lunedì 18 settembre 2017

NAPOLI – BENEVENTO (17/09/17) 6 A 0 ‘A VEDETTE ACCUSSÍ



NAPOLI – BENEVENTO  (17/09/17) 6 A 0
‘A VEDETTE ACCUSSÍ
Ch’esaggerazziona guagliú! Ajere, a ll’ora d’’a tiella ‘o Napule scennette ô san Paolo pe gghiucarese  ‘nnante a quarantamila masciadde (spettatori) [cumpreso ‘o sinnaco Mastella] contr’ô Bbeneviento ‘na mubbara (partita) ca a nchiusura risultaje matàla (perfetta), tanto è vvero ca ‘o Napule addirittura sbrasaje vincenno seje a zzero, cunzignanno â scuatra zantíca (sannitica) jalizza (gialla) e rossa ‘na guantiera cu ddoje ricce, ddoje frolle e dduje bbabbà cu ‘a crema  e piazzannose ‘ncimma â crassifica d’’o campiunato cu ddurice punte  e cquinnece addaffe (reti) fatte e ssole ddoje pigliate. ‘Nzomma ‘na Piererotta  e nce partecipajeno: ‘o ‘Ncrifato ô 3’,Lorenzigno ô15',Peppe ‘a ‘Nguenta ô 32’, mentre Ciruzzo signaje apprimma ô 27’ e ppo ddoje vote a ll’arrancua( nella ripresa) [ ô 65’ e ô 90’]tiranno dduje ricure sacrusante! Ll’unico ca nun participaje â festa fove Marekiaro, ca manco ajere riuscette a vvedé ‘a porta e ttutto summato forze fove bbuono ca Ciruzzo nun lle vulette fà tirà ‘o siconno ricore!
Mo  allora che vve pozzo dicere? Sulo ca chella d’ajere fove ‘na vera e ppropria passiata p’’o Napule i ‘o primmo terbo  (il primo derby) doppo 30 anne risultaje n’appuntamento senza storia  pure pecché ‘o ‘Ncrifato, ‘o cchiú ‘nfromma d’’e nuoste ‘o sbluccaje quase subbeto [3’]. Da chillu mumento fove tutto ‘nu jucà a ggatta e ssorice ‘na cosa ca ê guagliune ‘e Sarri, quanno ‘o vvonno fà, lle riesce bbuono. Penzo ca nun vale ‘a pena ‘e fà ‘a cronaca d’’o sibbacco (match); v’abbasta ‘e sapé ca ‘e centrale nuoste  se divertetteno e rReina êsse pututo starsene pure â casa, sparagnannose ‘a fatica ‘e cagnà tuvaglia ‘nfra primmo e ssiconno ajone (tempo) dàtose ca ‘a primma s’era ‘mpurpata ‘e surore ch’isso cacciaje stanno fremmo sott’ô sole... ‘A cosa bbona    fove chella ‘e vedé Marekiaro finalmente jucà e nun custrignere a  sSarri a chiammarselo ‘mpanca,  pure si nun fove crestiano ‘e vedé ‘a porta, ma riuscette a gghiucà tutt’’e nuvanta minute mustranno finalmente fromma e ccegna(grinta); sperammo ca n’addaffa (rete) o doje ce ‘e ffa vedé miercurí  contro â scuatra d’’o pappavallo ‘e Lotito...! A ‘stu punto putimmo dicere ca ‘a mazziata pigliata ‘nCiampionsa ce facette sunà ‘a carreca  e vvencere largo, cosa ca pe mme è ‘nu bbuonu arcabbanno (viatico) p’’a nacchella (trasferta) ‘e miercurí ca vène  a ll'Ulimpico ‘e Roma  contro â scuatra ca v’aggiu ditto.
Passammo ê ppaggelle:
REINA sv  V’aggiu ditto ch’êsse pututo pure staresene â casa e nnun ve conto fessarie; nunn’êtte ‘a fà assulutamente niente: o isso o n’arbanujo (citofono) ajere nun êsse fatto differenzia!  
HYSAJ 6,5 [Meza Cucchiara] Fove ‘nteressante ‘a bbrica  (duello) cumbattuta cu lLazaar(re). Sinamparco (comunque) ‘o Meza Cucchiara nun êtt’’a fà cape d’angelo, ma sulo cuntrullà ‘a curzia soja, i ‘o ffacette a mmestiere pigliannose pure ‘o sfizzio ‘e  prupunerese  ‘nnante tanto è vvero ca addirittura sfresaje (sfiorò) n’addaffa (rete) ca fósse stata overo bbella!Ce tocca d’aspettarlo, pecché ‘na vota o n’ata à  dda succerere!

ALBIOL 7  Urdinaria amministrazziona contro avverzarie ca quase se mettettono scuorno ‘e dà ‘mpiccio e  ttentà coccosa..

KOULIBALY 7  ‘Nu muro! P’’o ggialante nuosto passato a ccrumatina, overo ‘na passiata ajere; isso i ‘o Masto nun ‘a facetteno bbona a nnisciuno, s’’e mmagnajeno  e nnun avetteno prubbleme!

GHOULAM 7,5  Nun se putette fremmà e  nnun arretraje maje, rummanenno sempe lla ‘nnante pronto a ddà ‘na mana a lLorenzigno quanno chisto attaccaje a mmancina; ‘na presenzia custante, tanto è vvero  ca mettette  ‘o pere praticamente ‘int’a  ttutte ll’azzione d’’e stuche (gol) cuane cu ddoje jusaide (assist) e ffacenno partí n’atu paro d’azzione, affunnanno ‘e llacute (colpi) comme ô fierrofilato ‘int’â ricotta!  

ALLAN[‘O ‘Ncrifato] 7,5  Pure ajere dimustraje d’essere ll’ommo cchiú ‘nfromma a ddisposizziona ‘e Sarri i ‘o ddimustraje dopo pochi minute: ô 3’ scarzo,  ica (percussione) centrale, a ccapa sotta, palla a cCiruzzo ca ‘mpignaje ‘o purtiere, custretto a rispingere proprio ‘ncopp’ê piere d’’o ‘Ncrifato ca nun perdunaje fravecanno ‘a palla ‘mporta; chesto però nun ce à dda fà scurdà chello ca facette ‘mmiez’ô campo addó se facette apprezzà p’’a cegna (grinta), ‘a sustanza i ll’antiesce (recuperi) ‘e palla azzannanno ‘e felietrte ‘e ll’avverzarie. [Dô 71’ ROG 6 ‘e stima]

JORGINHO 6,5  Jucaje  a cciammiello e sse vedette: assenziale cumme a ssempe, ll’abbastaje tuccà una vota ‘a palla pe ddarla lista e  ppricisa. Quanti pallune gestiunaje (gestí) e sse ne vedette bbene, ma p’isso ajere fove facile: jette a ccarna e mmaccarune. Eh, fósse sempe accussí 
HAMSIK[Marekiaro] 6,5  Finalmente s’accumminciaje a vvedé coccosa d’’o vero capitano; nun tanto, ma se vedette i ajere cumm’ ajere avette raggiona ‘o mutarribbo a mmetterlo ‘ncampo; forze Marekiaro cchiú ‘e s’arrepusà ave nicessità ‘e ritruvà cunfianza (fiducia). E cquala mubbara  (partita) meglio ‘e chesta pe ffà vedé ca s’ammereta? Êsse truvato pur’isso ‘a porta ce avesse cunfermato ‘e stà criscenno cosa ca trica, ma – so’ ssicuro – vene pesante! E ffósse ggià miercurí ca vene a rRoma contr’â Lazzio!

CALLEJON [Peppe ‘a ‘Nguenta] 7   Ajere cantaje pur’isso quanno ô 32’ se facette truvà ô posto justoi ô mumento justo pe mmettere dinto cu ‘o pere mancino ‘na palla a mmestiere  ca lle dette Ghoulam(me). P’ ‘o riesto pe ttutto ‘o primmo ajone (tempo) se dette da fà  mettenno  pressiona custante a lLazaar e a cchillu povero figlio d’ ‘a Maronna, a nnomme  Antei, ca jette ô manicomio custretto comme fove a ttené d’uocchio a pPeppe ‘a ‘Nguenta  ca cullezziunaje a pparte ‘o stuco (gol), tanti bbonii gghiucate e ‘nu   ‘nu jabbro (cross) overo bbello, justo p’’a capa ‘e Marekiaro ca ll’êsse avut’’a sfruttà meglio! ‘Nzomma pure isso ajere se levaje ‘a cuollo ‘a ppoco ‘e mattezza (opacità) ca êva tenuto ll’urdemi tiempe, mustranno tutto ‘o repertorio ‘e chello ca sape e ppo’ ffà. [Dô 65’ OUNAS 6,5  Pure ajere dimustraje ca ‘e sorde spise p’accattarle so’ bbeneditte: quacche  bbona jadillà (spunto), quacche bbella penzata bbella ll’azziona ca ce fruttaje o siconne ricore e dda ‘ncurnicià chella ca ô 78’ lanzaje a mmeza cucchiara pe cchillo ch’êsse pututo essere ‘nu granne stuco. P’’o riesto,trasenno ‘ncopp’ô cinche a zzero, nun êtte fà assaje, ma ‘o guaglione dimustraje ‘e starece e dde saperece fà! Nun ve pare?     
MERTENS [Ciruzzo] 7,5  ‘A panca attuccàtele a   dDonetsk(o) ‘o carrecaje ancòra ‘e cchiú e scennette ‘ncampo diciso a mmagnarese tràsere (difese) e ppurtiere; ce pruvaje quase súbbeto [3’], ma truvaje a Belec(ce) pronto a rispingere…’ncopp’ê piere d’’o ‘Ncrifato, ca facette uno a zzero e isso êtte aspettà ‘o 27’ quanno mettette a ffrutto ‘na palla chiucchina   (fantastica) ‘e Lorenzigno e sse levaje ‘o sfizzio ‘e ggiuí, pure pecché ‘o cumpagno suojo ‘mmeriuso ll’êva ggià ffatto ô 15’ doppo d’ avé signato isso. Nun cuntento Ciruzzo a ll’arrancua (ripresa) tiraje e mmettette dinto dduje ricure e ccazzu mio comme s’à dda essere quann’è ‘o caso, nun vulette fà tirà ‘o siconno a mMarekiaro, se purtaje pur’ isso – comme êva fatto Dybala -  ‘o pallone â casa  e gghiette a mmetterse a pparo cu Icardi cu ccinche addaffe (reti) fatte.  

INSIGNE[Lorenzigno] 7,5 Ajere ‘o guaglione ‘e Fratta me piacette, nun aizaje porvera e ffove assaje cuncreto specialmente ô 15’ quanno comme si fósse stato ‘na cosa facile facile, se ggiraje ‘int’a ‘nu farzuletto futtenno a bBelec(ce) cu ‘na cunchiusione pricisa e anculata ca ‘o purtiere nun s’aspettava; ‘na vera perna po ô 27’   fove chella palla pittata pe cCiruzzo ca cu ‘a ponta d’’o pere ‘a mettette a frutto facennose chiammà ‘e muorte dô purtiere. Jucasse sempe accussí Lorenzigno![Dô 56’  GIACCHERINI 6,5 Trasette quanno ‘o Napule êva ggià abbunnantemente sistrimato ‘a facenna, ma ‘ncapo ‘e diece minute s’abbuscaje ‘a zuppa soja arrubbanno palla a c Chibsah(e) e cunquistannose ‘o ricore d’’o cinche a zzero.Abbastaje.] 
ALL. SARRI 7   Se vincette largo e ssenza piglià stuche (gol) e cce sta poco ‘a dicere:’a differenza ‘nfra ‘e ddoje scuatre fove accussí ttanta ca nun se po’ pperdere tiempo a gghí cercanno ‘o pilo ‘int’a ll’uovo; dicimmo ca ajere avette raggion’isso a nnun fà rutizzio (turnover) i a nun fà risciatà a nnisciuno, cuntinuanno a ddà cunfianza (fiducia) sempe ê stesse, cumminto  ca cchiú ca  ‘e repusà â ggente, comme a mMarekiaro, nicessita ‘e jucà pe truvà cundizziona. E accussí fove!Bbona pure ‘a mez’ora ‘e bachía (riposo) cuncessa a pPeppe ‘a ‘nguenta i a lLorenzigno.  
Arbitro IRRATI 6 Chisto nurmalmente è scemo, surdo e ccecato e pprubbabilmente se nn’è ffujuto dô Cottolengo..., però  ce porta bbuono e ajere cumm’ajere facette tutto ‘o duvere suojo! 
Conchiudenno dicimmo ca cu ‘a nichemata (vittoria) d’ajere ‘o Napule mettette ‘nzieme  ‘o nono intisarro  (trionfo) cunzecutivo ‘nzeria A [aunenno chille d’’a passata tempurata (stagione) e cchille ‘e chesta]. ‘Nzomma ‘o sajallo  (record) ‘e nichemate cunzecutive d’’a storia soja. E nnun è dditto ca ce fermammo cca: putimmo allungà ‘o bbroro miercurì ca vene jenno a rRoma contro â Lazzio. E nnun me so’ muzzecato ‘a lengua.Allimmeno accussí ppenzo e spero. E ccu cchesto ve saluto  e si ‘o vvo’ ‘o Cielo ce sentimmo ggioverí ca vene, doppo d’’a nacchèlla (trasferta) contro a Immobil e e socie. Staveti bbe’!
Raffaele Bracale Brak


Nessun commento: