0!!! ‘A VEDETTE ACCUSSÍ

 NAPOLI - CARPI  (07/02/16) 1A 0!!!

‘A VEDETTE  ACCUSSÍ

E ppure chesta fove  fatta  guagliù! Ajere a ll’ora d’’a tiella ‘o Napule scennette ‘ncampo ô san Paulo cu ‘o llutto ‘e ‘na curva nchiusa, ma cu unu penziero ‘ncapo: chillo ‘e  ppigliarese ‘e tre ppunte pe ttené luntano  cchilli mazze scassate ‘e allegri  e d’’a scuatra soja, ca pe parta lloro vattetteno ‘o Frosinone e ppe levarese ‘a faccia ‘o miezu pacchero d’’o vintitré settembre ‘e ll’anno passato quanno a cCarpi foveno fermate ‘ncopp’ô zzero a zzero.E cce riuscettemo  pecché ajere ‘e cuane (azzurr) scutuliajeno ll’emigliane pure si sulo p’uno a zzero vincenno ‘na mubbara (partita) scamosa jucata nun surtanto  contro a ‘na furmazziona ‘e zappielle venute a gghiucà  facenno ‘nu catenaccio fetente e menanno mazzate ‘a cecate, ma pure contr’a ll’arbitro rumano Doveri i ‘a chenca soja (3)scesa ô san Paolo bbuone ammezziate a mmettere ‘o bbastone ‘mmiez’ê rrote d’’o Napule comme dimustrajeno pigliannosela soprattutto cu ePeppe ‘a ‘nguenta can un avette ‘nu ricore sacrusanto e sse vedette annullato ‘nu stuco (gol) bbuono pe n’attasallulo (fuorigioco) ca vedetteno sulo lloro; ma Doveri i ‘a chenca soja nun putetteno fà a mmeno ‘e vedé comme Koulibalý fove abbracciato e carriato ‘nterra a ccinquanta centimetre dô purtiere emigliano i avetten’’a cuncedere ‘o ricore ca ‘o Pipita menaje dinto, ricore ca risultaje dicisivo facennoce vencere ‘a mubbara(partita) mantenenno a ddistanzia ‘e sicurezza ‘a vecchia zoccola  ca sàpato a ssera ce aspetta ô jummerdummo stadiummo addó spero ca ce pigliammo allimmeno ‘nu pareggio, si proprio nun ce ‘a facessemo a vvencere, ca chillo fósse ‘o piacere nuosto i ‘a collera ‘e tanti cestarielle tirapiere ca ‘nturnejano ‘a scuatra cuana (azzurra). E accussí sia! Turnammo a ajere e ddicimmo ca si nun fósse stato pe Doveri i ‘a chenca soja se fósse vinciuto pe ttre a zzero fistiggianno meglio ll’uttava nichemata (vittoria) cunzecutiva. Jette comme jette e ppacienza: ‘o ‘mpurtante era ‘e vencere e sse vincette! Passammo ê ppaggelle:

REINA sv: Nisciuna  parata,bedazzurro  (pomeriggio) ‘e tutta tranquillità

HYSAJ 6,5: Fove chillo ca cchiú se dette da fà spicialmente durante ô primmo ajone  (nel primo tempo) facennose truvà pronto quanno ‘e spazzie foveno troppo  ‘ntasate.

ALBIOL 6,5:Se facette rispettà guvernanno a mmestiere ‘a camma  (zona)soja  e  nnunn avasciaje maje ‘a  guardia.

KOULIBALY 7: Soprattutto p’esserse abbuscato ‘o ricore dicisivo, ma jette ‘na bbellezza pure  a ll’epata (fase)’e vasumma (marcatura).

GHOULAM 6: Nun ce foveno assaje spazzie e nun se putette vedé assaje, ma sinamparco (comunque) mettette’mmiezo ‘nu paro ‘e pallune ‘nteressante ca ‘e cumpagne nun sfruttajeno. Peccato!

ALLAN 6: Facette ‘o ssuojo,  recuperanno ‘na cifra ‘e pallune e pruvaje a ‘nzerirse annante.

VALDIFIORI 5,5:  Nun saccio ‘a che dipenne ma cu isso ‘ncampo ‘o juoco stenta sempe e ppure ajere fove accussíPerò ‘a ‘nu tiro ‘e squina(corner) suojo  arrivaje ll’azziona d’’o  ricore.

HAMSIK 5: Jurnata no p’’o càpitano ca nun n’azzeccaje nisciuna e ffove ‘o cchiú scadente d’’e suoje.

CALLEJON 6,5: ‘O spagnuolo fove  ‘mpalla, cunchiudette ‘nu paro ‘e vote ‘e capa, signaje pure ‘nu stuco (gol) b buono, ma no pe Doveri i ‘a chenca soja c alle negajeno pure ‘nu ricore sacrusanto! (Dô62’  MERTENS 6:Jucaje ‘nu poco a ddritta e ‘nu poco a mmancina, ma senza nisciuno acuto.)

HIGUAIN 7: Ma sulo p’’a freddezza i ‘a precisione d’’o tiro ‘e ricore ca ce dette ‘e tre ppunte, pecché p’’o riesto fove ‘nu fullè (gara) ‘e granna sufferenzia p’’o mucaggimmo   (bomber) argentino ‘mmiez’ê mmaglie nere d’’a tràsera (difesa) emigliana; ‘ntutto putette tirà tre vvote, ma senza frutto.   ( Da ll’82’  GABBIADINI sv)

INSIGNE 5,5: Jurnata assaje  cumplicata pure pe lLorenzigno ca cumbinaje poco o niente. (Da ll’83’ EL KADDOURI sv).

All. SARRI 6: P’’o juoco ajere se trattaje ‘e ‘nu passo arreto, ma pe sfarma (colpa) d’’o muro aizato dô Carpi. sul piano Senza ‘e prane  (errori) d’’a terna ‘e ll’arbitre ‘a mubbara (partita) se fósse dicisa assaje primma e assaje meglio!

 ‘E Doveri  e d’‘a chenca soja aggio ggià ditto e cca cunfermo ‘o (3).

E  ccu cchesto ve saluto guagliú, ddannoce appuntamento, si dDi’ vo’,  a llunedí ca vene quanno spero ‘e cuntareve cose bbone. doppo d’’ a  mamma ‘e tutt’’e bbattaglie  ‘e sàpato a ssera ca vene ô jummerdummo stadiummo contr’â zoccola janca e nnera. Staveti bbe’!

 R.Bracale Brak