CHIEVO – NAPOLI (05.11.17) 0 A 0 ‘A VEDETTE ACCUSSÍ

CHIEVO  – NAPOLI  (05.11.17) 0 A 0

‘A VEDETTE  ACCUSSÍ

No,no e nno guagliú! Che ddelusione! Nujaute ‘ntribbuna divano  ce stammo ancòra magnanno ‘e mmane pecché   nce  fóssemo aspettato dô Napule ‘na sola risposta doppo d’’a scunfitta ô San Paolo contr’ô Manchesterre, chella ‘e vencere, ma ‘o Napule  nun ce ‘a riuscette e sse facette fermà ‘ncopp’a ‘nu scunzulato zzero a zzero e  nnun ce  dètte ‘a suddisfazziona  ‘e allungà‘ncimm’â crassifica d’’o campiunato  facenno  ascí dô campo mazziate a cchilli pullicine    d’‘e  pariente lasche [Chievo] ‘e chella zoccola ‘e Giulietta, mettettennose dint’â sacca tre ppunte ‘mpurtante, ca ll’êsseno permiso ‘e mettere ‘nu poco ‘e punte ‘nfra ‘o Ciuccio i ‘a vecchia zoccola, ca ‘mmece vincette cu ‘o bBeneviente e se facette cchiú ssotto. Che nervatura!

Purtroppo nun ce fove niente ‘a fà.., purtroppo ‘o Napule dimustraje ajere ‘e nun essere attrezzato pe vvencere pure contro a cchi, cumme ‘o Chievo, joca cu unnece perzone arret’â linia d’’a palla...e ccumminfatte ‘ncapo ‘e 97 minute nun fovemo crestiane ‘e mettere ‘nzieme ‘na vera azziona periculosa e Sorrentino, ‘o purtiere d’’e pullicine, facette ‘nu paro ‘e tacculle (interventi) dicisive sulo ‘ncopp’ a ‘nu paro cunchiusione ‘mpruvvise ‘na vota  ‘e Lorenzigno e n’ata vota ‘e Marekiaro, ma sulo  a ll’arrancua (nella ripresa) e pp’’o riesto ‘o purtiere rummanette a rrattarese ‘a zella senza fà niente, tanto ‘o Chievo êva parchiggiato ‘o pulmmanne ‘nnante â porta soja!     Che nervatura e cche delusione pecché nun me ll’aspettavo, ma ce nn’âmm’’a fà ‘na raggiona. Jette accussí e ppacienza!

Passammo ê ppaggelle:

 SEPE 5,5  pe ttutto ‘o primmo ajone se guardaje ‘a mubbara (partita); ‘e bbuono: appena accumminciata ll’arrancua (ripresa) pruvaje, cu ‘nu bbellu lanzo luongo e ppriciso, a mmettere ‘mmuvimento a lLorenzigno; nun me piacette quanno, stazziunanno troppo fora dâ porta,  arresecaje ‘e ffarese fottere da sissanta metre da Radovanoviccio e ffove custretto a ccuncedere ‘nu tiro ‘e squina (corner).

HYSAJ 6  Appressuraje (spinse) cchiú ppoco ‘e  Mario Rui,ma arreto fove urdinato; però niente ‘e cchiú.

ALBIOL 6  Avette poco ‘a fà ‘e  cchelli rare vote ca fove chiammato ‘ncausa se cumpurtaje a mmestiere, senza sfregazze (sbavature).

KOULIBALY 6,5 Êsse pututo tentà ‘e cchiú ‘ncopp’ê tire ‘e squina (corner) a ffavore e nnun ‘o ffacette,ma arreto se dette da fà cumm’ô ssolito; peccato pe cchillu cartellino jalizzo (giallo) abbuscatose ô nijaio (finale) ‘mmiez’ô campo; nun s’’o mmeretava.

MARIO RUI 6 Se capette súbbeto ca ‘ncopp’â curzia soja êsse vuluto cummannarl’isso e ccercaje d’’o ffà nsi’ a cche ce ‘a facette; se facette cundizziunà da ‘nu   cartellino jalizzo (ggiallo) abbuscatose ‘nzieme a rRadovanovic e rrallentaje bbastantamente.[dô 66′ MAGGIO 5,5  Appressuraje (spinse) cchiú ppoco ‘e  Mario Rui e ‘a manovra cuana (azzurra) ne risentette.]

ZIELINSKI 5  Ajere nun me piacette pecché se  mantenette  sempe fora dô juoco e nnun parette isso; ce pruvaje  sulo una vota da luntano senza però  mettere penziere ô purtiere e nnient’ato.S’abbuscaje n’inutile‘  cartellino jalizzo (ggiallo) cumme accumminciaje ll’arrancua (ripresa) i allora  lassaje perdere. [dô 72′ ALLAN 6 ‘e stima, ma pur’isso, cumm’ô cumpagno, se facette  nutà poco.]  

JORGINHO 5,5 Fove custretto spisso a ppartí da reto risultanno poco pusitivo soprattutto durante ô primmo ajone(primo tempo) e nnun fistiggiaje ‘a cunvicazziona ‘e Ventura, ch’êsse fatto meglio a nnun ‘o chiammà, tanto che tenimmo a cche spartere cu ll’itaglia?.

HAMSIK[Marekiaro] 5,5  ‘O capitano sott’â mez’ora nun sfruttaje a dduvere ‘na bbella palla ‘e Lorenzigno;peccato!Riuscette però  a sserví palla a pPeppe ‘a ‘nguenta ‘nu paro ‘e vote e cce pruvaje ‘e capa a mmità arrancua (ripresa), ma Sorrentino ce mettette ‘na pezza. Troppo poco! 

CALLEJON[Peppe ‘a ‘nguenta] 5,5  Se scetaje sulo ô 23’cu ‘nu càtaro (diagonale)  da bbona pusizziona  però senza truvà ‘a porta; p’’o riesto nun riuscette maje a essere periculuso dê pparte ‘e Sorrentino. [dô 79′ OUNAS sv, ma trasette troppo tarde pe ffà coccosa!]

MERTENS 6,5 Me parette stanco:accumminciaje cercanno ‘e farese vedé ddê cumpagne e ss’abbuscaje ‘e primme tire ‘e squina (corner) senza però truvà maje ‘na cunchiusione periculosa.Po ce facette aspettà ‘o 65’ pe vvedé ‘nu bbellu tiro-jabbra (tiro-cross) e ffenette lla.  

INSIGNE[Lorenzigno] 6  Nun s’ammereta ‘e cchiú, pecché si è overo ca p’’e primme minute se piazzaje dint’â mmità ccampo d’’e pullicine smistanno pallune, ma nun sfunnaje e ‘ntutto sulo a ll’arrancua (ripresa) ‘mpruvvisaje ‘nu tiro ca Sorrentino sventaje. Ce fósse vuluto ‘e cchiú!

All.: SARRI 5,5 Nun riuscette a ffarece vencere nun riuscenno a ‘mmentarese coccosa pe ffà male a ll’avverzarie e pperdette ‘a brica (confronto) cu ‘o muntarribbo (allenatore) d’’o Chievo, ca riuscette a uttené chello ca vuleva!

 Arb. MASSA 5 Cu ‘sta meza cazetta ati vvote êvemo vinciuto, ma ajere c’êttem’’a cuntentà ‘e ‘nu russimmo (pareggio) .E cche saciccio!

E ffermammoce cca, dannoce appuntamento, si ‘o Cielo ‘o vvo’ a ddummeneca diciannove, visto ca se torna a gghiucà sapato a ssera diciotto quanno ô san Paolo vene a cce fà visita ‘o Milanno. E s’à dda turnà a vvencere vonno o nun vonno! Staveti bbe’ R.Bracale Brak