TORINO – NAPOLI (08.05.16) 0 A 0 ‘A VEDETTE ACCUSSí

TORINO – NAPOLI (08.05.16) 0 A 0 ‘A VEDETTE ACCUSSí Comm’ ô ppane, guagliú, ‘e tre ppunte cunquistate ajeressera a ll’Ulimpico ‘e Turino ce servevano comm’ô ppane, visto ca â meza ‘a scuatra d’’o Pupone êva cardato ‘o matarazzo chievo e cc’era zumpata ‘a cuollo e nnuje ce avevam’’a turnà a ppiglià chillu siconno posto, ca ce spetta. E allora s’êv’’a vencere assulutamente; e cce riuscettemo pure si jucajemo sulo p’’o primmo ajone (primo tempo) ca ‘nchiudettemo ‘nvantaggio pe ddoje a zzero e – sbaglianno – turnajemo ‘ncampo pe ll’arrancua (ripresa) cumminte d’avé ggià risolto ‘a prattica e nnun ghiucajemo cchiú permettenno ê chianchiere ‘e Ventura ‘e mettere [pure si a mmazzo] n’ata vota ‘ndiscussione ‘o risultato… e accussí ll’urdumu quarto d’ora d’’a mubbara (partita) fove ‘e sufferenzia nfi’ a cche cchella mmunnezza [po ve dico ] ‘e Damato nun siscaje ‘o prazzo (fine)decretanno ca ce avevemo pigliato n’ata vota ‘o siconno posto. I a mme nun me piace ‘e suffrí…, nun m’’o ppozzo permettere! Passammo ê ppaggelle: REINA 5,5 Me dispiace, ma ‘o seje nun ce ‘o pozzo mettere visto ca, restanno malamente troppo annante ‘a linia ‘e porta e a mmeza strata, riuscette sulo a smanaccià, senza fermarlo ‘nu pallone spuorco ‘e Bruno Perèsso e se facette fà dô pallunetto ca fruttaje ll’addaffa (rete) â scuatra ‘e Ventura. HYSAJ 6 Primmo ajone ‘e puzamiento (spinta), mentre ‘o siconno s’’o facette cu ‘a martellina tirata comme a ttutto ‘o Napule. KOULIBALY 7 Nun se passaje! Gialantiggiaje (giganteggiò) dint’ô core d’’a trasera (difesa). ALBIOL 6,5 Nutizziato (ammonito) a mmorte ‘e súbbeto doppo manco tre mminute, nun se facette cundizziunà. Tocotoco (ottimo) ‘o muvimento fatto pe mmettere ‘nnattasallulo (in fuorigioco) a bBelotti ca ‘ncopp’o zzero a zzero, signaje n’ addaffa (rete) fasulla ca pe ffurtuna fove annullata da cchella mmunnezza ‘e Damato ca però êsse avuto ‘a siscà primma ll’attasallulo. GHOULAM 6 S’accuntentaje ‘e ll’epata ( fase) difenziva vedennosela primma cu Zzappacosta e ddoppo cu Bruno Perèsso. ALLAN 7,5 Ommo macàno (dovunque) nun se sparagnaje pe ttutta ‘a mubbara (partita) primma facenno trancatura (interdizione) e súbbeto doppo ribbaltanno ‘o fronte. JORGINHO 7 Atalossa (prestazione)overo bbella cu giometrie e bbassurere (suggerimenti) sempe ‘nduvinate, comme a cchella cu rica e ccumpasso d’’o doje a zzero. HAMSIK 6,5 Ma sulo p’’o primmo ajone quanno cu dduoje ajude (assist) mannaje ‘mporta ‘e cumpagne jucanno a mmemoria; sparette dâ circulazziona a ll’arrancua (ripresa)e ffove sustituito troppo tarde (da ll’81’ D. LOPEZ s.v.). CALLEJON 6,5 Se facette truvà pronto e nun se sparagnaje fatica ‘e sacrifiggio ‘ncopp’â curzia; signaje ‘nu stuco (gol) facile facile i ‘o dedicaje â figlia India ca ogge fa dduje anne[comme liggettemo ‘ncopp’ô tatuaggio ‘mpietto a Ppeppe ‘a ‘Nguenta] Ascette pe nun saccio qua’ ‘mpiccio a ‘nu pere.(da ll’83’ EL KADDOURI s.v.). HIGUAIN 7 Ambriento (affamato) d’addaffe (rete) mettette dinto ‘o trentatriesimu stuco (gol) ‘e ‘stu campiunato e risultaje primmo pure p’’e pale cuovete [5] Ll’ avverzarie pe ttentà ‘e fermarlo s’êtten’appennere ‘ncuollo, strattunà p’’a maglia e vatterlo: fove ll’unico modo.M’aspetto ca sapato ca vene contr’ ô Frosinone ce riajala quacche ata perna, migliuranno ‘o sàggialo (record)suojo! INSIGNE 5,5 Me dispiace, ma êsse pututo e avuto fà ‘e cchiú,ma nun ‘o ffacette e addirittura a ll’arrancua (ripresa) arretraje ‘o raggio d’azziona e sparette dâ circulazziona. (dô 73’ MERTENS 5,5 Trasuto tarde e dint’a ‘nu bbruttu mumento nun lle riuscette ‘e trasí dint’ô juoco. Peccato!). All. SARRI 6 Quanno se vence, vence pure ‘o trainerre, ma ajere s’êsse avuto ‘mmentà coccosa pe ffà capí ê suoje ch’êsseno avuto ‘a jucà tutt’’a mubbara (partita) senza sparagnarse, e nnun ‘o ffacette. Sinamparco (comunque)si contro ô Frosinone ‘a scuatra nun sbraca, facenno corne se po’ afferrà ‘a cualificazziona diretta â Ciampionsa (Champions) superanno Mazzarri e Benetezzo e pp’essere ‘o primmo anno, nun è ppoco! arbitro DAMATO 4,5 Vecchia carta canusciuta st’avvocato ‘e Barletta(e comme a ppugliese quase certamente tifoso juventino) è ‘nu chiafeo, fúceto, scemo e sciacqualattuca(incapace) e ati vvote addirittura vennuto!Turnato a diriggere ‘o Napule doppo paricchiu tiempe dê ‘nguacchie fatte precedentemente ‘ndanno d’ ‘o Napule, tentaje ‘e tutto pe dà fastidio ê cuane mettennose pe ‘mmiez’ê piere d’ ‘e napulitane custrette a scartà primma a isso e ppo ê jucature granate e nun vedenno ‘o juoco viulento e pruvucatorio d’ ‘e delinquente ‘e Ventura, ausaje dduje pise e ddoje mesure nutizzianno (ammonendo) a mmorte ‘e súbbeto ‘e nuoste e sparagnanno cartelline jalizze (gialle) e rrusse ê delinquente ‘e Ventura! E ccu cchesto ve saluto, dannove appuntamento, si dDi’ vo’ a dummeneca ca vene doppo ‘e ll’urdema mubbara (partita) ‘e ‘stu campiunato ô san Paolio contr’ô Frosinone speranno ‘e farne purpette pe chiudere ‘mbellezza. Staveti be’ R.Bracale Brak