venerdì 26 febbraio 2016

NAPOLI- VILLARREAL (E.L.25/02/16) 1 A 1 ‘A VEDETTE ACCUSSĺ

NAPOLI- VILLARREAL (E.L.25/02/16) 1 A 1 ‘A VEDETTE ACCUSSĺ Che ddelusione e cche collera guagliú! Comme se vede ca ‘e pruverbie antiche nun fallesceno maje: frevaro, curto i amaro! E ccurto i amaro se sta dimustranno ‘stu mese pure p’’o Napule ca ajeressera ô san Paolo contro a cchilli mazze sfunnate d’’ê spagnuole d’’o Villarreale, pure essenno passato ‘nvantaggio cu mMarekiaro, ca era turnato a vvedé ‘a porta, nun riuscette a uttené cchiú ‘e ‘nu pareggio scartellato p’ uno a uno ca servette sulo a ffarece jettà fora da ll’ E.L. addȯ ca i’ nce avevo miso tanti speranze. Ma chi t’’o dda, chi t’’o dda? Quanno ‘o periodo è nniro nun te ne va bbona nisciuna! E accussí è ca, a ffà tiempo dâ trasferta a ‘o jummerdummo stadiummo, nun ce nn’è gghiuta cchiú bbona una… Votta a ffení fevraro, votta a ppassà pecché tutto summato, ajeressera ’e cuane (azzurri) facetteno ‘na bbona mubbara (partita) mettennocela tutta e ffoveno secutate (perseguitati) sulo ‘a ‘na jella zezzosa, ca è ‘nu mese ca nun ce lassa ‘e pere. Certo ca ascí fora da ll’ E.L. è ‘na cosa ca coce, ma è gghiuta accussí e facimmencenno ‘na raggiona, speranno ca ggià da ogge Sarri i ‘e suoje tornano a ccuncentrarese ‘ncopp’ô campiunato pe ffà tutto chello ca se po’ fà. Passammo ê ppaggelle: REINA 7 P’’e bbelli pparole ausate pe nNapule e pp’’e duje miracule fatte ajeressera : ‘o primmo ô pprincipio ‘ncuollo a bBakambú ca, prufittanno ‘e ‘nu rimpallo lle s’appresentaje ‘nnante sulo, libbero e ffranco, i ‘o siconno quanno cu ttanto ‘e mano aperta levaje dô pere d’ ‘o stesso francese ‘nu pallone a ccinquanta centimetre d’’a linia ‘e porta; nce fȯsse vuluto pure ‘o terzo ‘ncopp’a cchillu cruzzo (cross) a scampulo ‘e mele cotte ‘e Pina, ca ‘mmece addeventaje ‘nu stuco (gol) ca ‘o jucatore ‘e Marcellino manco s’aspettava, ma Reina ‘o miraculo nun ‘o putette fa: troppo streuza ‘a trajettoria d’’o pallone! Peccato! HYSAJ 6 - Denisso Suarèzzo fove ll'avverzario cchiú periculuso e cquacche vvota ll’albanese ‘ncupertura êtt’’a essere aiutato da Lópezzo; trasenno Maggio se spustaje a mmancina appressuranno (spingendo) a mmestiere ‘ncopp’’â curzia nsi’ ô prazzo (fine). CHIRICHES 6 Bbona atalossa (prestazione) d’’o rumeno ca spisso se facette vedé pure dint’â camma(area) d’’o Villarreale. ALBIOL 6,5 Fove uno d’’e meglie ajutanno ‘o centrocampo e custruenno dê zzache (retrovie); p’’o riesto, cu ttutto ca teneva n’uocchio niro, facette cchiú ‘e ‘na chiusura ‘ncuollo a cchella carta ‘e tressette ‘e Soldado. STRINIC 6 ‘Nteressante ‘a tarra (sfida) cu Rukavina, bbone ‘e cchiusure difenzive ma quanno appressuraje (spinse) quacche vvota nun ‘a penzaje comm’ô Pipita e sprecaje; che peccato! E cche ppeccato p’’o prubblema d’armaddia (fisico)ca ‘o custringette a dde ascí. (Dô 64' MAGGIO 6 - Sulo ‘na mez’ora ‘e presenzia senza demmarragge [spunti] o difiette) D.LÒPEZ 6 Pure ajeressera ll’attuccaje d’essere presente ô posto d’Allanno; certo nun lle se putette dimannà ‘o pasiglio (passaggio) a cquaranta metre, ma sulo ‘e rompere ‘o juoco e dde pressà ‘a vicino Denisso Suarezzo, dànno ‘na mana a Hysaj e isso ‘o ffacette; fove nutuzziato (ammonito) ma nun s’’o mmeretaje.Ascette quanno fove nicessario attaccà ‘e cchiú. (Dô 79' GABBIADINI s.v. Trasette troppo tarde pe ffà coccosa) VALDIFIORI 6 Êsse però pututo fà ‘e cchiú; da n’urtizzazziona (verticalizzazione) soja arrivaje ‘o stuco (il gol) ‘e Marekiaro; p’’o riesto se muvette bbunariello e a ll’arrancua (ripresa) n'ata urtizzazziona (verticalizzazione)soja permettette a Insigne ‘e sfresà (sfiorare) ‘o doje a uno. (Dô 75' JORGINHO s.v. Menato dinto pe ttentà ‘e adderezzà ‘a varca nunn nne avette ‘o tiempo!) HAMSIK 6,5 Bbona atalossa (prestazione) d’’o capitano comme nun le succedeva ‘a paricchio; ‘a primma mossa fove chella justa pecché signaje: cacciaje ‘o carattere quanno jette a prutestà facennose nutizzià (ammonire); s’accentraje spisso turnanno a fà quase ‘o trecquartista e se facette apprezzà pure a ll’epata d’antappa (fase di assistenza). INSIGNE 6 Alternaje spisso ‘a pusizzione cu Mertenso, pruvanno a azzanadà (innescare) ‘e muvimente ‘e Marekiaro o d’’o Pipita; turnaje spisso arreto a ppigliarese ‘o pallone; avette quacche bbona idea, ma ‘e difenzure d’’o Villarreale nun ce ‘a facetteno bbona maje; Areolà lle facette annuzzà ‘ncanna ‘nu stuco (gol) pussibbile; ati vvote po se ‘ncapunette e sciupaje. Peccato! HIGUAIN 5,5 E cquanto me dispiace, ma nun ne pozzo fà ‘o mmeno: tentaje ‘o primmo tiro doppo tre minuti, ma puteva passà palla a mMertenso meglio piazzato, ‘mmece lle partette ‘nu tiro ‘e mancina destinato â curva; cierti vvote nun venette servuto dduvere e cchelli ppochi vvote ca avette ‘o pallone ‘o sciupaje ‘a fora ‘e quanno custringette ‘e duje ca ‘o steveno ‘ncuollo a rrepuzà(respingere) malamente justo addó arrivaje Marekiaro signanno. Cumplessivamente però serata scadente. MERTENS 6 Doppo pochi minute ‘o Pipita nun lle dètte ‘na bbona palla, mentre isso ‘o ffacette pure si ‘o pallone fove troppo tassuso (veloce); bbona ‘a ‘ntesa cu ‘o Pipita; venette cauciato sistematicamente da tante avverzarie e cquasi pruvocaje ‘nu tuterma(autogol).Pure a isso Areolà lle facette annuzzà ‘ncanna ‘o stuco (gol) d’’a pussibbile nichemata (vittoria). Pacienza! SARRI 6 Praticamente ‘a scuatra fove chella titulare,’a fora ‘e ‘nu paro ‘e cagne, ma forze s’êsse pututo ‘nventà coccosa ‘e cchiú pe ttirà ‘stu capo ‘nterra visto ca ‘o Villarreale, partette assaje cumpattato pronto a ssafà (pressare) dunnatamente (con efficaia) ‘e purtatore ‘e palla cuane (azzurri) ô pprincipio ‘e ll’azione.Fósse servuta ‘nu poco cchiú ‘e furtuna ca ‘mmece ce avutaje ‘a faccia comme se vedette ‘o mumento d’’o stuco (gol) ‘e Pina arrivato p’opera e vvirtú d’’o Spiritussanto visto ca ‘o tiro d’’o centrocampista fove a bbienetenne e mmanco isso sapeva che nne vuleva caccià! Ce se mettette pure ‘o ‘mpiccio ‘e Striniccio ca cundizziunaje ‘e cagne proprio ‘int’ô chiuovo. Ancòra ‘na vota ‘o 4-2-4 fove tardivo e nnun se ne venette a ccapo!Cumplessivamente però l’atalossa (prestazione)d’’a scuatra nun fove malamente e cchesto ce fa sperà p’’o sèguito (prosieguo) d’’a tempurata (stagione). Certo, ascí da ll’ E.L. pe ‘nu stuco (gol) a mmazzo, fa magnà ‘o limone… Pacienza però, dammoce n’atu pizzeco ‘ncopp’â panza e guardammo annanze. arbitro: AYTEKIN i ‘a chenca soja (4) Ll’arbitro pare ca fósse terisco ‘e cCermania, ma i’ penzo ca venesse ‘a Turino e pprecisamente dô Cottolengo pe cquanto se dinustraje scemo e sciacquo ‘e cerevella; nun ne ‘ncarraje nisciuna siscanno sempe ad capocchiam e ppuntualmente contr’ô Napule. E cche saciccio! E ccu cchesto ve saluto guagliú, ddannoce appuntamento, si dDi’ â prossima vota ciovè doppo d’’a trasferta p’’o scontro cu ‘a Fiorentina addȯ sperammo ‘e fà cose bbone, ‘e nun piglià chianette e anze mmacare turnà a vvencere, comme po’ ssuccedere e à dda essere. Staveti bbe’! R.Bracale Brak

Nessun commento: