mercoledì 11 gennaio 2017

NAPOLI – SPEZIA (C.I 10.01.2017) 3 -1 ‘A VEDETTE ACCUSSĺ

NAPOLI – SPEZIA (C.I 10.01.2017) 3 -1 ‘A VEDETTE ACCUSSĺ E ppure chesta è ffatta guagliù! Ajere a nnotte ô san Paolo ‘mmante a scarze vvintemila ‘e lloro, appucenute dô friddo, ‘o Napule, cu ttutto ca scennette ‘ncampo vestuto a llutto e ssenza maglia luvarda (azzurra) avette raggiona d’’o Spezzia vattennolo pe ttre a uno e ccunquistaje ‘e quarte d’’a Coppa itaglia fistiggianno accussí ‘e 58 anne ‘e Sarri ca, scualificato, s’êtte ‘a vedé ‘a mubbara (partita) dâ cajola ‘e cristallo ‘ncimma ‘e bbemate (spalti) lassanno ‘a panca ô siconno suojo Calzona, ma nun saccio si fove assaje cuntento pecché ‘o Napule avesse avuto nchiudere ‘a prattica ggià ô primmo ajone (primo tempo) senza aspettà ll’arrancua (ripresa) pe ttirà ‘o capo ‘nterra, comme succedette dàtose ca, doppo d’avé signato [terzo minuto]’o primmo stuco (gol), ‘e cuane, ‘mmece ‘e ‘ncasà ‘o pèro, abbiajeno a ffà n’inutile pussesso ‘e palla dimustrannose poco cuncrete e pparicchio attarre (leziosi) senza cchiú jí a ccercà ‘a porta ‘e Chichizola.Pe ffurtuna ca po a ll’arrancua (ripresa) ‘int’a dduje minute [55’ e 57’] Giaccherini e gGabbiadini cu ‘nu paro ‘e cinchefranche mettetteno ‘e ccose a pposto e risulvetteno ‘a facenna. Penzo però ca ll’êssen’ avuto’a fà ggià primma! Pacienza! Passammo ê ppaggelle: RAFAEL[‘O PREVETARIELLO] 6: Finalmente ce simmo capite! È isso, ‘o Prevetariello nuosto, ‘o siconno purtiere d’’o Napule e nun è sSepe, comme avesseno vuluto ‘ntribbuna-divano. Turnaje ‘ncampo doppo ‘a bbellezza ‘e quase dduje ann e nnun me parette pe nniente arruzzenuto;sfuderaje ‘nu paro ‘e bbuone tacculle (interventi) e sse dimustraje sempe sicuro pure cu ‘e piére; ô 35’ êsse pure fermato chella palla sporca ‘e Piccolo si nun ce se foasseno mise ‘o demmonio cu ‘a cora soja e cchella scartellata, inutile e ddannosa artifaffa (deviazione) dicisiva d’Albiollo. MAGGIO 5,5: Miezu zifo (voto) mancante pecché, pure si ‘o tiempo passa, ma isso cuntinua a correre ‘o mmazzujo (doppio) ‘e ll’ate, ajere a nnotte nun ce mettette ll’attenziona nicessaria e ‘ncopp’â curzia soja ss’attaccaje malamente e se sufferette tanto è vvero ca fove ‘a lla ca ‘o Spezzia sfunnaje ‘nnaccasione d’’o stuco lloro; prubbabbilmente penzaje ca se trattava ‘e ‘na uadí (amichevole) e ‘sti ccose ‘nu prufessionista passato ‘e coveta nun ll’à dda fà! MAKSIMOVIC 5.5: Nun me piacette troppo giacché ‘o vedette poco sicuro e cquacche vvota pure nervuso; pe cchello ch’è ccustato quacche critica ‘e Sarri nun ll’êsse avuto ‘a levà sicuranza (sicurezza). Po mazzeca amaro si uno preferisce ‘o Vampiro! ALBIOL 5,5: Miezu zifo (voto) mancante pecché dint’a ‘na serata d’urdinaria amministrazziona jette dint’ê chiavette ‘nnaccasione ‘e chella palla pa sporca ‘e Piccolo e ffuttette a cchillu povero Prevetariello cu cchella scartellata, inutile e ddannosa artifaffa (deviazione) soja! STRINIC 6,5: Cu Ghoulamme ‘nCoppa d’Affrica se gestiunaje cu ‘nteliggenza, e ‘sperienza. Dê pparte soje ‘o Spezzia facette palla corta i ‘o Napule nun sufferette; annante cunfermaje ‘e tené bboni cqualità ‘e tacnía (tecnica); ascette pe ccalambre (crampi).[da ll’80’ HYSAJ sv.] ROG 6.5: Bbona ll’estreglia (debutto)d’’o guaglione cruato ca dimustraje ‘e tené stoffa; ce mettette sí ‘nu poco ‘e tiempo a ccarannà (carburare),ma quanno arremarraje (ripartí) risultaje ‘mpressiunante e ssoja fove ll’ajuda (assist) a zzuco ‘e caramella pe gGabbiadini. DIAWARA 6: Se facette nutà pe cquacche bbella istiglia(verticalizzazione), ma ògne ttanto peccaje d’autanza (superbia) comme si ll’avverzario fósse rrobba ‘e scarto e isso nun se puteva cunfonnere. ZIELINSKI[ZUZÚ] 7: Miezu zifo (voto) ‘e cchiú pecché sbluccaje súbbeto ‘a mubbara (partita) signanno súbbeto ‘na bbella addaffa (rete) cu ‘na chivrimilla (serpentina) e ttiro a ggiro. Po facette ‘o nnicessario. GIACCHERINI 7,5: Miezu zifo (voto) ‘e cchiú pecché spezzaje ll’armizzanno (l’equilibrio) purtannoce ‘nvantaggio cu ‘na prudezza caddafia (balistica) ca fove ‘o primmo stuco (gol) suojo cu ‘a maglia luvarda (azzurra).Passanno ‘e minute criscette pure isso. GABBIADINI 6,5: Se ne sta jenno a ccapa aizata: terza addaffa (rete) da veru marcazzo (centravanti) ‘int’a ttre ssibbacche (match). Chi ‘o ssa’ si po ce ‘o chiagnimmo! [da ll’80’ PAVOLETTI s.v. : Facette a ttiempo a ffarese mannà a ffà ‘nculo sbaglianno ‘nu stuco (gol) bbello e ffatto. INSIGNE 6.5: Miezu zifo (voto) ‘e cchiú pecché ll’ajuda (assist) pe gGiaccherini fove ‘nu vero sciucquaglio; p’’o riesto jucaje e se divertette ‘mponta ‘e piére. [Dô 60’ CALLEJON 6: Se sparagnaje stanno attiento a nun sprecà sciato e fforze.] All. CALZONA 6 Purtaje bbuono. ‘Mpanca ô posto ‘e Sarri scualificato, gestiunaje ‘e cagne a mmestiere. Arbitro: PAIRETTO 6 Tutto summato, cu ttutto ca è piamuntiso, nun me dispiacette comme siscaje ‘stu figlio d’arte , preferenno cchiú ccazzià ‘e jucature ca nutizziarle (ammonirli). E ffermammoce cca. Se torna ô campiunato e ssi dDi’ vo’, ce sentimmo llunnerí ca vène doppo d’ ‘a sibbacca(match) cu ‘o Pescara. Staveti bbe’! R. Bracale Brak

Nessun commento: