NAPOLI – MILAN (18/11/17) 2 A 1 ‘A VEDETTE ACCUSSÍ

NAPOLI – MILAN (18/11/17) 2 A 1

‘A VEDETTE ACCUSSÍ

Muimma (missione) aluaffata (compiuta) guagliú! S’êv’’a vencere e sse vincette, rummannno ‘ncimma â crassifica d’’o campiunato e ffesta fove ô san Paolo e ‘ntribbuna-divano ajeressera pecché, â faccia d’’e tanti cestarielle ca nce stanno cu ll’uocchie ‘ncuollo e ca ce vonno male, vincette, mettennose tre ppunte dint’â sacca,  ‘nu sibbacco (match) ca ‘ncopp’â carta êss’avut’ ‘a essere difficultuso  e ‘mmece fove sulo scamuso i ‘o Napule cuncedette ‘na mez’ora â cchella scuatra pezzotta ‘e Montella e dd’’e cinise ca però ce fatte ‘nu bbaffo a tturtiglione e ssulo ‘na vota sott’ô vintesimo riuscette a ttirà verzo ‘a porta ‘e Reina cu bBonaventura, ‘na palla destinata fora ca però Reina jette a ppiglià menannese a mmanca pecché nun se po’ mmaje sapée abbasta  ‘nu poco d’evera storta, ‘nu fuosso i ‘a palla te fotte; peró ggià ô 33’ ‘e russe e nniro êtten’ ‘ammuccià e rrassignarse, quanno Lorenzigno, mettenno a ffrutto ‘nu granne bbassurero (suggerimento) ‘e gGiorgigno   facette sicco a dDonnarumma e ppe ffurtuna ca chillo d’’a Varra alluccaje dint’ê recchie ‘e chillu baccalà ‘e  Doveri ca steva facenno ‘na strunzata annullanno ‘o stuco (gol) d’’o frattese ch’era partuto ‘mpusizziona reculare. Êttem’ aspettà peró aspettà ll’arrancua (ripresa) pe nchiudere ‘a pratteca quanno ô 73’ Zielinski, da poco trasuto ô pizzo ‘e Marekiaro   facenno passà ‘a palla ‘mmiez’ê cosce ‘e Donnarumma, ce mettette ‘ncopp’ô doje a zzero comme fove justo, datose chello ca se vedette ‘ncampo cu ‘nu Lorenzigno scatenato e ‘nu Donnarumma a ffà ‘e straurdinarie. E mMontella, ca peno nun se magna ‘o panettone a mMilano,avette ‘o bbene ‘e vedé signà ‘e suoje sulo  a ll’antijsso (nel recupero) quanno Romagnoli ‘ncarraje ‘o tiro d’’a dummeneca futtenno a rReina ca nun riuscette a mmantené ‘a porta acrata (inviolata). Ma fove ll’urdemu ‘mpiccio e ppo fenette e i ‘o Napule vincette pure â faccia ‘e chella muntazzimma (divisa) nova culore ggravone ncuzzuto  cu ‘na jonta ‘ncopp’â maglia ‘e tre strisce janco spuorco cu ccierti ppallucce ch’ànn’’a essere chelle d’’o naso ‘e chi ll’à mmentata chella fetenzia ‘e muntazzimma (divisa) ca si aggio a mmanese a cchi ll’à urdinata i a cchi ll’à fatta m’aggi’’a levà ‘a sufddisfazziona ‘e sputarle ‘nfaccia... senza cercà scusa. Basta va’, passammo ê ppaggelle:

REINA 6 – Facette  bbona guardia ‘ncopp’a ‘nu tiro ‘e Bonaventura,ma po  s’arrennette ô 92’  quanno  Romagnoli ‘ncarraje dô lemmeto d’’a muntaca(area di rigore) ‘o tiro d’’a dummeneca facenno passà ‘a palla ‘mmiezo a ‘na serva ‘e cosce e truvanno ‘a porta, ma allora nun fove itimma (colpa) d’’o purtiere ca nun vedette ‘e partĺ ‘a palla e mmaje puteva suspettà né ca chella palla passasse ’mmiezo  a cchellu bburdello ‘e perzone, né ca nisciuno d’’e suoje ascesse a cchiudere permettenno a rRomagnoli ‘o tiro e cce voglio stà quanno ‘o ‘ncarra n’ata vota!

 HYSAJ[Meza cucchiara] 6  ‘A bbrica  (duello) cu bBonaventura ‘o ‘mpignaje bastantamente i’o meza cucchiara se facette rispettà.

 ALBIOL[‘O Masto] 6,5 Dètte ‘na bbona mana a  cKoulibalý pe mmettere ‘a musarola a cKaliniccio; s’êsse pututo sparagnà chill’inutile cartellino jalizzo (giallo) a ll’antijsso (nel recupero).Ll’unica macchia ‘e ll’atalossa (prestazione) soja fove chella rispinta corta ‘e capa ô 92’ ca ce custaje ll’addaffa (rete).

 KOULIBALY 7  Nun facette passà a nnisciuno e ffove overo ‘na culonna ‘o gialante cuano crisciuto assaje pe mmano ‘e   Sarri dô punto ‘e vista d’’a tattechiunna (tattica).

MARIO RUI 6,5 Atalossa pusitiva cumme primma vota ô  San Paolo; se presentaje cu ‘na bbella vulata pure ca tenette ‘nu brutt’accunto cumm’è  Suso. Ascette sulo quanno fenette ‘a bbenzina. [dô 66’ MAGGIO 6 Attiento dètte ‘na bbona mana ô nijaio (finale)].

ALLAN 6 Luttaje senza maje sparagnarse mettennoce  corza e ssustanza. Ô nijaio (nel finale) se facette nutizzià (ammonire). Pacienza!

JORGINHO 6,5  Punto fermo e nnicessario d’’o Napule: ‘nu granne bbassurero( suggerimento) prufunnom pe lLorenzigno, lanze e ttanti bbelli  fficre (idee).

 HAMSIK[Marekiaro] 6 Me fósse aspettato ‘e cchiú dô capitano, ma isso facette sulo  quacche ttiro  poco periculoso dànno sulo ‘a senzazzione ‘e puté signà, ma nun ‘o ffacette; ô ssolito se ne scennette ‘e pressione e sSarri se ll’êtte ‘a chiammà ‘mpanca, ancòra ‘na vota. [dô 70’  ZIELINSKI 6,5  ‘Na cummerità:trasette e nchiudette ‘o sibbacco(match) facenno passà ‘a palla ‘mmiez’ê cosce ‘e Donnarumma, mettenno a ffrutto ‘na granna palla ‘e Ciruzzo . Che se po’ vulé ‘e cchiú?]

CALLEJON [Peppe ‘a ‘nguenta] 5  E mme dispiace, ma ‘o guaglione ajeressera me parette assaje poco cumminto e nun fove maje periculuso; ‘nzomma se pigliaje ‘na serata ‘e uaffa! (pausa).Sperammo ca nun ‘o ffa pure marterí ca vene!  [dô 79’  ROG 6 ‘e stima, ma trasette troppo tarde].

MERTENS[Ciruzzo] 6,5 Manco ajere riuscette a ssignà comntr’a cchilli pezzuttate russe e nnire. Ll’êsse pututo fà ‘nu paro ‘e vote, ma facette fà bbella fijura a dDonnarumma; pacienza. ‘Ncumpenso mannaje ‘mporta a  zZielinski, senza macp guardà.

 INSIGNE[Lorenzigno] 7,5  Signaje ‘o stuco (gol) ca sbluccaje ‘o sibbacco (match), ‘mmentaje e mmettette paura a dDonnarumma; ‘nzomma ‘nu vero zaimmo  (leader),’nu campione curto e mmale ‘ncavato ca cu ‘e gghiucate soje facette vulà ‘a scuatra. Menu male ca ‘o tenimmo nuje!

All.  SARRI 6,5  Ajeressera  tutto ‘o Napule nun fove spettaculare,  ma pusitivo e zzubbo (solido).Proprio chesto è cchello ca po’ sservíperrummanè ‘ncimma â crassifica!

Ar. DOVERI 5 Chisto ce porta bbuono, ma è scemo i ‘o ddimustraje cchiú ‘e ‘na vota ajeressera cu ddicisione a ccapa ‘e saciccio; bbuono pe nnuje ca ô 33’ ce penzaje chillo d’’a VARra a alluccarle ‘int’ê rrecchie: “Ma tu che ccacchio staje dicenno? Viene vide ca staje smarrunanno....” E isso nce jette.

E ccu cchesto ve saluto, fermannoce cca e ddànnoce appuntamento, si dDi’ vo’ a mmiercurí ca vene doppo d’’a tarra (sfida) dicisiva ‘e Ciampionsa marterí a ssera ô san Paolo contr’ô Shakhtar. Staveti bbe’. R.Bracale Brak