martedì 19 aprile 2016

NAPOLI –BOLOGNA ( 19/04/16) 6 A 0 ‘A VEDETTE ACCUSSÍ

NAPOLI –BOLOGNA ( 19/04/16) 6 A 0 ‘A VEDETTE ACCUSSÍ Canta Napule, sciala popolo guagliú! Ajeressera ô san Paolo, ‘nnante a ssulo cchiú o meno vinticinchemila perzone [ca, ggiustamente, nun s’èrano scuraggiate doppo d’’a scunfitta ‘e Milano cu cchilli mariuole d’’a scuatra d’’o nnacchennello], ajeressera ‘o Napule asfardaje malamente ‘e mmurtatelle ‘e chella faccia ‘e cestunia ‘e Donadoni ca ô prazzo (alla fine) êtt’’a piglià ‘o pallottoliere pe ppurtà ‘o cunto esatto d’’e stuche (gol) ‘ncassate e sse carriaje a bBulogna ‘nu bbellu cartoccio, cu ddoje sfugiatelle ricce a ffirma Manolo Gabbiadini, tre bbabbà firmate Munaciello Mertenso, e ‘nu sciú a bbanana cunfezziunato ‘a D. Lopezzo! Che sfizzio e cche divertimento e ppeggio pe cchi nun c’êva creduto ca ‘o Napule se fósse levato ‘a faccia ‘e pacchere pigliate cu ‘a mubbara (partita) d’affarta(andata)! ‘Mmece s’’e llevaje e ccu ‘o ‘nteresse. Che sfizzio e cche divertimento! Passammo ê ppaggelle: REINA s.v. Nunn’êtte ‘a fà niente pe nnuvantune minute; êsse pure pututo starsene â casa. HYSAJ 6.5 ‘A solita atalossa (prestazione)urdinata e dde sustanza; sulo ‘na vota [ô pprincipio d’arrancua (ripresa)] chillu mal’ommo ‘e Giaccherini riuscette a ssuperarlo, ma p’’o riesto s’êtte ‘a fà dint’ô prozo! ALBIOL 7 Serata tranquilla p’’o cummannante d’’a tràsera (difesa); arrivato â centesima presenza ‘nserie A nun avette nisciunu prubblema e sse levaje pure ‘o sfizzio ‘e jí mmettere pauta a mMirante, ca però ce mettette ‘na pezza. KOULIBALY 7 Ce facette lustrà ll’uocchie apprimma mettenno ‘a musarola a cchi lle capitaje a ttiro e ppo ascenno palla ô pere. GHOULAM 6.5 Nun fove particularmente spettaculare, ma risultaje ô stesso dúnnato (incisivo) soprattutto quanno cruassaje (crossò) .. ALLAN 7.5 Tanta quantità e cqualità:pe mmantenerlo lla ‘mmiez’ô campo nce fasseno vuluto ‘e catenielle dint’ô naso:se dannaje ll’anema, ma nun facette passà a nnisciuno difennenno cu ccegna (grinta) e rrennenno inutile ‘e tentative ‘e levarle palla. JORGINHO 6.5 Facette chello ca s’êv’’a fà,tutte cose semprice, senza esaggerà: jucate ‘e primma, istiglie (verticalizzazioni) pricise e ppasiglie (passaggi) sistimate. HAMSIK 7 Atalossa (prestazione) diaprésa (sontuosa) d’’o capitano ‘nfra ‘nu ‘nsertamiento (inserimento) e ‘na ggiometria cu rrica e cumpasso. Cercaje pure ‘a porta p’appararse cu ‘e stuche ‘e Maradona, ma inutilmente pecché Mirante lle dicette sempe ‘e no. [Da ll’ 81’ D. LOPEZ 6,5 Trasuto, praticamente a mmubbara (partita) fernuta, justo pe ffà tirà ‘o sciato ô capitano, truvaje ‘o tiempo ‘e presentarese a ttu ppe ttu cu mMirante e ffotterlo prucurannose, pure si nun è arta soja, ‘a suddisfazzione ‘e mettere finalmente ‘nu pallone ‘mporta, chillo d’’o seje a zzero! Ajere pure ‘e pulice tenetteno ‘a tosse.] CALLEJON 6.5 ‘A solita spina dint’ô scianco d’’a trasera (difesa) d’’e bbulugnese, ajere vestute a llutto. Nun signaje, ma mannaje ô manicomio a cchillu profuco ‘e Constant(o) custrignennolo a stennerlo p’’o ricore d’’o mumentanio 2-0.Visto ch’era diffidato ll’êsse fatto ascí primma ‘mmece d’aspettà ‘o 77’ [dô 77' EL KADDOURI 6 – Ce mettette pur’isso ‘o ssuojo cu cchill’ajuda (assist) a Mertenso ca valette ‘a pareglia (doppietta) d’’o Munaciello] GABBIADINI 7.5 Nun perdette ll’accasione pe ffarese apprezzà cu n’atalossa (prova) tutta cegna (grinta) e bboni ‘ntenzione; ‘o primmo ajone (tempo) fove tutto ‘o suojo mettenno dinto dduje stuche (gol) e sfresanno (sfiorando) ‘o terzo... Peccato ca nun ride maje e ttene chella faccia miccia miccia ca te fa scennere ‘o core dint’ê ccazette! Ma nisciuno lle conta ‘na bbona barzelletta? (dô 73' INSIGNE 6 ‘E stima: trasuto a gghiuoche ggià fatte, nun fove prutacunista e êtt’’a fà poco .) MERTENS 10 Senza cuntà ‘e ttanti bbelle gghiucate fatte partenno ‘a mancina, cullezziunaje n’ ajuda ((assist) e ttre stuche (gol) uno meglio ‘e n’ato i ‘o terzo fove ‘nu vero capolavoro; ma ch’ ato vuó dâ vita? Peccato ca pe ttruvà posto se ll’à dda jucà cu Insigne! All. Maurizio SARRI 7.5 Ritruvaje ‘o Napule ‘e sempe e tutto lle jette a cciammiello.’Na cosa però ll’aggi’’a dicere: ô posto suojo a Peppe ‘a ‘nguenta, visto ch’era diffidato e se puteva fà male, ll’êsse fatto ascí primma ‘mmece d’aspettà ‘o 77’. Arbitro GERVASONI 6 Nurmalmente è scemo, ma ajeressera, pe ffurtuna, fessarie grosse nun ne facette.Menu male! E ffermammoce cca. Ve saluto e ssi Ddi’ vo’ ve donco appuntamento p’’a prossima vota sempe speranno ca ogge Ventura ce facesse ‘a stessa crianza ca ce facette zi’ Reja e nnun perdesse a rRoma! Passasse ll’angelo e ddicesse: Ammenne! Staveti bbe’! Raffaele Bracale Brak

Nessun commento: