sabato 16 aprile 2016

INTER – NAPOLI (16.04.16) 2 A 0 ‘A VEDETTE ACCUSSí

INTER – NAPOLI (16.04.16) 2 A 0 ‘A VEDETTE ACCUSSí Nun me dicite niente guagliú, ma sto’ troppo ‘ntussecato e ssi a ‘stu mumento desse ‘nu muorzo a cquaccheduno ll’avvelenasse; chello ca succedette e êttem’’a vedé ajeressera a mMilano nun sta né ‘ncielo e nnè ‘nterra e cce ll’aggio cu ‘o munno sano, mprimmose cu sSari [4] ca sbagliaje a lleggere ‘a mubbara (partita) e nnun se rendette cunto ca contro a ‘na scuatra misa ‘ncampo cu ‘nu schema 4-5-1, ‘o Napule s’aveva mettere a specchio soprattutto cunzideranno ch’êva ffà a mmeno d’’o Pipita; ce ll’aggio po cu ttutt’’e jucature cuane ca, senza reaggí e allimmeno aizà ‘a voce se facetteno maltrattà da ll’unnece pellerine d’’o nnacchennello e dda chella mmunnezza ‘e Rocchi e dd’‘a chenca soja [2 e ppo ve dico]. Quanno Icardi signaje e, ccomme se vedette chiaramente, steva ‘nnattasàllulo ( in fuorigioco) e Rocchi cunvalidaje êssen’avuto tutte quante [panca cumpresa] alluccà e prutestà, magnannose arbitro e ssignalinie; meglio essere nutizziate (ammoniti) tutte ‘mparanza, ca pigliarselo dint’ê rrecchie! ‘Mmece nun ‘o ffacetteno comme si nisciuno ‘e lloro avesse avuto sanco dint’ê vvene e ss’’a chiejajeno a llibbretta. E cche saciccio! Possibbile ca nun se rennetteno cunto ca, doppo d’’a scutuliata pigliata a Udine, perdere pure a mMilano significava dà via libbera â Roma e mmettere ‘na preta ‘ncopp’a cquanto fatto durante â tempurata (stagione)? Possibbile ca nisciuno ‘o ccapette? Fove chiaro súbbeto ca ggià fósse stato difficile pariggià cu cchella trancara (diga)’e nove perzone ‘nnante â porta d’ Handanoviccio, figurarse po vencere… E ccumminfatte nun se riuscette a ppariggià ‘o stuco (gol) d’Icardi, ma addirittura ô prano (alla fine) ‘e primmo ajone (tempo), ‘ncontropiede se pigliaje ‘o siconno pacchero e ffove notte, p’’a cuntentezza d’’e cestarielle [cumpreso antonio conte,’a zoccola morta soja ca tene ‘ncapo e ‘nu paro ‘e socie suoje] presente ‘ncopp’ê bbemate (spalti) e pp’’a collera nosta. Ora mo êsse ‘a fà ‘e ppaggelle, ma nun saccio si nne vale ‘a pena; sto’ troppo ‘ncacchiato e v’ avviso ca, ‘a fora d’ Allanno, a cchi pe ‘na cosa, a cchi pe n’ata nun me sento ‘e mettere a nnisciuno ‘o seje né vvale ‘a pena ‘e scennere dint’ê particulare, tanto ggià me so’ spiecato: REINA 5,5 - HYSAJ 5,5 - ALBIOL 5,5 - KOULIBALY 5 - STRINIC 5 - ALLAN 6 – fove ll'unico a dannarse nfi’ a cquanno putette. - JORGINHO 5,5 – [Dô 73' EL KADDOURI SV] -HAMSIK 4,5 -CALLEJON 5,5 - GABBIADINI 4,5 - INSIGNE 4,5 – [Dô 50' MERTENS 5,5] - SARRI 4 - ROCCHI i ‘a chenca soja [2] nun sulo p’’o stuco cunvalidato,[ca sinamparco (comunque)signaje ‘a mubbara (partita)], ma p’’e ttroppi fetenzie d’’a bbanda ‘e chianchiere d’’o nnacchennello ‘ndanno d’’e cuane (azzurri) ch’isse vedette, ma nun sanziunaje o caputiaje. E ffermammoce cca dànnoce appuntamento, si dDi’ vo’ a mmiercurí ca vene doppo d’’a mubbara (partita) ‘e martedí a ssera contr’ ô Bologna, fullè (match) addivintato overo funnamentale, si nunn’ è ggià tutto perduto! Staveti be’. Raffaele Bracale Brak

Nessun commento: