lunedì 19 febbraio 2018

NAPOLI – SPAL (18/02/18) 1 A 0 ‘A VEDETTE ACCUSSÍ



NAPOLI – SPAL (18/02/18) 1 A 0
‘A VEDETTE ACCUSSÍ
E ddicimmo ca va bbuono accussí guagliú! Ajere, a ll’ora d’’a tiella ‘o Ciuccio fove chiammato a vvencere contr’â scuatra ‘e Ferrara, pe tturnà ‘ncimma â crassifica ô posto d’’a vecchia zoccola ca pe pparta soja a ll’ora ‘e ll’apritivo,ô ssolito suojo,  s’era arrubbata, favurita da chella meza latrina d’Orsato, ‘na nichemeta vattenno ‘o Toro e surpassannoce...; ma ‘o surpasso duraje sí e nno n’ora pecché, cumme ve sto’ ddicenno ‘o Ciuccio [‘e rippe o ‘e rappe] vattette ll’avverzario ‘e turno [pure si sulo p’uno a zzero e nno allimmeno pe tre a zzero cumme se fósse mmeretato], rignette ‘e pernacchie ‘a vecchia zoccola e tturnaje ‘ncimm’â crassifica addó se mmereta ‘e stà e addó ‘o vulimmo vedé a mmaggio! I ‘a pratteca fove misa a pposto ggià durante ô primmo ajone ô 6’ quanno ‘o ‘Ncrifato  [7,5 e ppo ve dico] mettette a ffrutto ‘na granna trianculazziona ‘nfra Ciruzzo, Peppe ‘a ‘nguenta e isso ca signaje purtannoce ‘nvantaggio; da chillu mumento jettemo ‘nnante facenno sempe nuje ‘a mubbara (partita) e custringenno ll’avverzario ferrarese, pe ll’accasiona cu ‘na muntazzimma rossa, a ddifennerese e nnun lle cuncedettemo ca unu tiro ‘mporta ô niajo (finale) ‘e primmo ajone (tempo) ,tiro ca Reina[7 e ppo ve dico] però paraje mentre nujaute [pe pparta nosta, cu lLorenzigno ca cugliette ‘o palo e ddoje vote cu Peppe ‘a ‘nguenta ca se facette parà dduje còmmete tire] sciupajeno tre accasione... Ecco chesto nun me piacette, nè me piacette ll’arrancua (ripresa) ca aizajemo porvera  e nnun tentajemo ‘e signà ancòra! Pacienza! Cuntava  vencere e sse vincette, alleluja, alleluja, alleluja.
Passammo ê ppaggelle:
REINA 7  Cumme v’aggiu ditto s’êtt’’a spurcà ‘e guante una vota ‘ncopp’ô tiro centrale ‘e  Viviani ô niajo (finale) ‘e primmo ajone (tempo)  e pp’o riesto fove urdinaria amministrazziona, ma se mmereta sette pecché cu chill’unicu taccullo (intervento) sarvaje ‘o risultato e mantenette ‘a rezza acrata (inviolata).
HYSAJ 6   Facette ‘o ssuĵo mustrannose puntuale e ppriciso pure senza dà ‘na mana a ll’azziona uffenziva.
 ALBIOL[‘O Masto] 6,5  Nun sbagliaje niente mantenenno trancuilla ‘a sezziona (reparto) e nnun cuncedenno niente a nnisciuno.  
KOULIBALY[‘O Gialante] 6,5 Sicuro d’’a cumpagnia d’’o Masto s’’a vedette ‘e bbello e ccalaje ‘a sarracinesca mettennoce ‘nteliggenza, senzo d’’a pusizziona e ll’arbadanía (fisico) soja! Quanno partette fove periculuso cu ‘nu tiro ‘a fora.   
RUI 6,5  Fove isso ca accumpagnaje ll’azziona uffenziva  cupulianno cu lLorenzigno, gestiunanno (gestendo) bbuoni pallune  e arreto arresecaje poco e nniente cu tutto ca tenette ‘nu bbrutt’accunto cumme a lLazzari.
ALLAN [‘O ‘Ncrifato] 7,5  E ss’’o mmereta tutto nun sulo pecché fove isso ca risulvette ‘a prattica, ma pecché pe ttutt’ ‘o sibbacco(match) se facette ‘nu prozo tanto mettennoce corza e ccegna (grinta) cunfermanno ‘a granna tempurata (stagione) soja addó fove ‘mmitato a gghiucà.
JORGINHO 6,5  Ô ssolito cumannaje urdinatamente ll’armidanno (centrocampo), urtizzaje (verticalizzò) libberannose cu ‘nteliggenza, dint’ô stritto, d’ ‘e ppallune periculuse.[dô 90' DIAWARA 6 ‘e stima, pecché jucaje troppu  pocu tiempo, p’essere cchiú priciso!]
HAMSIK[Marekiaro] 6,5 Se muvette bbuono, tenette ficre   (idee) mannaje  ‘mporta apprimma Lorenzigno e ppo Peppe ‘a ‘nguenta; signaje pure, ma ‘a VAR(RA) ca cunzola ‘a sora ‘e ll’arbitro, annullaje ‘o stuco (gol) pe bbia ‘e ‘nu paro ‘e centimetre; cu ‘o cacchio ca ce ll’êsse annullato si Marekiaro êsse tenuta ‘na maglia janca e nnera! [dô 70 ZIELINSKI 6   Trasette súbbeto ‘int’ô sibbacco (match) cupulianno (dialogando) cu lLorenzigno e scarfannose súbbeto.]
CALLEJON [Peppe ‘a ‘nguenta] 6,5  Ma sulo pe cchella trianculazziona ca ce dette ‘a nichemata ((vittoria) pecché po ce avesse ‘a levà miezu zifo (voto) pe bbia ca pe ddoje vote sbagliaje ‘o doje a zzero, e pecché a ll’arrancua (ruipresa) se ne scennette ‘e posa  nun mantenenno ‘e zzureje (ritmi).[da ll'86'  ROG  6 ‘e stima, pecché pur’isso jucaje troppu  pocu tiempo, p’essere cchiú priciso!]
MERTENS [Ciruzzo] 6,5  ‘Na vota tanto fove ‘nu jucatore nurmale dànno pallune ê cumpagne uiffenzive e ccercanno, senza truvarlo, ‘nu stuco (gol), ma ‘o zifo s’’o mmereta p’avé participato â trianculazziona d’’a nichemata (vittoria); pacienza si nun signaje!
INSIGNE[Lorenzigno] 6,5  Manco ajere riuscette a ssignà  però se dette da fà:cugliette ‘nu palo e ccercato dê cumpagne  mmanaje ô manicomio a  sSalamon(ne)!
all.  SARRI 6  Ascette dô campo poco cuntento ‘e ll’uno a zzero e cchi sa’ si nun dipennette pure ‘a isso.., ma chi vence ave raggione i ajere ‘o Ciuccio vincette!
arb. GAVILLUCCI 5 Cu ppoca ‘sperienzia siscaje a vvienetenne e nnun me piacette ‘a ‘nfamità d’annullà ‘o stuco (gol) d’’o capitano pe ‘nu paro ‘e centimetre. ‘Sti ccose ô san Paolo nun s’ànn’’a fà!
E ffermammoce cca, poco suddisfatte, ma cuntente d’’a nichemata (vittoria) assaje  ‘mpurtante. E ssi dDi’ vo’ ce sentimmo viernarí ca vene doppo d’’a nacchella (traferta) a lLipsia  pe ll’ejuda (ritorno) d’’o sibbacco (match) [pe mme inutile] d’’a coppa piccerella airupea quanno spero ca vincimmo, sí, ma p’uno a zzero accussí fenesce ‘a jacuvella ‘e ‘na cuppetta ca ce dà sulo ‘mpiccio! P’’o campiunato  ssi dDi’ vo’ se ne parla marterí vintisette doppo d’’a nacchella (traferta) d’’o llunerí a cCagliari. E cca ‘o Cielo ce désse ‘na mana! Staveti bbe’.
R.Bracale Brak

Nessun commento: