domenica 5 marzo 2017

ROMA – NAPOLI (04.03.17) 1 – 2 ‘A VEDETTE ACCUSSÍ

ROMA – NAPOLI (04.03.17) 1 – 2 ‘A VEDETTE ACCUSSÍ Alleluja, alleluja!Piatte, ‘rancascia, putipú, scetavajasse,triccabballacche, trezziole, bbiancale, fuja-fuje, e bbotte a mmuro, guagliú ! ‘O Napule, ajere jette a ll’Ulimpico ‘e roma cu ‘a muntazzimma (divisa) justa: chella d’’a Maronna ‘e ll’Arco, contr’ê pecurare rumanise i ‘e ppaccheriaje pe ddoje a uno, mettennolo a ppitoffio a cchiú dd’uno accumincianno da chella faccia ‘e cestunia ‘e spalletti, da ll’arbitro Banti [3 e ppo ve dico], da caressa e bbergomi [‘e duje armullacche(commentatori)SKY], cestarielle cchiú ca che ca ce menajeno ‘a favetta pe ttutt’’o tiempo d’’o sibbacco (match), ma s’êtten’’a fà cchiú ddinto ‘e dint’ô prozo, pecché ‘o Ciuccio vincette e ffove ‘na nichemata (vittoria) ‘mpurtanta assaje ca ce vuleva, ce vuleva propeto doppo d’’e ddoje scunfitte pigliate cu ‘o Riallo ‘nCiampionsa e ccu ‘a vecchia zoccola ‘nCoppa itaglia! Nichemata (vittoria) ‘mpurtanta, dicevo, pecché ce cunzentette ‘e ricuperà ‘ncrassifica ddoje pusizzione accurcianno ‘ncuollo â roma e cce permettette ‘e difennere ‘o terzo posto ‘ncrassifica, ca mo comme a mmo è ‘o cchiú ca putimmo sperà. E ‘na bbona mana ce à dette certamente ‘a presenza ‘e ‘on Antunino Cannavacciuolo ca, paciaccone comm’è, ce purtaje bbuono e se ‘mmeretasse ‘o posto fisso a ggratisse ‘ntribbuna ô san Paolo! Parlanno seriamente ve dico ca ajere ‘o Napule se facette apprezzà pe 89 minute d’’a mubbara (partita)jucanno bbuono cu ccegna (grinta), cu ppressione (pressing) auta a ttutto campo, cu attenziona e ppricisione arreto e credennoce nsi’ ô prazzo (fine)e ssulo a ll’urdemi seje minute jette ‘nsufferenzia permettenno ê rumanise ‘e signà ll’addaffa (rete) d’’a bbannera ca nun se fósseno mmeretata, nchiudenno ‘a pratteca cu ‘nu doje a uno pe nnuje ca, sinamparco (comunque) fove ‘nu (risultato) bbusciardo datose ca ‘o Napule d’addaffe (reti) ne facette tre e ttutte bbone, ma chella mmunnezza ‘e banti ce n’annullaje uno (‘o siconno) ‘nventannose ‘nu carí(fallo) ‘ncuollo a ffazio addó ‘mmece nn’êva fatt’isso[‘o rumaniso] uno e ppo s’era menato ‘nterra!Ma mo nun stammo a ccercà ‘o pilo ‘int’ a ll’uovo. Cuntentammoce d’avé vinciuto e d’averce levato ‘e paccare ‘a faccia d’’a scunfitta casalinca ‘e ll’addabba (andata) e ppacienza, pacienza p’’o stuco (gol) pigliato pe stanchezza e ppe cchillo ca ce fove annullato, tanto se sape ca tutte ll’arbitre ce siscano contro! Passammo ê ppaggelle: REINA 9 ‘Nu munumento ‘o purtierone nuosto; ajere nun sbagliaje quase niente e ssalvaje ‘o nattija (risultato) cu ddoje granni pparate: una ‘ncopp’ô doje a zzero e n’ata, funnamentale, ô 93’. Ll'unico prano (errore) fove ‘nu taggillo(rinvio) curto ca cunzentette a sSalàh ‘e centrà ‘o palo vascio. HYSAJ 5,5 Fove, purtroppo ‘o meno pusitivo d’’a trasera(difesa) nosta; cu El Shaarawy durante ô primmo ajone (nel primo tempo) e cu pPerotti a ll’arrancua (nella ripresa) jette cchiú ‘e ‘na vota ‘int’ê cchiavette e ffove isso ca nun riuscette a ‘mpedí ca ll’argentino mettesse palla dinto pe Strootmanno ca[89’] riuscette a ffottere a a rReina! ALBIOL 6,5 Sulo durante ll’eterno ricupero (cincheminute!) ‘nfucato abballaje ‘nu poco pur’isso, ma pe ttutt’ ‘o fullé (gara) fove attiento e ppriciso ‘ncuollo a dDzeko e affiatato cu Koulibalý facenno ‘o spezziale ch’êv’’a fà. KOULIBALY 7 ‘Na muraglione! Cu Albiollo cancellaje a dDeko e ffacette ‘na mubbara (partita) praticamente matàla (perfetta) cu ‘na sola sciucchezza, ma senza consequenzie: ‘nu taggillo(rinvio) ‘mpriciso ca purtaje ô stuco (al gol) giustamente annullato a pPerotti, ca s’era accunciata ‘a palla cu ‘na mana [e pperò nnun fove manco nutizziato(ammonito)]. GHOULAM 6 Jette assaje bbuono pe ttutto ‘o primmo ajone (nel primo tempo) però a ll’arrancua (nella ripresa)affannaje cu sSalàh e ccu bBruno Peres(so). ROG[‘o lione] 7 ‘Ntribbuna divano piacette a ttutte ‘stu guaglione ca comme a tTurino ‘nCoppa itaglia,’mmiez’ô campo nun se fermaje maje: safaje (pressò),ricuperaje pallune cu ccegna (grinta) e ccuraggio e sse ‘nzertaje (inserí) comme a zZielinski. Lle mancaje sulo ll’addaffa (rete) ca se fósse mmeretata si Szczesny nun c’êsse miso ‘na pezza! Sperammo ca Sarri ‘o fa jucà spisso accumincianno ‘a marterí ca vene. JORGINHO 6,5 S’’a vedette ‘e bbella pure ‘mmiez’ô bburdello, jucanno bbuono tanti pallune, urtizzanno (verticalizzando) a mmestiere cu ‘a solita auta pircentuale a’e pasiglie (passaggi) azzeccate. Se dètte ‘na calmata sulo doppo d’’o dubblato cuano (raddoppio azzurro)[dal 66' DIAWARA 5,5 - Sarri ‘o facette trasí pe mmettere forze fresche ‘ncampo e assicurà cchiú trancatura (interdizione) a ll’armidanno (centrocampo),ma ‘o guaglione facette poco e nnun riuscette a ppiglià ‘mmano ll’artabbo (pallino) d’’o juoco. Peccato!] HAMSIK 7 Auta atalossa(alta prestazione) d’’o capitano ca fove padrone ‘mmiez’ô campo, partecipanno custantemente ô juoco cuano (azzurro) e cupulianno (dialogando) ‘int’ô stritto cu Llorenzigno; granne ‘o bbassurero (suggerimento) ca mannaje ‘mporta a cCiruzzo pe ll’uno a zzero.[dô 79' MILIK 6 ‘e stima ô marcazzo(centravanti)ca trasette quanno ‘e cumpagne abbijajeno a nnun tenerne cchiú e nnun lle detteno ‘na mana. ] CALLEJON[Peppe ‘a ‘nguenta] 6,5 Facette tutto ‘o ssuĵo a mmestiere, currenno, safanno (pressando), sacrificannose e ‘ntercettanno ‘o pallone ca purtaje ô doje a zzero. Nun signaje, ma avastaje chello ca facette. MERTENS[Ciruzzo] 10 Cumme lle miette cchiú ppoco? Fove isso ‘o bbatallo (eroe) d’’o sibbacco (match): signaje tre addaffe (reti) una meglio ‘e n’ata, ma chillu figlio ‘e coperativa ‘e bBanti ce n’annullaje una ch’era bbona; fove isso ca decidette ‘a mubbara (partita) signanno e mmannanno ô manicomio ‘a trasera (difesa) d’’e pecurare. Ascette pe ‘nu zumpòro (infortunio) e ffacimmo corna ‘nvista d’’o Riallo (dô 74' ZIELINSKI 6 ‘e stima.) INSIGNE[Lorenzigno] 7,5 Tanti gghiucate cu ssette parme, tanti saraffe (scambi)sapurite cu mMarekiaro e auti cumpagne; nun signaje, ma facette ‘na granna mubbara (partita) pe cqualità e ‘nteliggenza e nnun mullaje nsi’ ô prazzo (fine).’O capolavoro fove ‘o iabbro (cross) ca rijalaje ‘o doje a zzero a cCiruzzo. All. SARRI 7 Avette raggiona isso a ppuntà ‘ncopp’ô lione e a cCiruzzo, pure si ‘ntribbuna divano ce aspettavamo ‘e vedé sant’Arcadio; ajere finalmente se vedette ‘o Napule ca ce piace, ca va a gghiucarsela ‘ncopp’a ttutt’’e campe, senza paura cu ‘o sarrio(palleggio), cu ll'urganizzazziona e ccu ‘a cualità. Sperammo ‘e vederlo pure marterí ca vene! Nun se capette pecché Banti, a ll’urdemo, all’urdemo ‘o jettaje fora! arbitro BANTI 3 Carta canusciuta, siscaje ad capocchiam contro a nnuje e cchiú spisso nun siscaje quanno ‘mmece êss’ avuto ‘a farlo e ajere ‘mmece ‘e levarese quacche debbeto ca teneva cu nnuje, aumentaje ‘a ddosa nun nutizzianno (ammonendo) cchiú ‘e ‘nu pecuraro, nun ghittannono fora allimmeno ‘nu paro:de rossi pe ‘nu caucione a Reina e salàh pe ‘na zampata ‘mpietto sempe ô purtiere nuosto, annullanno ‘nu stuco (gol) bbuono ‘e Ciruzzo[ca fósse stato ‘o terzo nuosto e ssuĵo perzunale], fermanno a gGhoulam sulo ‘nnante a Szczesny pe n’attasallulo (fuorigioco) ca se ‘mmentaje isso i ‘a chenca soja e ghiettanno fora a sSarri senza fà capí ‘o ppecché! E fermammoce cca. Staveti bbe’! Ce sentimmo, si dDi’ vo’, â prossima vota, ca è mmiercurí ca vene doppo d’’o fullè (incontro)‘e ricresso(ritorno) ‘nCiampionsa contr’ô Riallo, mubbara (partita) ca s’à dda vencere pe ddoje a zzero assulutamente si vulimmo jí ‘nnante!Prunostice nun ne faccio, ma spero ca Dela ‘mmita a ddon Antunino Cannavacciuolo...., capisce a mme! R. Bracale Brak

Nessun commento: